Noe sakog
7
Lalit UISNENOG naguab noi nai Noh am nak, “Au 'ail a'bi meel am meel, mes aal ho mmees-mees es neek amneot. Es on naan ho mok ho feel-anah sin amtaam nai moi bnaog naan. 2-3 Na'ko ale' kanan mu'it le' sin sisij een nabe'i he hi meku sin, ma le' nabe'i he hi mitulu' sin noi Kau, ho mutaam pasan hiit-hiit noi bnaog naan. Na'ko ale' kanan kolog ho mutaam pasan hiit-hitu msa'. Mes mu'it abjaan anteni' ho aal mutaam pasan mes-mese aah. Nok lalan naan, mu'it een naan, anjalin on le' finij noi sin sufan sin, he sin nmonin amsa'.4 Mumnau mulek-leko'! Aal nenog hitu te, Au of usanut ulan le' ka nasnaas niit fa, tal antee nenog bo' haa ma faij bo' haa. Au 'pake lalan naan, he umate 'ani ale' amonit een anbi naijaa meto', le' Au 'mo'e ulali sin.”
5 Lalit nai Noh anmo'e natuin on le' UISNENOG In aplenat naan ok-oke. 6 Tabug noe sakog naan ansae te, nai Noh anmoni naan toon natun neel eh (600). 7 Lalit nai Noh nok in feel, ma in aanh een, ma in upuf een, antaman noin abnaog naan, he sin ansoi naan ok. 8-9 Nai Noh natuin UISNENOG In aplenat naan, es on naan in nataam ale' kanan kolog ma mu'it, es-es nok nani in abjaan, na'ko mu'it le' he mansian nabe'i neku sin sisij een, ma na'ko mu'it le' ka nabe'i fa he neku sin sisij een. 10 Nenog hitu namsoup, noe sakog naan neem ma anmulai nalemab pah-pinan ii nog mesen.
11 Tabug nai Noh anmoni naan toon natun nee (600) mfunan nuug am nenog bo'es am hiit on nane, noe sakog naan anmulai ntaam. Tabug naan on le' nenog natfai, es na' oel ee nat'oop aah. Ma ale' oe maat een anpe'an lafgua-lafug ma npulan napoitan een oel. 12 Ma ulan naan ansanu ka nasnaas niit fa, faij-manas, tal antee nenog bo' haa.
13 Mes nenog naan, nai Noh, in feel, in anah een tenu sin, es le': nai Sem, nai Yafet, ma nai Ham, ma in upuf een antaman ok-oke noin abnaog naan. 14 Sin ntaam nabguan nok mu'i aem een, mu'i fuij sin, mu'i anonok sin, kolog, ma mu'it abjaan le' manine' amsa'. 15-16 Pasan mese-mese na'ko ale' Amonit een, antaam nabguan nok nai Noh anbi abnaog, namnees nok saa' le' Uisnenog naplenat.
Tabug sin antaman nalalin ok-oke te, UISNENOG nekin On na'eek ma nakuus abnaog naan in nesug.
17-19 Uul anaek naan ansanu piut, tal antee nenog bo' haa. Es manum noe sako' ansae piut tal antee bnaog naan natboe. Oel ee ansae piut tal nalemab naneku nu'af amnanu' een ok-oke. 20 Oel naan ansae piut, tal in alatan metel hiit annesi na'ko nu'af amnanu le'uf.