Hi mepun ambi pah-pinan ii, es ala haa he miminab hi tau'm eun meik lais malinat pah-pinan. Hi on le' biye paoln es, le' ala nahiin he naah aah, le' antia in taubn ate, anlolo. Hi mhukun ma mi'maet atoin lekon, le' ka napenin fa sona' he namneob ok anbin hi humam ma hi matam.

Atoin amui't eun! Leko nneis, amkae mme-me'ul nai'! Fun ma'ne'at huma'-huma' of lo he nsaen ki. Hi 'mui'm eun anmulai namleu'n een. Ma hi paken amasat sin, aap-apu' of neuk naan sin. Hi noni mnatu' ma noin muti' sin ka ma'uup eun fa yen. Ma sin of naah nafani' ki, on le' ai nout hau meto'. On mee m'es pah-pinan ii he namsoup wen, mes hi fe' amtaisiub he mibuab ablua 'maten? Hi 'mui'm eun of anlalin bukti nak, hi ka mihiin fa mee es le' ma'upa' anbi Uisneno In human ma In matan.^b

7 Au aok-bian aal ki! Hi lo he malan ambi hatas-paot tal Usi' ankoen On anfain neem. Amkius kiim atoof lene le' anpao nok amnalan neu in lene afan. Ulan ahunut anmouf, nalalit in nseen. Nalalit in anpao ntein ulan le' namliaba' ma naspetib in tlaef enu. Ka 'loo fa te, nasufan ma nafuan. Ma in taubn aa ntia te, tuaf nane annao nseki ma noun. 8 Hi lo he malan on le' nane msa'. Mimepan hi tau'm eun, natuin ka 'loo fa yen ate, Usi' ankoen On anfain neem!

9 Au aok-bian aal ki! Kais ammaka'munu'. Sekau he mmaka'munu', mmaka'munu' piut. Maut he Uisneno of es anhukun ki! Amkius kiim! Fun Afeek Lasi sonaf neno tunan, anhake nlail et hi maatm eun nane.

10 Au aok-bian aal ki! Mituin a'leta' na'ko Uisneno In mafefa knino' sin. Maski sin napenin suset ma neek a'lenat huma'-huma', mes sin naaln eun aah. 11 Kaul anmui' tuaf le' nabei' nalan anbi suset ma neek a'lenat, hit tloim he tpules ta'naeb in kanan. On le' nai' Ayup. In napein suset huma'-huma', mes in nalan ma'tane'. Nalalit Uisneno nekan anmouf neu ne, oka te In nmulai n'atol neu na' Ayup saa'-saa' le' leko. Uisneno nmoe' on nane, natuin In Amanekat ma Amahoet.^c

12 Au aok-bian aal ki! Hi kais mait supat. Kaul hi he mak, “he”, mitaah mak “he” aah. Kaul hi he mak, “kahaf”, mitaah mak, “kahaf”. On le' nane te, noob aah. Kais minesib he mait lais supat amteek niutn aa et pah-pinan. Ai' mait supat mak, “anbi Uisneno In kanan” le' anmoin et sonaf neno tunan. Ka nmui' fa upan saa'-saa' kaul mait supat huma'-huma'. Natuin kaul on nane te, of amsium main ho hukun, natuin ho lais supat sin.^d

13 Kaul anmui' tuaf na'ko ki napein suset, leko nneis in n'onen. Ma kaul anmui' tuaf anmaliin, leko nneis in nsii ma npules Uisneno. 14 Kaul anmui' tuaf na'ko ki napein menas, leko nneis mi'auba' amepu klei nuu, ma mtoit sin he mkoes mina' neu amenat nane, ma n'oen eun neik Uisneno In kanan, maut he Uisneno naleko' amenat nane.^e 15 On nane te kaul hi m'onen amenat, ma mpalsai namneo-namneo meu Uisneno, Uisneno of naleko' amenat nane. Kaul amenat nane anmo'e nsaan, Uisneno of annoes nain in saant enu. 16 Kaul na'ko ki ammo'e msaan, hi lo he mmanauk sanat es nok es. Nok lanan nane, hi m'onen es nok es, he hi mlail leko.

Tuaf le' in nekan aknino' ma namneo, in n'onen naheun nok kuasat ma'tane', ma nabei' napein in nesan. 17 Tait i'leta' na'ko nai' Elia. In mansian on le' hit imsa'. Mes tabu in n'onen he kais na'uul antein, ulan nane nasnaas nain, ma ka nmouf niit fa tal antia toon teun ma stena'.^f 18 Nalalit in n'onen he ntoit ulan, ma ulan nane nmouf nain tabu nane. Huun eun napolon ma nnoo maten, ma sekit mnonut amsa'.^g

19 Au aok-bian aal ki! Kaul anmui' tuaf na'ko ki le' anmo'e nsaan ma nasaitan saa'-saa' le' namneo, nalalit anmui' tuaf le' nbaba ma ntuntaku he nfain neem neu Uisneno In laan amneot, nane leko. 20 Mimnau milek-leko'! Kaul hi mtulun tuaf le' anmo'e nsaan, he in nfain neem neu Uisneno, ma in na'piis, hi msoi maan ee, maut he in nmoin piut nok Uisneno. Nok lanan nane, Uisneno nnoes nain in saant eun le' amfaun nane.^h

On le' nane, pah.