Na' Yakop an'eut neu in aanh enu, es-es ate nok in i'monin anbi neon amnemat
49
Nalalit na' Yakop anleun he nboin in aanh eun ok-oke'. Sin neman ntian ate, in na'uab ma nak, “Hi eim ampaumak-maak kau fe'. Au he 'eut ki es-es ate hi 'monim anbi neon amnemat.” 2 Nalalit na' Yakop anmulai na'uab ma n'eut nain neu in aanh enu ma nak,“Hoe, Yakop aanh eun ki! Hi mkoen om eim nai' ma mhake mfuun maan kau.
Amtakan hi luikm enu he mneen ma mitniin hi ama' Israel in uaban ma in a'an.
3 Neu ko, aam Ruben. Ho le' ii, aan mone 'nae, asoitan eno'. Ho mfain on le' au teas ma au 'nimak a'ne'u. Ale' tuaf antola' ko'. 4 Mes fe'-fe' ate ho neek maan na'oina'. Ho lomim ka nhake nki'af, on le' noe sako' le' ka t'eek taan ee fa'. Nok askeken, ho mnao ma mtuup mok au fee bi Bilha, ma mha'niis ho ama' in hala tupa. Es nane te ho paa' le' amfain on a'naet ma mone 'nae ka mateka' fa yen!
5 Na' Simeon ma na' Lewi! Hi nua ki moe't ee mese'. Atteek ahaa besi ma benas ate, hi nua ki manoem eun kah een. Etun hi mha'mui' ma misusab too mfaun. 6 Hi mmaliin ammaet, kaul hi m'oet mifeek biya nuu sin pii oetk enu, tal antia sin ntoebilun nabala haa sin baalk enu. Hi 'moe'm eun maufinu namneo-namneo'. Kaul hi meuk hi niism enu, hi mlool miis atoni. Au ka' loim he 'ok a'seol fa hi lasi. 7 On nane te tabu ii, au 'kaas hi neek mapuut eun nane, natuin hi mapuut leu'f eun ki! Ma hi too's eun nane ka mpaek fa lais kasian akle'o msa'. Hi mes misaah kiim hi 'moe' amleu't enu. Uisneno of anpolin nsisana' hi sufam ma hi kau'm enu. Sin of natuan anbin ale' bale anbin pah Israel.
8 Neu ko, aam Yahuda. Ho kanam nane, in otan nak ‘pules ma liatas’. Ho oli' ma ho tata' sin of anpules ko ma antola' ko. Ho of miis ho musu sin, tal antia sin ka nabei' na'aiti' fa sin i'naak enu. 9 Ho le' ii, on le' meo aus tipu' ma'tane es, le' naim kuun amnahat. Ho on le' meo aus mone le' anbino won ma neun in aon ee he ntuup. Ka tiit fa es, le' anbalain he noik ko. Ho on le' meo aus einaf amsa' le' anpao in anah; ka tiit fa es anbalain he na'koke' ye. Ho on ko le' nane msa'. Atoin eun of anti'as ko, ma sin ka nabei' fa he nmo'en bute-bute. 10 Ho of es amnaa' aplenat. Ho sufam ma ho ka'um of annaa' aplenat anmaka'tui' eun, tal antia tuaf es, le' in nmui' paa' anneis-neis. In of es antook ma nnaa' aplenat nane. Nalalit too na'kon uuf-uuf sin of na'luil eun ma na'besan neun. 11 Ho of ammoin nok neek malinat. Ho mloim saa'-saa' aah ate, of anmui'. Ho he mmoe' saa amsa' of anlail. On nane te ho mui't eun, nok ho lene neesk eun of amfaun ma anho-hoen. 12 Ho mnaaht aa mes namiin ka natfeek fa.
13 Neu ko, aam Sebulon. Ho nain pusaak of manua 'naek ma npaumaak tasi, tal antia nmanaak nok koot Sidon. Abnao nuu neman na'kon mee'-mee' ma nasanut sin bonit sin anbin ho tasi in ninen nok mamut.
14-15 Neu ko, aam Isaskar. Ho le' ii on le' bikase es, le' anteek ate, keledai ma'tane. Mes ho 'naak fautm ee kah een. Kaul ho mtuup ambi lana tnanan,a sekau es le' he npoo' ko he mnao mfiin. Mes kaul ho miit kuan es in i'leokn ee et ninen, es ka nleun ko fa msa' ate, ho mait ho blua' ma mloi sin ma mnao meun. Ho on ko le' nane nai'!
