Kais mutuin mo'et ma taos pah-pinan
4
Hi mmatoe ma mmabaan es nok es. In laisn ee saa'? Nane natuin anbi hi sonam ma hi tnaanm eun nane, anmui' tuaf-tuaf le' naim lanan he nhalinab sin tau'k eun kuuk. 2 Hi msinmakan ablua' es, mes hi 'niim eun ka ntian fa he npoe' naan. Nalalit hi neekm eun namenan, ammatoe tal antia hi mloim he mi'maet es ate, ka mimtau fa.Natuin hi ka m'onen, ma ka mtoit fa na'ko Uisneno, etun hi ka mipein ye fa. 3 Maski hi m'onen mifeek hau fatu msa', mes hi ka mipein fa saa' le' hi mtoti ye, natuin hi mtoti mituin ahaa hi tenab le' he minokab hi salit mese'-mese'.
4 Namneo-namneo hi atoin ka a'ki'at ki fa! Hi on le' amafeet le' anmaka'paisa. Kaul hi mituin mo'et ma taos pah-pinan, hi mmoe' hi tau'm eun ammamuus mok Uisneno. Namneo te! 5 Etun Uisneno In Sula Knino' antui ma nak, “Uisneno natuaba' In Ismana Knino' et hit nekak. Es nane te, Smaan Aknino' nane In i'lomin ta'kii' tabaal aah atbi In. Fun In le' nane, atinos.” 6 Antein-teni' te, Uisneno fe' anloim he nfee nathoeb In nekan alekot amsa'. Etun Sula Knino' ntui ma nak:
“Uisneno nlaban tuaf le' na'latan in ta'un,
mes In naklila' In nekan alekot neu tuaf le' neek amnebet.”a
7 Uisneno nane, A'nakaf! On nane te amnona' hi tau'm eun nane meu Ne, he mituin In i'lomin. Hi kais mituin niut amleu't eun sin a'naak a'naet in i'lomin. Amlaban ma'tane' meu in. Nok lanan nane, in of naen nasaitan ki. 8-9 Maim lanan he hi mimnoon ma mmoin nekaf mese' mok Uisneno. Nok lanan nane, In npaumaak ki.
Hoi, mansian amonit anbi lais amle'ut ki! Hi lo he minoon ma mineo hi 'monim. Ma hi le' neek masbake'! Hi lo he mnao mneo' mituin Uisneno, ma kais ampeo' 'lii ma ne'u ntein. Tal antia neno ii, hi 'moinm eun anbin ahaa malinat. On nane te tabu ii, misnaas nai'! Hi mihine mlail mak hi neekm eun masbake', natuin hi saant eun. Leko nneis, hi mtoofn om ma mkae me-me'ul nai'. 10 Kaul hi mihiin namneo-namneo mak, hi ka ma'upa' ki fa mbi Uisneno In human ma In matan, In of nait na'latan ki mfain tuaf-tuaf le' ma'upa' anbi In human ma In matan.
Kais mi'uab mi'le'uf es
11 Au aok-bian aal ki! Kais mi'uab mi'le'uf es nok es. Fun kaul hi mmoe' on nane te, ma hi misaeb sanat piut neu atoni' bian, hi mtanhai milail Uisneno In atolan le' nak, “Ho lo he mneek ho aom-bian, paap mese' on le' ho mneek ho tau'm aa kuum.” Ma kaul hi ka mituin fa atolan nane, hi mi'latan amlail hi tau'm eun anneis na'ko Uisneno In Atolan. 12 Uisneno neikn On es nahakeb Atolan nane. On nane te In es le' anmui' hak he nafeek hit lasin. In neikn On es anmui' hak he nsoi nafetin kit, ai' anhukun na'maet kit. Hi ka mmui' fa hak he mifeek atoni' sin lasin, ai' mi'uab mi'leuf biak eun sin kanan alekot.
Kais mifeefb om
13 On ii! Hi lo he mihiin, he kais mi'uab am mak, “Neno ii, ai' noka', hai he mnao meu koot naa! Hai he mnao mitua maan on le' toon es. Ma hai he mi'sosa' he miis maan akle'o!” 14 Ho muhiin saa' le' noka' ma nmeu te he nlail? Ka tiit tain fa tuaf es, le' nahiin nain in moint aa on le' mee. Mansian aa 'monin on le' nipu', le' mamnita' labah, nalalit namneuk.b 15 Leko nneis hi mi'uab am mak, “Kaul Uisneno nneek kit, maut he hit tmoin. Ma kaul Uisneno nlomi te, maut he hit tabe'i tmoe' ii.” 16 Natuin kaul hi ka mi'uab fa on le' nane, hi ala mifeefb om aah. Nane on le' hi mnikan main Uisneno nbi hi teenb enu. Nane sanat a'naek!
17 Mimnau milek-leko'! Tuaf le' nahine nlail saa' es le' namneo, mes ka nmoe' natuin fa on nane, nane on le' in nmo'e nsaan anlali msa'.