Nai Noh ma nai Yafet sin sufa'-ka'uf sin
10
Noe sakog naan namsau nalali on ii, nai Noh in aanh een anmulai nahonin. In napeni sufaf na'ko nai Sem, nai Yafet, ma nai Ham.2-5 Nai Yafet in sufan sin es le': nai Gomer, nai Magok, nai Madai, nai Jawan, nai Tubal, nai Mesek, ma nai Tiras. Es-es nok in aguab, in uuf, ma in pah.
Nai Gomer in sufan sin es le': nai Askenas, nai Rifat, ma nai Togarma.
Nai Jawan in sufan sin es le': nai Elisa, nai Tarsis, abiten Kitim, ma abiten Dodanim le' natguan et tasij ninen.a
Nai Ham in sufan-ka'un
6 Nai Ham in sufan sin, es le': nai Kus, nai Misraim, nai Put, ma nai Kana'an.b
7 Nai Kus in sufan sin es le': nai Seba, nai Hawila, nai Sapta, nai Raema, ma nai Sapteka.
Nai Raema in sufan sin es le': nai Seba ma nai Dedan.
8 Nai Kus in aan monel ee, es le' nai Nimrot. Atonij le' iij, meo-pa'el ahun-hunut le' matani le'uf. 9 In matanin naan amneman na'ko UISNENOG, tal antee in anfani aseko alekot mese. Es on naan sin nteek ee nak, “Maut he ho mjali aseko alekot mese on le' nai Nimrot, le' napeni in be'in ee na'ko UISNENOG.” 10 Nahunut in pah ee anmulai na'ko Babel, Erek, Akat, ma Karne. Balen le' iij sin et pah naek Sinear.c 11 Na'ko naan in nheinua anteni in kua-plenat antee Asur. Lalit in nafena' koot Niniwe, koot Rehobot-Ir, koot Kala, 12 ma koot Resen, le' et Niniwe ma Kala sin atnaank een. Balen naan, pah anaek.
13 Nai Misraim in sufan sin, es le': abiten Rudim, abiten Ananim, abiten Rehabim, abiten Naftuhim, 14 abiten Patrusim, abiten Kasluhim, ma abiten Kaftorim. Abiten Kasluhim naan, es le' atoni Filistinas sin babaf sin.
15 Nai Kana'an in aan mone unu' ee es le' nai Sidon. Nai Kana'an anfani aam uuf noi atoni Hetes, 16 atoni Jebusis, atoni Amoris, atoni Girgasis, 17 atoni Hibisas, atoni Arkis, atoni Sinis, 18 atoni Arbadis, atoni Semaris, ma atoni Hamatis.
Nai Kana'an in sufan sin nasana ok anteen balel al-aloot, 19 tal antee sin anaakf een anmulai na'ko koot Sidon anfinin kuan Gerar anteen pah Gasa. Na'ko naan, nfinin noin koot Sodom, koot Gomora, koot Atma, ma koot Seboim, tal anteen koot Lasa.
20 Sin ala sin le' naan, nai Ham in sufan. Es-es nok in aguab, in uuf, ma in pah.
Nai Sem in sufan-ka'un
21 Nai Yafet in tataf nai Sem anjali abiten Eber sin aam uuf.d
22 Nai Sem in sufan sin, es le': nai Elam, nai Asur, nai Arpaksat, nai Lut ma nai Aram.
23 Nai Aram in sufan sin, es le': abiten Us, abiten Hul, abiten Geter, ma abiten Mas.e
24 Nai Arpaksat in anah, es le' nai Sera. Nai Sera in anah, nai Eber.
25 Nai Eber napeni li'aan monel nuug. Atoni anaet, kanan nai Pelek (le' in oten ‘batis ai' sisa'et’), natuin tabug naan, mansian sin anbatis ok noi ale' balel-balel anbi pah-pinan. In olif, kanan nai Joktan.
26 Nai Joktan in sufan sin, es le': nai Almodat, nai Selef, nai Hasar-Mabet, nai Jera, 27 nai Hadoram, nai Usal, nai Dikla, 28 nai Obal, nai Abimael, nai Seba, 29 nai Olif, nai Hawila, ma nai Jobap. Sin ala sin le' iij, nai Joktan in sufan.
30 Balel-balel le' sin natgua sin, anmulai na'ko Mesa anfini ntee Sefar, es le' bale manu'af een et pesit manas asaen.
31 Sin ala sin nai Sem in sufan. Es-es nok in aguab, in uuf, ma in pah.
32 Sin ala sin ok-oke', nai Noh in sufan-ka'un, es-es ate nok in uuf ee kuun. Tabug noe sakog naan namsau, sin le' iij es le' anseik jok ma nbatis ok ma nahenu pah-pinan.