2 Hit aal kit ta'uab atsaan huma'-huma'. Mes tuaf le' nabei' nafleu naan in fefan, in nabe'i n'atol in ta'un aa msa'. 3 Tait i'leta' na'ko bikase. Hit tabe'i t'atol bikase' he natuin hit i'lomik, attekal ahaa in ifleu. 4 A'leta' bian na'ko abnao oe. Anin a'naek nane anfuu bnao oe neu-mneem natuin in i'lomin. Maski fenut aan'-aan' aah, mes in nabe'i n'atol naan abnao oe nane in i'naon, natuin anaa' abnao nane in i'lomin. 5 On nane amsa', hit fefak. Fefak le' ii, aan'-ana'. Mes in meupn eun, maneun le'uf!^a

Nane on le' sapa'liuf aan' es, le' nabei' nout naleu' nasi 'naek es. 6 Fefaf nane, on le' ai pinan annuan on. Hit tabe'i tpaek hit fefak he taleu' ale' kanan lasi. Hit fefak ii nabei' naleu' hit i'monik no teem-teme'. Lais amle'ut amfaun anbi pah-pinan ii, anpoin na'ko mansian in fefan. Ma niut amleu't eun sin a'naak anesit amsa', anpaek mansian in fefan he nanaob in mepun.

7 Mansian nabe'i nheek mui' fui, nalalit namausab sin he nfanin mui' aem. On le': kaun anonok, kolon, ma ika' abiit tasi nanan. 8 Mes fe' ka nmui' fa tuaf es le' n'atol naan in fefan. Natuin fefaf nane, blua' amleu't es, le' ka t'atol taan ee fa. In on le' laso le' anonos nain hit aok aa, tal antia tmaet.

9-10 Nok fefaf mese', hit tpules ma ta'akan ok. Nane ka leko fa! Hit tpaek hit fefak he pules Ama' Uisneno. Nalalit nok fefaf le' nane amsa', hit ta'akan hit aok-bian, le' Uisneno nmo'e ye natuin In human ma In masan. On mee m'es on le' nane?^b

11 Ka neu fa he oe mata' mese' npulan napoitan oe miin leko ma miin mali. 12 Ka neu fa he manus nafua okan! Ma ka neu fa he pena' napuin anggur! Fun tlaef es lo he nafua ma nanees natuin in lisan.^c Paap mese' on le' hit ka tabei' fa he tkui oe leko na'ko niuf miin mali.

13 Atoni' le' nahiin lasi natuin Uisneno In hinet, kais ankee yon ma kais na'naeb in ta'un. Fun in nahiin nak, in hinet nane na'uu' na'ko Uisneno. Maut he in naklila' in mahinen nane anbi 'monit amneot. 14-15 Kaul ho mneek meen meu tuaf es, ai' mumofu tuaf es he ho mseka', kais ammoe' yom mak ho atoin ahiin lais leko ko! Nane, ho mupoib om. Fun 'monit on le' nane ka natai fa nok ‘atoni ahiin lais leko’. Neek menas, ai' mumofu tuaf, ka na'uu' fa na'ko Uisneno. Nane, atoni' pah-pinan in amneikin. Nane msa' natai nok tuaf-tuaf le' ka nnona' fa sin tau'k eun neu Uisneno. Moe't eun nane, natuin niut amleu't eun sin lanan. 16 Fun kaul anmui' neek menas neu es, ai' ammamoufun, of anmui' taisibu huma'-huma', ma mansian anmo'en maufinu huma'-huma'.

17 Mes lais hinet le' na'uu' na'ko Uisneno, es le' ii: nahunu te in nmoe' kit he tmoni knino'. Nalalit in anfee kit neek mamut es nok es, ta'baun ok tahiin, talan piut, ma neek tainine'. In nesan amsa' anmoe' hit neek aa leko, tloim he tmabaab ma tultakun, tataiba' tahiin lasi, ma ka tmoe' fa koti ma maat teu biak eun. 18 Ma tuaf le' naklila' laan mamut of napein in upan alekot. Nane on le' atoni' nseen fini, namuni te in napein nafani' in nesan alekot.