Uisnenog no'en nai Abram
12
Tabug naan, UISNENOG naguab noi nai Abram am nak, “Abram! Ho mnao musaitan ho nonot, ho ama' in umel, ma ho kuan. Ho mnao moi balel mese, le' Au of uklila' ee noi ko.2 Au of a'fee tetus-athoen noi ko.
Ma ho sufam-ka'um sin of amfau-hutug,
ma of anjalin uuf matani', tal ho kanam naan of mateka'.
Lalit ho mjali atoni amneki tetus noi tua teta'.
3 Au of a'fee tetus noi tuaf-tuaf le' anfee tetus noi ko.
Mes Au of a'fee sukat noi tuaf-tuaf le' ansukat ko.
Amneen mulek-leko'!
Ale' uuf-uuf anbi pah-pinan iij of napenin tetus, natuin ho.”
4-5 Tabug naan, nai Abram anmoni naan toon bo' hitu mniim (75). In neki in feel bi Sarai, ma olif nai Haran in anah nai Lot, ma in bale pusaak sin ok-oke', ma ameput een in umel nanan le' in napeni sin anbi koot Haran. Lalit nai Abram annao nasaitan koot Haran, noi balel le' UISNENOG anpaa' nalalij le he naklila' noi ne. Sin annaon nfinin antee pah mese, in kanan pah Kana'an.
6 Anteen balel naan, nai Abram sin annonog anfuun am nateef, tal sin anpaumakan anteen kuan Sikem. Lalit sin natguan ntahan een anpaumaak hau naek mese et More. Tabug naan, abiten Kana'an fe' natguan anbi naan. 7 Anbi balel naan, UISNENOG nakliil On noi nai Abram. In naguab am nak, “Au of a'fee balel iij noi ho sufam-ka'um sin.” Lalit nai Abram anbaki me'i fatug he anjali me'i fuat noi UISNENOG le' nakliil On anbi naan.
8 Lalit nai Abram sin natnanin balel. Sin annaon noin anu'af et pesit ane'ug. Lalit sin natgua ntahan anbin kuan Betel ma kuan Ai sin atnanak. Anbin balel naan, in anbaki me'i fuat, ma nabees noi UISNENOG. 9 Lalit sin natna-nanin balel, na'ko balel mese noi balel mese, anteen pah Negep et Kana'an pesit ane'ug.
Nai Abram annao noi pah Masir
10 Tabug mese, amnahas matani' antaman pah Kana'an. Es on nane, nai Abram sin annaon naloo' antenin noi pesit ane'ug, anteen pah Masir. Sin natguan ntahan anbin naan. 11 Tabug sin he antaman noin pah Masir, in naguab noi in feel bi Sarai mnak, “Sarai, ho masam lekon kaah! 12 Es on naan kalu abiten pah Masir niit ho masam, sin of namate kau, natuin au le' iij ho monel. Ma sin of ansao ko. 13 Es on naan naleko nnesi, ho mutonan sin am mak, au le' iij, ho na'og. Nok lalan naan, sin ka nuug fa he nlolo kau, mes sin of naleko nok kau, natuin sin nlomi ko.”
14 Es on naan tabug nai Abram sin anteen pah Masir, abiten naan niit bi Sarai in masan alekot naan. 15 Tabug kesel pah Masir in atuta'-abha'et sin niit, sin anboi's ahaa bifeel naan anbi kesel in matan. Ma sin neki bifeel naan noi kesel in sonaf. 16 Ma kesel naan nok nai Abram anmonin lekog, natuin bi Sarai. Lalit kesel anfeen nai Abram bijael, bijakase keledai, bijakase unta, abibij, ma abibi-kasel. Kesel anfeen sin luum aah. In anfee atel noi nai Abram amsa', bifeel ma atonij.
17 Mes natuin kesel nataam atoni' in feel anbi in sonaf, es on nane, UISNENOG anhukum kesel naan. Es on naan kesel napeni hukum huma'-huma', in ma in umel nanan amsa'. 18 Lalit kesel no'en nai Abram ma antotij ee mnak, “Abram! Ho mmo'e kau on mee? Nansaa' am es ho ka mutoon fa mmak bifeel iij, ho feel? 19 Mes ho mak in le' iij, ho feto'! Aal ba-baun ate, au 'saog! Amsimo mufani' ho feel. Tabug iij, mekij ma mpoi maen mimneku nai! Au ka 'iit a'tein ki fa mbi balel ii!” 20 Lalit kesel naplenat in ameput sin he anli'u napoitan nai Abram ma in feel, ma sin bale' een ok-oke'. Sin lo he nasaitan balel naan.