Naijaan ee anmulai nmeet
8
Mes Uisnenog ka nniken fa nai Noh ma ale' mu'it een anbin abnaog naan. Es on naan In npake anin he nfuu nametib oel naan. 2 In ankehe nani oe maat een, ma nasnasab ulan. 3 Lalit oel naan ansanu piut. Nenog natun mese am bo' niim (150) namsopu on nane, oel naan in alatan ansanu kle'og. 4 Nateef funan hitu ntaam nenog bo'es am hiit on naa, abnaog naan nala'et on anbi nu'af alatas mese, kanan Ararat. 5 Oel naan ansanu piut. Tabug naan fuun bo' ee antaam nenog mese, a'nu'af een sin tuunk een mamnita een ee. 6 Anfini na'ko nenog bo' haa on nane, nai Noh nasoitan abnaog naan in nesu kiso'. 7 Lalit in nafetin kolo kaa' mese. Kolog naan naplele nuu-mneem tal antee oel naan ansanu namneo-namneo. Ma in ka nfani fa noi abnaog naan. 8 Es on naan nai Noh nafetin anteni algua-sisij he nlilo ma nahine niit kal-kalu ai' oel naan anmeit je. 9 Mes oel naan fe' nalemab pah-pinan, es on naan kolog naan ka napeni fa balel he antook. Es on naan in anfani noi abnaog. Nai Noh annona' in animan, ma antopu nataam kolog naan anfani noi abnaog.
10 Nai Noh anpao nteni nenog hiit. Ma in nafetin anteni algua-sisij naan. 11 Manas ee anmabe on nane, algua-sisij naan anfani neem. In anleo neki hau noo saitun mese. Lalit nai Noh nahine nak oel naan ansanu namneog ee. 12 In anpao nteni nenog hiit. In nafetin anteni algua-sisij naan. Mes tabug le' iij, algua-sisij naan ka nfani neem fa.
13 Fuun mese ntaam nenog mese, tabug nai Noh anmoni naan toon natun nee mmese (601), oel naan anmeit je. Nai Noh nasoitan anteni nesu kiso'. In napene te, naijaan anmeto nalaal je. 14 Anbi fuun nua ee ntaam nenog bo' nuug am hiit, naijaan naan anmeto nfiin je.
15 Lalit Uisnenog anlelu nai Noh am nak, 16 “Noh! Tabug iij, hi msanu nai ma'ko abnaog naan. 17 Misanut mu'it een naan ok-oke'! Es le': mu'i aem, mu'i fuij, anonok, ma kolog. Maut he sin nahonin, he nahenu pah-pinan.”
18-19 Lalit nai Noh, in feel, in anah een, ma in upuf een, ansanun ok-oke na'ko abnaog naan. Mu'it een naan ansanun amsa', mese-mese natuin in nonot.
Nai Noh anfee fgua'-tulu' he nseun banin Uisnenog In manekan
20 Lalit nai Noh anbakin fatug he nmo'e me'i fuat noi UISNENOG. Na'ko mu'it een le' nabe'i he npake sin anjalin afgua'-tulu', nai Noh anheke mes-mese. Lalit in nlolo sin ma notu sin anbi me'i fuat, he anjali taka nak in nasaeb seun-banit noi UISNENOG. 21 Tabug UISNENOG nafoi niit afgua'-tulu' een naan sin foo menik een, In anmaliin. Ma In natenab am nak,
“Anmulai tabug iij, Au ka sukat ateni' fa pah-pinan natuin mansian een sin mo'et amle'ut. Maski sin nateenb ahaa lasi amle'ut na'ko sin fe' aan'-ana', mes Au of ka ule'un ateni fa ale' kanan amonit, on le' Au fe' ule'un ulaal je le' naan. 22 Anbin tabug pah-pinan iij fe' anbi naa, tabug sin nanaob ok piut, natuin aal sin neog een. Es le': olas senat ma sekit, olas mainikin ma malalaf, olas faku-nais ma uul napug, faij ma manas.”