Na' Yakop antoit tetus-athoes neu na' Yusuf in aanh enu
48
Ka 'loo fa na'ko tabu nane te, na' Yusuf napein hanaf nak, in amaf nameen a'naek. On nane te in nok in aan moen nua' eun nane, es eun le' na' Manase ma na' Efraim, ma sin annaon ankius sin na'if na' Yakop. 2 Tabu na' Yakop nahiin nak na' Yusuf neem een ate, in anleen on he ntoko nbi hala' tupa'.3 On nane te in na'uab neu na' Yusuf ma nak, “Usu! Afi naa, Uisneno le' Akuasat Afiin-finit nane, nakliil' On neu kau anbi kuan Lus, et pah Kana'an. Anbi nane, In nba'an neu kau, 4 ma nak, ‘Au of umfauba' ho anah ma ho upu' sin he nlail too mfau-le'uf. Au of a'feen sin bale le' ii msa', he nlail sin nain pusaak tal antia nabal-baal.’
5 On nane te tabu ii ho anah na' Efraim ma na' Manase, sin paa' eun es le' ii: au 'oum 'eu pah Masir ii te, sin nua sin anbi nanin ii. Maski on nane msa', tabu ii, au ubai sin on le' au aanh enu waa kuuk, on le' na' Ruben ma na' Simeon. 6 Mes kaul ho muhoni mteni' te, na' ho anah. Au ka ubai fa sin on au aanh enu. On nane te maut he sin ansium sin pusaak eun na'kon sin taatf eun, na' Efraim ma na' Manase. 7 Au 'moe on le' nane, he umnau ho eina' bi Rahel. Tabu hit tfain teem ta'ko pah Mesopotamia teu pah Kana'an ate, ho eina' anmaet anbi lana tnanan anbi lanan le' anpaumaak kuan Efrata et pah Kana'an. Tabu nane, au 'suse 'maet! On nane te au 'suub ee et lanan ninen le' he ttaam teu kuan Efrata nane.” (Tabu ii, kuan le' nane, sin nakanab Betlehem.)
8 Na' Yakopa na'uab nalail on nane te, in na'aiti' matan ma nkius niit na' Yusuf in aan mone sin. On nane te in nataan na' Yusuf ma nak, “Hoe, sekau aanh eun es eun le' ii?”
9 On nane te na' Yusuf nataah ma nak, “Li'aan eun le' ii, Uisneno es anfee sin neu kau anbi pah Masir ii.”
Nalalit na' Yakop na'uab ma nak, “Kaul on nane te, ampaumakab kau sin, he au 'onen ma 'toit Uisneno he nfeen sin tetus.” 10 Na' Yakop namnais niis een. In maatn enu anfolon. Etun in ka niit fa leko. On nane te na' Yusuf nok in aanh eun nane anpaumaak na' Yakop. Nalalit na' Yakop anhoo ma nneek sin. 11 Nalalit in na'uab neu na' Yusuf ma nak, “A'loo-'loo le' ii, au uten-teenb aah, 'ak au ka neu he u'euk 'ok ko fa yen. Mes tabu ii, Uisneno nmo'e nneisi ntein, tal antia au fe' ubei' he 'iit ho aanh enu.”
12 Nalalit na' Yusuf na'loba' in aanh eun na'ko na' Yakop.b In nli'tuu ma na'luli' tal antia in nneek nain anbi in amaf in matan. 13 Nalalit na' Yusuf anfeen. On nane te in nahakeb in aanh eun anpaumak-maak in amaf. In nahakeb in aan mone 'nae anbi na' Yakop in i'niman a'ne'u. On nane te, aan mone kliko' anbi na' Yakop in i'niman a'lii'. 14 Mes tabu na' Yakop he ntao in i'niimn eun he ntoit Uisneno he nfeen sin tetus-athoes neu sin nua sin, in nkasulib in i'niimn enu. In ntao in i'niman a'ne'u neu kliko' na' Efraim in fufun ma in ntao in i'niman a'lii' neu a'naet na' Manase in fufun. 15 Nalalit in n'onen ma ntoit Uisneno he nfeen na' Yusuf tetus-athoes ma nak,
“Ho nai' Abraham,
ma ho nai' Isak,
sin nua sin natuin Uisneno In i'lomin piut-piut.
Uisneno kuun es le' anpaloil ma mpanat kau anmulai na'ko tabu au munif tal antia tabu ii.
16 In kuun es le' ansoi naan kau na'ko snama' huma'-huma'.c
On nane te au 'toti he In nfee tetus-athoes neu li'aan eun le' ii ma sin suufk enu.
On nane te kaul sin n'oen eun neun Uisneno,
sin ka nnikan fa he nteek nai' na' Abraham, nai' na' Isak, ma au kanak.
Maut he sin hoint eun nasufan piut,
he nlalin too mfau-le'uf anbin pah-pinan ii.”
17 Mes tabu na' Yusuf niit in amaf antao in i'niman a'ne'u anbi kliko' na' Efraim in fufun nane te, in nait na'oina' in aamf ee 'niman nane, ma ntao neu a'naet na' Manase in fufun. 18 In na'uab neu in amaf ma nak, “Aam honi, kais on nane. Na' Efraim in aan mone 'kliko'. In ka aan mone 'nae' fa'. Ho mes he mtao ho 'nimam nane meu a'naet na' Manase in fufun. Natuin a'naet ee in paa' nane, es le' nane.”
19 Mes in amaf na' Yakop ka nloim fa'. In nak, “Usu. Au uhiin 'ain. Na' Manase of anfain atoin ma'tane', ma in sufan amsa' of anlalin too pah a'naek es. Mes in olif na' Efraim nane, of ma'tane' anneis na'kon. In sufan of amfau le'uf, tal antia sin nlalin too pah amfaun le' ma'taen le'uf.”
20 Nalalit in an'eut neu li'aan nua' eun nane ma nak, “Of kaul atoni Israelas sin antotin neun Uisneno he nfeen sin tetus neu tuaf-tuaf ate, sin of anteek hi nua ki hi kaanm eun nane. Sin of antotin ma nak, ‘Kaul leko te, Uisneno nfee tetus neu ko, nahuum on le' In anfee tetus neu na' Efraim ma na' Manase.”’
Nok lanan nane, na' Yakop amsa' anteek nahunun na' Efraim in kanan na'ko na' Manase in kanan.
21 Nalalit na' Yakop na'uab neu na' Yusuf ma nak, “Usu! Ka 'loo fa te, au he 'mate een. Mes Uisneno of antulun ma nbaab ki, on nane te In mes neik ki mfain meu hi nai' ma hi bei' sin pah. 22 Mes tabu ii, au 'fee ko nneis na'ko ho inin. Au 'fee 'tein ko 'tubu et pah Kana'an le' nahunu te au usiik 'aan ee 'eik au suni' ma au kenat u'ko atoin Amoris sin.”