3-4 Sin ala sin anma'akolan am nak, “Hoi! Aok-abjaan ala ki! Iim he hit tafena' kuuk koot anaek mese. Es on naan hit atmo'e fatu mtasa', lalit hit totu sin tal nahelan. Hit taktuta' fatun naan ma tlape sin atpake ter. Lalit hit tahakeb koot ma'ume fatu mnanu es anbi koot anaek naan in nanan. Menara ma'ume fatug naan, in penan ansutlai nenog, henati' hit mateka' kit. Ma maut he hit atjali uuf anaek mese, ma naik atbatis ok.”

5 Es on naan UISNENOG ansanu neem ma annono koot ma'ume fatu maktuta mnanu alatas le' mansian een naan nafena. 6 Lalit In naguab am nak, “Sin le' iij, uuf mese ma aguab mese. Saa' le' sin anmo'el tabug iij, fe' anfaatn on. Of ka loog fa, kalu sin ala sin anmafutun anjalin mese on le' tabug iij, sin of nabe'in he anmo'en saa'-saa' aah. 7 Leko nneis Hit tsanu he takalab sin aguab, he anjali aguab huma'-huma'. Maut henati' es nok es ate ka nahine fa es in aguaban.”

8 Lalit Uisnenog ansanu ma nakalab sin aguab. Nok lalan naan, In anmo'e mansian sin ansiksaan ok noin ale' balel anbi pah-pinan. Ma sin ka nafena' nafinib fa koot naan. 9 Natuin UISNENOG nakalab sin aguab, ma nasana sin noi ale' balel anbi pah-pinan, es on naan sin nakanab koot naan Babel (le' he noi huma' mese on le' kata mese, le' in oten ‘takamana'’).

10 Nai Sem in sufan sin es le' iij: tabug noe sako' naan namsau toon nuug, nai Sem anmoni naan toon natun mese (100), in nahoni' li'aan moonl es, ma nakanab nai Arpaksat. 11 Lalit in anmoni nteni toon natun niim fe' (500), ma in nahonis anteni' li'aan feto ma li'aan monel.

12 Tabug nai Arpaksat anmoni naan toon bo' tenu mniim (35), in nahoni' li'aan moonl es, ma nakanab, nai Sera. 13 Lalit nai Arpaksat anmoni nteni toon natun haa am tenu fe' (403), ma in nahonis anteni' li'aan feto ma li'aan monel.

14 Tabug nai Sera anmoni naan toon bo' teen (30), in nahoni' li'aan mooel es, es le' nai Eber. 15 Lalit nai Sera anmoni nteni toon natun haa am tenu fe' (403), ma in nahonis anteni' li'aan feto ma li'aan monel.

16 Tabug nai Eber anmoni naan toon bo' tenu mhaa (34), in nahoni' li'aan moonl es, es le' nai Pelek. 17 Lalit nai Eber anmoni nteni toon natun haa mbo' teen fe' (430), ma in nahonis anteni li'aan feto ma li'aan monel.

18 Tabug nai Pelek anmoni naan toon bo' teen (30), in nahoni' li'aan moonl es, es le' nai Rehu. 19 Lalit nai Pelek anmoni nteni toon natun nuug am seo fe' (209), ma in nahonis anteni li'aan feto ma li'aan monel.

20 Tabug nai Rehu anmoni naan toon bo' tenu mnuug (32), in nahoni' li'aan moonl es, es le' nai Seruk. 21 Lalit nai Rehu nmoni nteni toon natun nuug am hitu fe' (207), ma in nahonis anteni li'aan feto ma li'aan monel.

22 Tabug nai Seruk anmoni naan toon bo' teen (30), in nahoni' li'aan moonl es, es le' nai Nahor. 23 Lalit nai Seruk anmoni nteni toon natun nuug fe' (200), ma in nahonis anteni li'aan feto ma li'aan monel.

24 Tabug nai Nahor anmoni naan toon bo' nuug am seo (29), in nahoni' li'aan moonl es, es le' nai Tera. 25 Lalit nai Nahor anmoni nteni toon natun mese bo'es am seo fe' (119), ma in nahonis anteni li'aan feto ma li'aan monel.

26 Tabug nai Tera nmoni naan toon bo' hitu manesi', in nahoni' li'aan monel teen, es le': nai Abram, nai Nahor, ma nai Haran.

27 Nai Tera in sufan-ka'un sin, es le' iij: nai Tera in aanh een, nai Abram, nai Nahor, ma nai Haran. Nai Haran nahoni' li'aan moonl es, es le' nai Lot. 28 Nai Haran anmate nbi in kua-mnasi' Ur, et pah atoni Kasdimas. Tabug in anmaat, in amaf nai Tera fe' anmoon. 29 Nai Abram ansao bi Sarai. Nai Nahor ansao nai Haran in aan feto, bi Milka. Nai Haran nahoni' li'aan moonl es amsa', es le' nai Jiska. 30 Mes bi Sarai anmoub.

31 Tabug mese, nai Tera neki in anah nai Abram, in upuf bi Sarai, ma nai Lot le' nai Haran in anah. Sin anpoin ma annaon nasaitan sin kua-mnasi' Ur. Tabug naan, sin he nnaon noin pah Kana'an. Mes anteen pah Haran, sin natguan anbin naan.

32 Anbin naan, nai Tera anmaat, tabug in nmoni naan toon natun nuug am niim (205).