16 Neu ko, aam Dan. Ho kanam nane, in otan nak, ‘afeek lasi’. Ho mok ho sufam ma ho ka'um of amfain afeek lasi meu hi pah Israel sin, sin lasin. Hi mifeek lasi te, natai ma ka mpiil fa humaf. 17 Ho hiinm ee on le' kaun alaut le' antuup ma npao anbi lanan ninen. Kaul atoni ansae bikase ma npiu' nane te, nok askeken, ho mlau maan bikase nane in haen tikan, tal antia in tuan nane anmouf.
18 Koi, UISNENO! Au 'on-'onen he Ho mfee 'honis meu kai ok-oke'.
19 Neu ko, aam Gat. Ho kaanm ee atneen ate, in hanan on le' ‘antumatan musu’. Teku of antumatan ko, mes ho of antumatan seon banin sin, ma miis sin.
20 Neu ko, aam Aser. Ho lene ma po'an sin neesk eun es eun le' leko nnes-nesin. Ho of ammoe' kokis aminat huma'-huma' le' ma'upa, he uisf eun neman ma nsosan na'kon ko'.
21 Neu ko, aam Naftali. Ho on le' luus einaf, le' naen ma nfui nmaet. Es ka nabei' fa he n'atol ko. Ho muhoin maan ho aanh enu, maas leu'f eun.
22 Neu ko, aam Yusuf. Ho on le' hau mafua makuke' le' anmoni npaumaak oe mata'. In itlaen eun of annoonk eun ansaen neun lame mnanu',b on le' ho sufam ma ho ka'um annaon neun ale' bale. 23 Anmui' tuaf bian le' nasaeb sin neek meens eun neu ko, on le' musu le' naklao ko. 24 Mes Uisneno le' au u'bees 'eu Ne, antulun ma nbaab ko'. Es nane te, In anmoe' ho 'nimam nane nabei', tal antia ho mubei' ma muklao mseun banin meu ho musun nane, maski na'loo. Ho of miis sin, natuin Uisneno es antulun ma nbaab ko. Namneo In kuasat ma'tane! Etun au u'peis yok 'eu Ne. Natuin In es anpanat ma npao kau. 25 In of anpanat ko msa', ma nfee ko tetus-athoes huma'-huma'. Es eun le': tetus na'ko neno tunan, ma na'ko pah-pinan, ma ho aan honi sin amfaun ma n'ao-minan. 26 A'tubu' sin ka namnekun fa. Tetus le' au a'fee ye 'eu ko le' ii, anneis na'ko a'tuubn aa ok-oke! Maut he tetus sin le' ii ansain piut neu ko, natuin ho mneis mu'ko ho oli' ma ho tata' sin ok-oke'.
27 Neu ko, aam Benyamin. Ho balainm ee on le' aus fui 'naek le' namnaah. Fe' nok-nok ana' amsa', in nheek naan in imnahat. Mes kalu nfai te, in annao ma nbati mnaah nesif nane neu in aanh enu. Ho sufam ma ho ka'um of ma'taenk enu on le' nane msa'!”
28 Uab eun le' ii, na' Yakop in uab eun neu in aanh enu. In an'etun sin, es-es ate nok in i'monin, nok in sufan ma in ka'un anbi neon amnemat. Sin aal sin le' nane, es le' anlalin aam uuf neun uuf bo'es am nua anbin pah Israel.
Na' Yakop anmaet
29-30 Nalalit na' Yakop antoit in aanh enu he nmo'en lais manba'an. In na'uab ma nak, “Ka 'loo fa yen ate, au he 'maet een. Kaul au 'maet, hi lo he mnao msuub kau meu nai' na' Abraham in nopu. Nopu nane et nuat anpaumaak kuan Makpela ma kuan Mamre et pah Kana'an. Nahunu te, nai' na' Abraham ansoos nuat nane nok lene ma po'an nane he nlail in bael subat. In nsoos nafeek ee na'ko atoin Hetes es, kanan na' Efron. 31 Anbi nane, sin nsuub hit nai' na' Abraham, ma hit bei' bi Sara, au ama' na' Isak, ma au eina' bi Ripka. On nane te hi lo mees amsuub kau ambi nane, a'bi au fee bi Lea in aon bian. 32 Mimnau! Hi kais amnikan he msuub kau ambi nuat le' nai' na' Abraham ansoos ee le' nane.”
33 Na' Yakop na'uab anlail on nane te, in ntuup anfain neu hala' tupa' ma in inmaet.