Maufinug na'ko mansian
6
Tabug naan, mansian namfau le'uf. Ma sin anmonin nasana ok anbi ale' balel-balel. Sin nahonin li'aan feto amsa'. 2 Uisnenog In aan monena niit li' feto munif mansian een, lo maas le'uf een. Es on naan sin mese-mese annao ansao li' feto mee le' in anlomij. 3 Lalit UISNENOG nak, “Au 'hae 'maatl een nok mansian ii sin monit amle'ut. Au Smanak le' namonib sin naan, ka nlomi fa he sin anmonin piut.b Sin lo he nmaten. Es on naan sin amonik een antuu' toon natun mese am bo' nuug aah (120).”4 Na'ko batan naan, tal batan-batan amunit, atoni hae-blakog anmonin anbi pah-pinan.c Tabug naan Uisnenog In aan monel een ansao mansian een sin aan feto munif een, ma nahonin atoni matani', es le' anaak makenat, le' mateka' anbi tu'in ahunut.
5 Tabug naan, UISNENOG nail mansian anbi pah-pinan anmo'en amle'ut bainesi'. Sin anopak een iij aal nateenb een lasi amle'ut piut. 6 Es on naan UISNENOG antoof On natuin In anmo'e nalali sin, ma natokob sin anbi pah-pinan ii. Lasij naan lo nasusab niis Uisnenog. 7 Es on naan In naguab am nak, “Au of ule'un mansian le' Au 'mo'e ulali sin anbi pah-pinan ii. Au of umate ale' kanan kolog ma mu'it abjaan amsa'. Au 'toof ok ma a'saanl ok, natuin Au 'mo'e ulali sin.” 8 Mes aal nai Noh, es le' anhaliin UISNENOG In nekan.
Nai Noh in tu'in
9-10 Nai Noh in tu'in, on ii: in nmu'i aan monel teen, es le': nai Sem, nai Yafet, ma nai Ham. Nai Noh anmoni nok neek amneot noi Uisnenog, ma ka nmo'e fa mo'e le'uf. Tabug naan, aal in es le' atoni alekot. In nmoni anhaumaak nok Uisnenog.
11-12 Mes Uisnenog nail ale' kanan mansian een anmo'e amle'ut alafug-alafug. Anbi meel am meel ale mansian namle'u nmaat. Uisnenog nail mansian anbi pah-pinan naan, anmo'en ala haa lasi amle'ut. 13 Lalit Uisnenog naguab noi nai Noh am nak, “Au 'iit ulali mansian ee in mo'et amle'ut anbi balel meel am meel. Es on naan Au ufeek ulali 'ak, Au lo he ule'un 'ani pah-pinan iij nok in nesan ok-oke'. 14 Es on nane, on iij ee, Noh! Tabug iij ho mmo'e maan abnao oel anaek mese ampake hau matani'. Ho mmo'e ke'an-ke'an anbi bnaog naan in nanan. Lalit ho mlape kotin ma nanan meki ter. 15 Ho mmo'e bnaog naan in amnanun ee metel natun mese am bo' tenu mteen (133); in meinuan tuuk am tuuk metel bo' nuug am nuug (22); ma in alatan ee metel bo'es am teen (13). 16 Amtefi bnaog naan, ma mupliki ampake hau been pisa'. Mes musona' tefis naan on le' mete steenf es na'ko plikit in fafon. Ho mbati bnaog naan aktuta' teen. Lalit ammo'e nesug mese anbi in abnapan.
17 Mumnau muleko'! Au of usanut uul noe sako' he nalemab niis ale' amonit anbin pah-pinan, tal antee ka tiit tani fa saa' es. 18 Mes Au he 'mo'e lasi manpaa' 'ok ko. Ho of amtaam moi bnaog naan, mok ho feel-anah, ma ho upu' sin.
19-20 Na'ko ale' kanan amonit pah-pinan iij, ho lo he meki mutaam pasan-pasan noi bnaog naan in nanan, mautu he sin anmonin amsa' on le' ho. Sin es le': mu'i aem, kolog, anonok, maut he sin anmonin. 21 Ho lo he mutaam amnahat huma'-huma' moi bnaog naan in nanan noi ki ma noi mu'it een naan amsa'.”
22 Lalit nai Noh anmo'e natuin Uisnenog In a'an ma plenat naan ok-oke.