Tabug sin nua sin nanaen on nane, nai Habel atuku' mu'it, ma nai Kain amepu lelel. 3 Tabug mese, nai Kain neki in lelel ee nesan sin abjaan, ma natulu' sin noin UISNENOG. 4 Nai Habel neki in abibi-kase inaf sin aan unu' een amsa'. In nlolo abibi-kasen naan, lalit in nabnono neki sisi 'tulu' alekot noi Uisnenog. Nail niit on nane, UISNENOG anmaliin noi nai Habel in afgua'-tulu' een naan. 5 Mes In ka nlomi fa nai Kain in afgua'-tulu' een naan. Es on naan, nai Kain natoo' anmaat, tal antee in huum puut namneo-namneo.

6 Es on naan UISNENOG naguab nok nai Kain am nak, “Hoi, Kain! Nansaa' am es ho mutoo' on naan? On mee es ho mhuum mpuut on naan? 7 Baat ho mmo'e alekot, Au 'topu ko nok alekot. Mes mumnau, oo! Kalu ho mmo'e le'uf, mo'et naan of neku nafani' ko, on le' meog ee nnuu' he nheke ifog. Es on naan, kalu ho mutenab he mmo'e le'uf, leko nnesi ho mpolin mani tenab naan!”

8 Tabug mese, nai Kain anfuli' nai Habel am nak, “Habel! Uum he nua kit atnao toi lelel.”^a Tabug sin anteen, nok askeken nai Kain antepo niis in olif.

9 Lalit UISNENOG antoti nai Kain am nak, “Hoe, Kain! Ho oli' es mee?”

Nai Kain natael Ee mnak, “Au ka uhinef! Au es ka 'naa' fa in haen-niman!”

10 Lalit Uisnenog naguab am nak, “Nansaa' am es ho mmo'e lasi maufinu on naan? Ho naika mutenab mak ho oli' in naa' ee nmeti nalali anbi naijaan ee nanan. Au 'iit ulali saa' le' ho mmo'el noi ho oli'! 11 Tabug iij, naa' ee nsaen ko. Tabug ho amlolo miis ho oli', naijaan ee anmusi in naa'. Es on nane, naijaan ee ka nfee nteni ko fa in nesan he ho mmoon. 12 Kalu ho mulele, naijaan ee of ka nfee ko fa nesaf saa'-saa'. Anmulai tabug iij, ho of amjali atoebakes le' amtoebake alafgua-lafug anbi pah-pinan ii.”

13 Mes nai Kain naguab neki haan ma'fena' noi UISNENOG am nak, “Hae, Usi'! Nansaa' am es Ho mfee maan kau sukat matani' naan? Au ka 'sutai ube'i je fa! 14 Natuin Ho mli'u mulali kau u'ko balel iij, au of ukloo' a'ko Ko. Au of utgua 'bi meel am meel on le' anao-amnemat. Lalit sekom-sekog le' na'eku nok kau te, of anlolo niis kau.”

15 Mes UISNENOG natael ee mnak, “Ka on nane fa! Sekog es anlolo ko, Au 'hukum ee mafena' nnesi ha'el hiit!” Lalit UISNENOG antao taka' anbi nai Kain, henati' tuaf sekom-sekog le' na'eku nokan, nahinen nak sin ka nabe'i fa he nlolo nisan. 16 Lalit nai Kain annao nasaitan balel naan, naloo' na'ko UISNENOG. In annao ntee balel mese, anbi po'an Eden in pesit manas asaen. Balel naan in kanan, Not, le' in oten ee nak ‘antoebaak’. In natgua anbi naa.

17 Lalit nai Kain anmatsao. In feel na'aap. In nahoni' li'aan moonl es, ma sin nakanab nai Henok. Ma nai Kain nafena' kuan mese. Lalit in nakanab, Henok, on le' in aanh ee kanan. 18 Nai Henok in anah ee, es le' nai Irat. Nai Irat in anah es le' nai Mehujael. Nai Mehujael in anah es le' nai Metusael. Ma nai Metusael in anah es le' nai Lamek.

19 Nai Lamek ansao bifeel nuug. Es kanan bi Ada, es anteni' in kanan bi Sila. 20 Oin Ada nahoni' nai Jabal. In sufan sin anjalin atuku mu'it. Sin amonik een natna-nanin aah, he namin ma'ug noi sin mu'it een. Sin na'umen anbin aah asanel. 21 Nai Jabal in olif ee, nai Jubal. Nai Jubal in sufan sin anjalin atoni alekut, afuu fekug, ma alekut huma' abjaan antein.

22 Nai Lamek in feel bi Sila nahoni' nai Tubal Kain. In sufan sin anjalin atutu besi. Sin anmo'en bale huma'-huma' na'ko besij ma noni molo'. Nai Tubal Kain in fetof bi Na'ama.

23 Tabug mese, nai Lamek anbo'is on anbi in feel sin nua sin. In nak, “Hi mneen lek-leko! Lelon li' mone munif mese anbaan kau, mes au 'baan umatel. 24 Tuaf le' nlolo niis nai Kain napeni hukum nono hiit. Mes kalu nmu'i tuaf le' he nbalas in neek tenab amle'ut noi kau, sin of napenin hukum nono bo' hitu mhiit (77).”

25 Nai Adam in feel bi Hawa nahoni' naan li'aan moonl es anteni'. Sin nakaanb ee, nai Set (le' in oten nak, ‘anfee’) natuin bi Hawa nak, “Uisnenog anfee li'ana' iij noi kau he anseek nai Habel, le' nai Kain anlolo nisan.” 26 Ala loog ate, nai Set anmatsao. In napeni li'aan moonl es, ma in nakanab, nai Enos.

Tabug naan, mansian ee anmulai naluli' ma nabesan noi UISNENOG.