Uisnenog nahakeb lasi manpaa' nok nai Noh
9
Uisnenog anfee tetus-athoen noi nai Noh ma in feel-anah sin. In naguab am nak, “Hi mihoni' ma miloulu he mihenu pah-pinan iij ee ntein. 2 Mu'i fuij sin ma kolog, ika' of namtausan ki. Au 'nona' sin noi ki. 3 Hi mibe'i meku mu'it een naan sin siisj een on le' hi mibe'i meku hau fgua sin. Au 'fee ale' saa'-saa' een le' iij noi ki.4 Mes hi naika meku sisij le' in naa' ee ka nsai npoi fa fe', natuin mu'it een sin amonik een et naa' naan.
5-6 Au 'mo'e mansian natuin Au humak ma Au masak, Au mo'et ma Au taos. Es on nane, naik amlolo mansian. Kalu nmu'i tuaf, ai' mu'it, namate mansian, hi lo he mimatel ee msa'. Plenat le' iij, neem na'ko Kau. 7 Hi lo he mihoni' ma miloulu, he mihenu pah-pinan iij antein.”
8 Uisnenog anluut In aguaban naan am nak, 9 “Tabug iij, Au he uhakeb manpaa' 'ok ki tal antee hi sufam-ka'um sin amsa'. 10 Lasi manpaa' le' iij anmatoom nok ale' kanan amonit amsa'. Es le': mu'i aem, mu'i fuij, ma kolog. Taguab pala' ale' apoit een le' nok ki na'ko bnaog naan in nanan. 11 Au lasi manpaa' naan, on ii: Au ka 'fee 'teni' fa noe sakog he nalemab namate ale' kanan amonit anbi pah-pinan ii.
12-13 Au 'tao Au enus anbi nenog he nfani taka'. Enus naan, of namnauba' Kau noi Au lasi manpaa' iij le' ka natfeek niit fa noi ki, noi amonit een ok-oke', ma noi pah-pinan iij amsa'. 14-17 Kalu nmu'i nopel anbi nenog, lalit enus anpoi, in of namnauba' Kau mnak: noe sako' of ka nale'un anteni' fa ale' amonit een anbi pah-pinan ii. Nok lalan naan, Au lasi manpaa' le' nabal-baal, anmafutu piut nok ki, ma nok ale' kanan amonit.”
Nai Noh anmafu tua min-kasel
18 Nai Noh in anah sin le' anpoin na'ko abnaog naan es le': nai Sem, nai Yafet, ma nai Ham. (Nai Ham naan, es le' nai Kana'an in amaf). 19 Mansian pah-pinan iij ok-oke', sin sanuk een na'kon nai Noh in aan tenu een le' ii.
20 Nai Noh naan, atoni tani. In es le' anseen hau anggur ahun-hunut. 21 Tabug mese, nai Noh ninu lalu tua min-kasel tal antee nmafu ka nahiinl on fa. Ma in nkasu nani in pakel, lalit in antuup natkeen monas-monas aah anbi in lopo-tenda. 22 Tabug nai Ham antaam, in niit in amaf ee antuup monas aah. Es on naan in naen anpoi, ma annao natonan in tataf, nai Sem ma nai Yafet. 23 Lalit sin nua sin naitin tais ma napii' nakfilit tais naan anbi sin hanuk een. Lalit sin annaon ntet-kotin antaman noin lopo-tenda naan, ma ankuub naan sin amaf. Sin ka niit fa sin amaf ee amaen. Lalit sin anpoin nfanin.
24 Tabug nai Noh in mafug ee anfiin, in nahine in aan mone aheti susug in amo'en. 25 Lalit in naguab am nak, “Hoi! Kana'an amaf! Au 'sukat ko! Ho of amfani atel moi ho tata' sin!
26 Pules-bo'is noi UISNENOG, natuin nai Sem!
Mes nai Kana'an nfani nai Sem in aan lelu.
27 Mautu he Uisnenog anfenus ma anmeinuab anteni nai Yafet in pah.
Ma in sufan een anmonin anbin taimamut ma ao-mina' nok nai Sem in sufan.
Mes mautu he nai Kana'an anjali nai Yafet in aan leka'.”