Na' Yusuf in fomili sin napenin nain na'ko kesel pah Masir
47
1-2 Nalalit na' Yusuf nok in tataf tuaf niim, annaon he nbaiseun kesel. Na' Yusuf na'ekub ma natefab sin nok kesel. In na'uab ma nak, “Aam usi'! Au ama' ma au oli' ma au tata' sin neman ntia nlalin na'kon pah Kana'an. Sin neman neik sin mui't enu ma sin i'maus eun ok-oke'. Tabu ii sin et eun pah Gosen.” 3 Nalalit kesel nataan ma nak, “Hi mepu sin es le' saa?”
On nane te, sin nataah ma nak, “Hai le' ii atukus kai, on le' hai nai' ma hai bei' sin. 4 Tabu ii, pah Kana'an nafaok-nai' 'naek, tal antia ka tiit fa mnahat ma huun antein. Etun hai eim meu pah le' ii he mitua mtahan. Hai meik hai mui't eun amsa'. On nane te tabu ii, hai mbaiseun ko usi', mufetin kai he hai mitua ambi pah Gosen, he hai mituuk hai mui't eun anbin nane.”
5 Nalalit kesel an'eut in i'lomin neu na' Yusuf ma nak, “Tabu ii, ho ama' ma ho inin sin et eun ii. 6 On nane te sin napenin sona' he sin natuan anbin ii on le' sin pah a'kuuk. Au hiint aa te, pah Gosen nane, bale le' naleko nneis anbi pah le' ii. On nane te leko nneis sin natuan anbin le' nane. Ma kaul sin natuuk mu'it am leko te, maut he sin natuuk au nuu msa' anbin nane.”
7 Nalalit na' Yusuf na'ekub ma natefab in amaf nok kesel. On nane te na' Yakop an'onen he Uisneno anfee tetus neu kesel nane.
8 On nane te kesel nataan ma nak, “Aam, ho mmoin maan toon fauk een?”
9 Na' Yakop nataah ma nak, “Au 'moin 'aan toon nautn es am bo' teun, mes au ka utua ubaal 'iit fa fe' 'bi bale yes. Au nai' ma au bei' sin on nane msa'. Kaul au he utaib ok 'ok sin ite, au toon monit fe' ka mfaun fa. Mes naheun nok suset manukat.” 10 On nane te na' Yakop antoti ntein Uisneno he nfee tetus-athoes neu kesel pah Masir nane. Oka te sin nbaisenun ma nheel ok na'ko kesel in matan, ma annaon nfanin.
11 Nalalit na' Yusuf natuin kesel in kabin, on nane te in nluul bale neu sin anbi pah Gosen. Nain bale nane, amlian ee kah. (Sin nakanab bale nane anbi neon amunit nak, ‘Rameses’.) On nane te na' Yusuf in amaf, in olif ma in tataf sin natua nabalan anbin bale nane. 12 Nalalit na' Yusuf nataah ma naloitan amnahat neu in amaf, in olif ma in tataf sin nok sin fee ma sin anah sin, na'ko a'naet tal antia a'baut enu.
Amnaahs ee manenu' antein anbi pah Masir
13 Anbi tabu nane, ka tiit tain fa mnahat anbi mee-mee. Amnaahs ee antaman kuan ma bale, koot ma pah. Na'ko pah Masir antia pah Kana'an mansian eun an'ole' nmaten. Sin ka nabe'in fa he nmo'en saa'-saa', natuin sin namnahan nmaten. 14 Nalalit too mfaun sin neman na'kon bale-bale neun pah Masir, ma ale' bale anbi pah Kana'an, he nsosan amnahat na'kon na' Yusuf. On nane te in nabuab loit eun nane ok-oke', nalalit in annao nabuaba' sin anbin kesel in sonaf. 15 Tabu nane, abiit eun pah Masir ma pah Kana'an sin nalalin loit. On nane te sin ka nsoos nabe'in fa mnahat. Nalalit sin neman neun na' Yusuf he ntotin. Sin na'uab eun ma nak, “Usi! Hai mbaiseun ko, pah. Amfee kai mnahat, he hai kaisa' mimnaah ammaet. Natuin hai milail loit, ahoit.”
16 Nalalit na' Yusuf nataah ma nak, “Kaul namneo-namneo hi milail loit ate, hi mmoe' on ii: mtuki mnahat meik hi mui't eun nane. Au of a'fee ki mnahat.” 17 Nalalit sin nfee sin mui't eun neun na' Yusuf he ntukin amnahat. Mui't eun nane es eun le': sin biya nuu, bikase, bikaes keledai, bibi, ma sin i'bib-kasen. Natuin toon nane, na' Yusuf an'atol on le' nane.
