1-2 Tabug Uisnenog anmo'e mansian, In nmo'e sin natuin In human ma In masan, In mo'et ma In taos. In nmo'e sin atonij ma bifeel. Lalit In anteek sin nak “mansian”, ma In anfeen sin tetus nathoe msa'.

3 Tabug nai Adam in nmoni naan toon natun mese am bo' teen (130), in napeni li'aan monel mese. Li'ana' iij in nausel haa in amaf. Es on naan in nakanab li'ana' naan, nai Set. 4 Lalit nai Adam nmoni fe' toon natun faan (800). In napeni nteni li'aan feto ma li'aan monel. 5 In anmaat tabug in anmoni naan toon natun seo am bo' teen (930).

6 Tabug nai Set anmoni naan toon natun mese am niim (105), in napeni li'aan monel es, es le' nai Enos. 7 Lalit nai Set anmoni fe' toon natun fanu mhiit (807), ma in napeni nteni li'aan feto ma li'aan monel. 8 In anmaat tabug in nmoni naan toon natun seo mbo' es am nuug (912).

9 Tabug nai Enos anmoni naan toon bo' seo (90), in napeni li'aan monel es, es le' nai Kenan. 10 Lalit nai Enos anmoni fe' toon natun fanu mbo' es am niim (815), ma in napeni nteni li'aan feto ma li'aan monel. 11 In anmaat tabug in nmoni naan toon natun seo mniim (905).

12 Tabug nai Kenan anmoni naan toon bo' hiit (70), in napeni li'aan monel es, es le' nai Mahalalel. 13 Lalit nai Kenan nmoni fe' toon natun fanu mbo' haa (840), ma in napeni nteni' li'aan feto ma li'aan monel. 14 In anmaat tabug in nmoni naan toon natun seo mbo'es (910).

15 Tabug nai Mahalalel anmoni naan toon bo' nee mniim (65), in napeni li'aan monel es, es le' nai Yaret. 16 Lalit nai Mahalalel anmoni fe' toon natun fanu mbo' teen (830), ma in napeni nteni li'aan feto ma li'aan monel. 17 In anmaat tabug in nmoni naan toon natun fanu mbo' seo mniim (895).

18 Tabug nai Yaret anmoni naan toon natun mese am bo' nee mnuug (162), in napeni li'aan monel es, es le' nai Henok. 19 Lalit nai Yaret fe' anmoni nteni toon natun faan (800), ma in napeni nteni li'aan feto ma li'aan monel. 20 In anmaat tabug in nmoni naan toon natun seo mbo' nee mnuug (962).

21 Tabug nai Henok anmoni naan toon bo' nee mniim (65), in napeni li'aan monel es, es le' nai Metusalak. 22 Lalit nai Henok in nmoni anmafutu nekaf nok Uisnenog tal antee toon natun tenu nteni. Ma in napeni anteni' li'aan feto ma li'aan monel. 23-24 In anmoni ma anneek mees nok Uisnenog. Tabug in anmoni naan toon natun tenu mbo' nee mniim (365), in ka mamnita' fa, natuin Uisnenog naiti nasaeb ee.

25 Tabug nai Metusalak in anmoni naan toon natun mese mbo' fanu mhiit (187), in napeni li'aan monel es, es le' nai Lamek. 26 Lalit nai Metusalak fe' anmoni nteni toon natun hitu mbo' fanu mnuug (782), ma in napeni nteni li'aan feto ma li'aan monel. 27 In anmaat tabug in nmoni naan toon natun seo mbo' nee mseo (969).

28 Tabug nai Lamek anmoni naan toon natun mese bo' fanu mnuug (182), in napeni li'aan monel es. 29 Nai Lamek nakanab li'ana' naan nai Noh (le' in hanan, on le' kata mese, le' in oten, ‘anfee halinat ma haan maut’), natuin in nak, “Li'ana' iij of anfee halinat ma haan amnaut noi hit neek susal anbi naijaan le' napeni sukat na'ko Uisnenog.” 30 Lalit nai Lamek anmoni fe' toon natun niim am bo' seo mniim (595), ma in napeni nteni li'aan feto ma li'aan monel. 31 In anmaat tabug in nmoni naan toon natun hitu mbo' hitu mhiit (777).