Na' Yakop sin naloitn eun he na'oin eun neun pah Masir
46
Nalalit na' Yakopa nabuab in iblua' eun, ma nnao nasaitan pah Kana'an. Sin antian kuan Beer Seba te, in nlool mu'it ma na'tulu' sin neu Uisneno, le' in amaf na' Isak na'bees neu Ne na'ko ahunut. 2 Fai yes ate, na' Yakop in nananai'. Anbi nanait nane, in nneen Uisneno anboin ee ma nak, “Hoe! Yakop! Ho mfeen he mneen fe'!”
On nane te in nataah ma nak, “Usi'!”
3 Ma Uisneno nak, “Au le' ii, Uisneno le' ho ama' na'bees neu Ne na'ko ahunut. Ho kais mumtau he mnao meu pah Masir. Au of a'moe' ho sufam ma ho ka'um anlalin too le' maso'ik anbin bale nane. 4 Au of 'ok ko tnao teu pah Masir. Ma Au of 'ok ufani' ho sufam ma ho ka'um nfanin neun pah Kana'an amsa'. Tabu ho mmate te, of ho anah na' Yusuf anhake nbi ho aom biam.”
5 Nalalit na' Yakop nok in aanh eun,b annaon nasaitan kuan Beer Seba. On nane te sin nasaeb na' Yakop, nok sin fee ma sin anah anbin kleet bikasen le' kesel pah Masir anfeen sin. 6-7 Sin neik sin i'maus eun ma mui't eun ok-oke' le' sin anmui' sin, tabu sin anbin pah Kana'an. Nalalit na' Yakop ma in aan feto ma aan mone sin, ma in uupf eun ok-oke', nnaon neun pah Masir.
Na' Yakop nok in fomili sin le' nokan nnaon neun pah Masir
8 Na' Yakop in fomili le' nok na'oin eun neun pah Masir, es eun le' ii:c
10 Na' Simeon nok in aanh eun es eun le': na' Yemuel, na' Yamin, na' Ohat, na' Yakin, ma na' Sohar. Ma na' Saul amsa', le' napeni ye na'ko bifee Kana'an.
11 Na' Lewi nok in aanh eun es eun le': na' Gerson, na' Kehat, ma na' Merari.
12 Na' Yahuda nok in aanh eun es eun le': na' Sela, na' Peres, ma na' Sera. Na' Yahuda in anah bian, na' Er ma na' Onan, anmate nlalin anbin Kana'an. In neik na' Peres in aanh eun amsa', es eun le': na' Hesron ma na' Hamul.
13 Na' Isaskar nok in aanh eun es eun le': na' Tola, na' Pua, na' Ayup, ma na' Simron.
14 Na' Sebulon nok in aanh eun es eun le': na' Seret, na' Eron, ma na' Yahleel.
15 Sin ok-oke' le' nane, na' Yakop nok in fee bi Lea sin aan hoina', tabu sin natuan anbin Mesopotamia. Anmu'i ntein sin aan feto, kanan bi Dina. On nane te na' Yakop nok in hoint eun, tuaf bo' tenu mteun.
16 On nane te anmui' in anah na'ko in fee bian es le': na' Gat, nok in aanh eun es eun le': na' Sifion, na' Hagi, na' Suni, na' Esbon, na' Eri, na' Arodi, ma na' Areli.
17 Na' Aser, nok in aanh eun es eun le': na' Yimna, na' Yiswa, na' Yiswi, na' Beria, nok sin feotf es, kanan bi Sera.
Anmu'i msa' na' Beria in aanh eun, es eun le': na' Heber ma na' Malkiel.
18 Sin aal sin le' nane, tuaf bo'es am nee'. Es eun le' na' Yakop ma in fee bi Silpa in anah ma in upuf sin. Bi Silpa nane, ate le' na' Laban anfee ye neu in aan feto bi Lea, le' na' Yakop in fee 'nae.
19 Na Yakop in fee yes antein, kanan bi Rahel. In nahoin li'ana nua' es eun le': na' Yusuf ma na' Benyamin. 20 Tabu nane, na' Yusuf naan nalail bi Asnat anbi pah Masir. In babaf mone, a'naak lais palsait anbi koot On, kanan na' Potifera. Na' Yusuf ma bi Asnat sin aanh eun es eun le': na' Efraim ma na' Manase.
21 Na' Benyamin nok amsa' neu pah Masir. In nok in aanh eun, es eun le': na' Bela, na' Beker, na' Asibel, na' Gera, na' Na'aman, na' Ehi, na' Ros, na' Mupim, na' Hupim, ma na' Aret.
22 Nalalit na' Yakop ma in fee bi Rahel sin hoint eun tuaf bo'es am haa'.
23 Na' Yakop in anmu'i ntein fee yes, kanan bi Bilha. Sin aanh eun es eun le': na' Dan ma na' Naftali.
Na' Dan in aanh ee, na' Husim.
24 Na' Naftali nok in aanh eun es eun le': na' Yasel, na' Guni, na' Yeser ma na' Silem.
25 Na' