Kais ambeit humaf mak, a'naet ai' a'baut
2
Au aok-bian aal ki! On mee m'es hi mibei' mak hi mpalsai Yesus Kristus, hit Usi' le' apinat ma aklahat' nane, kaul hi mpiil humaf? Kais on nane! 2 Kal-kaul anmui' tuaf nua' antaman neu hi uim onen. Tuaf es anpaek tai alimat, ma naklein kleni mnatu' naheun in iklulun. Tuaf es antein anpaek tai kloef. 3 Nalalit hi mtaisiub ma mtook meu apaek tai alimat, he mfee ne 'took alekot ambi maat. Mes apaek tai kloef nane, hi mlenu mmak, “Amhake mbi kotin naa! Kaah fa te, amtook meu afu!” 4 Nok lanan hi mpiil humaf nane, hi on le' afeek lasi le' ka natai fa. Salit amle'ut, es le' nafleu ki.5 Au aok-bian manekat aal ki! Uisneno anpiil naan atoin a'baut anbi pah-pinan ii, he sin anpalsain ma'tane' neu Ne, on le' anbin sin neek eun anmu'i 'mu'if. Ma In anpiil sin amsa', he sin napenin paa' ma nama' et Uisneno In sonaf neno tunan, le' In nba'an he nfee ye neu tuaf-tuaf le' anneek Ee. 6 Mes nok lanan hi mpiil humaf on le' nane, hi mmoe' he mi'baun atoin a'baut eun. Te kahaf, sin ka nmo'en fa maufinu saa'-saa' neu ki. Hi mniikn aa? Atoin amui't eun es le' nasuseb niis ki. Ma sin es le' naim lasi huma'-huma', ma nheel anfonat ki meu ume feek lasi. Sin es le' anpaal minan, te hi mpaal a'ka'in. 7 Hi le' nane Usif Yesus In fomili sin. Mes atoin amui't eun, sin es le' na'uab na'le'uf Usif Yesus In kanan alekot. On mee m'es hi maen mituin sin?
8 In i'lekon, hi mmoe' mituin Uisneno In atolan es, le' ma'tane' nneis nak, “Ho lo he mneek ho aom-bian sin, namnees on le' ho mneek ho ta'um.” Atolan nane matui et Uisneno In Sula Knino'.a 9 Mes kaul hi mpiil humaf, ma mhaliin ahaa atoni amui't eun sin neek eun, nane amtanhai milail Uisneno In atolan. Natuin Uisneno In atolan hukun ate, hi msaan amlail. 10 Tuaf le' anmoe' natuin Uisneno In atolan hukun sin ok-oke', kaul in antanhai mese yah, nane paap mese' on le' in antanhai nain sin ok-oke'. 11 Uisneno anfee nlali plenat am nak, “Kais amtuup mibua' kaul ka ho fee ma ho mone fa.” In anfee plenat bian amsa' nak, “Kais mi'maet atoni'.” Es nane te kaul hi ka mtuup mibua' fa, mes hi mi'maet atoni', nane hi mtanhai milail Uisneno In atolan hukun.b
12 On nane te kaul hi mloim he mi'uab, ai' he mmoe' lasi yes, hi lo he mimnau mak: Uisneno of es nafeek kaul hit tmoe' tatuin In atolan he tmaneek es nok es, ai' kahaf. Fun atolan nane nabei' nafetin kit na'ko In hukun. 13 Natuin Uisneno ka nkasian fa tuaf le' ka nmui' fa lais kasian neu tuaf bian sin. Mes kaul hi mmui' lais kasian meu tuaf bian, Uisneno of anmui' lais kasian neu ki msa'. Hi kais mimtau mak hi of mipein Uisneno In hukun, natuin In nso'i nlail hi lais kasian eun.
Kaul hit tpalsai namneo-namneo teu Uisneno, hit mes he tmoe' tatuin In A'an ma Plenat
14 Au aok-bian aal ki! Kaul anmui' tuaf nak in npalsai Uisneno, mes ka nmoe' fa saa'-saa' he naklila' in lais palsait, nane ka ma'upa' fa. Lais palsait on le' nane, ka neik ye fa neu lasi 'honis. 15 Kaul anmui' atoni' ai' bifee le' anpaluu namneo-namneo, on le' ka nmui' fa paken, ai' ka nmui' fa mnahat. 16 Ma hi ala mak, “Amnao lek-leok! Maut he Uisneno es anfee ko tetus-athoes. Kais anin antaman ko! Kais mumnaah ammaet!” Uab eun nane ka ma'uup eun fa, kaul hi ka mitoon' fa lais babat tuntakus meu sin.
17 On nane te ka nanookb on fa, kaul ho mak, ho mpalsai yah! Kaul ho mpalsai yah, mes ka mmoe' mutuin fa ho lais palsait nane, in ka ntaam fa ‘lais palsait’ antein. Kaul on nane te, in on le' lais palsait le' anmate nlail, ma ka ma'upa' fa saa'-saa'.
18 Anmui' tuaf bian nabei' na'uab ma nak, “Tuaf es nabe'i npalsai yah neu Uisneno, mes ka nmoe' fa lais leko. Tuaf es antein nabe'i nmoe' lais leko, mes ka neik fa Uisneno In kanan.” Mes in laisn aa on ii: bukti na'ko ho lais palsait nane, es le' ho mmoe' lais leko. Mes kaul ho ka mmoe' fa lais leko, au ka ubei' fa he 'iit bukti na'ko ho lais palsait nane. Au ubei' uklila' au lais palsait natuin lanan au 'moe' lais leko. 19-20 Ho mutuin noina' le' nak, “Uisneno nane, In mese' kuun. Ka nmu'i ntein fa bian.” Leko msa'! Mes niut amleu't eun sin leko nneis na'ko ko, natuin sin npalsain on le' nane amsa', tal antia sin namtau nmaten. On nane te kais mitenab mak, mihiin meik hi loenm eun ate, nanookb on. Kaah fa, pah!
Nane, mono! Kaul lais palsait aa ka manesa' fa, lais palsait nane ka ma'upa' fa msa'.
21 Tait i'leta' ta'ko nai' Abraham. Neno nane, in nmoe' natuin saa' le' Uisneno naplenat, ma neik in anah na' Isak he na'tulu' neu Uisneno nbi mei 'tulu'. Es nane te, Uisneno nak, “Na' Abraham anmoe' namneo wen!”c 22 Na' Abraham anpalsai namneo, tal antia in nmoe' natuin Uisneno In iplenat nane. Nok lanan nane hit tahiin tak, in npalsai nok neek akbubu' neu Uisneno, fun in nmoe' natuin In iplenat. 23 On nane te lasin le' ii on le' matui et Sula Knino' le' nak, “Na' Abraham anpalsai Uisneno, nalalit Uisneno ansimo nfani atoni neek amneot.” Ma matui' amsa' ma nak, “Na' Abraham nane, Uisneno In soob leko.”d
24 Laisn aa naknino' een, ai' kahaf? Hit tahiin tak, Uisneno ansium mansian kaul in lais palsait neu Uisneno nane, es le' anmo'e ye ma anloim he nmoe' lais leko. Palsait ahaa te, ka nanookb on fa.
25 A'leta' bian es le' bi Rahap, bifee a'onit tabu unu'. Tabu atoni Yerikos sin naim he nlool na'maet atoni Israelas sin a'meo eun ate, bi Rahap na'tolo' sin. Nalalit in nleun sin he naen anpoin anpi'on laan a'teta', he atoin eun kais anheek sin. On nane te Uisneno ansium bi Rahap anfani bifee neek amneot, natuin in nmoe' lais leko nane.e
26 Lais palsait le' ka manesa' fa, paap mese' on le' aof le' ka masnasa fa, es le' amates. On nane amsa', kaul anmui' tuaf nak in anpalsai Uisneno, mes ka nmoe' fa lais leko, in napoib on! Nane, lais palsait le' ka nmoin fa yen.