18 Toon amnemat ate, sin nfain neman neun na' Yusuf. Sin nbaisenun ma nak, “Usi! Hai lo mbaiseun namneo waah, ahoit. Hai loit ma mu'it, ho mtuik maan kuum sin een, ahoit. Tabu ii, hai he mait saa' antein. Hai luman kai 'teeb-'teeb. Ala haa hai tau'm enu anmes-mesen, nok hai nain enu. 19 Kais mufetin kai he hai mmaet. Kaul hai mmate te, sekau es le' he npaloil hai nain eun nane? Leko nneis, ho mait kai mfain ho aten. Ho msium hai nain eun nane, he ho mpaal kuum sin. Nalalit ho mfee kai fini he hai mseen sin meu ko, ahoit. On nane te ho mfee kai mnahat natuin hai mihaeb om ambi ho lenen. Lamu hai kais ammaet!”
20 Natuin tabu amnahas nane maneun le'uf, etun abiit eun pah Masir sin na'sosa' naan sin nain enu oke'. On nane te na' Yusuf ansoos naan nain eun nane, he nlail kesel pah Masir in nain pusaak sin. 21 Nok lanan nane, abiit eun pah Masir sin anlalin ate neun kesel pah Masir.a 22 Mes na' Yusuf ka nsoos fa a'naak palsait eun sin nain enu, natuin kesel anfeen sin i'mnahat piut. Etun sin ka na'sosa' fa sin nain.
23 Tabu nane, na' Yusuf na'uab neu too nuu ma nak, “Tabu ii, hi mfain ate meu kesel pah Masir. Au 'soos a'lail hi nain eun neu kesel. On nane te hi mait finin le' ii nai', he mnao mseen sin neun lenen nane. 24 Tabu sekit ma mnonut ate, hi mbait batis niim. Baits es neu kesel. Neisk enu paa' haa', bian hi mait fini, ma bian hi mait sin antaam amnahat neu ki ok-oke'.”
25 Nalalit sin nataah ma nak, “Koe aam. Ho msoi maan kai na'ko amnahas ii, pah. On nane te hai mtoti makasi, ahoit. Maut he hai mfain ate meu hit usi, ahoit.”
26 Nalalit na' Yusuf anpaek atolan nane anfani plenat anbi pah Masir. Etun sin nbatin batis niim na'ko ale' pena' ma ane le' sin nseik ma noun sin nane. Paa' es neu kesel. Haa' enu neu sin. Ala a'naak palsait eun sin nain, kesel ka nsoos fa sin. Plenat nane, sin fe' anpake nnao piut.
Na' Yusuf anmoe' manba'an nak in he nsuub in amaf anbi sin nai' ma sin bei' sin nopu
27 Anmulai tabu nane, atoin Israelas sin natuan nabalan anbin pah Gosen, et pah a'naek Masir. Sin anlalin atoin amu'it. Ma sin nahonin ma ansaatk ok piut-piut.
28 Anbi pah Masir nane, na' Yakop fe' anmoin naan toon bo'es am hiut, tal antia in nmoin naan toon nautn es am bo' haa' mhiut. 29 Tabu in neno 'maten anpaumak-maak een ate, in anboin na' Yusuf ma an'etun ma nak, “Usu! Au utninat ka 'loo fa yen ate, Uisneno anboin nafani' kau wen. On nane te au 'toit ko, kaul ho mneek kau te, ho msuup mak ho ka msuub kau fa ambi pah Masir ii. 30 Ho mes he meik mufani' au aok-ta'uk ii he msuub ee meu hit nai' ma hit bei' sin nopun, ma msuub kau a'bi naa. Ho ama' kau ii, au 'loimk ee on le' nane.”
Nalalit na' Yusuf nataah ma nak, “Leko, aam! Kaul ho mloim on le' nane te, au utuin aah, aam.”
31 On nane te na' Yakop na'uab ma nak, “Kaul ho mloim mutuin kau te, tabu ii ho msuup, mak ho mloim mutuin ho ama' in i'lomin.”
Nalalit na' Yusuf ansuup natuin na' Yakop in uab eun nane. Oka te na' Yakop anbaina' ma anli'tuu n'ain haal a'nakan, ma n'onen he nasaeb sukuul neu Uisneno.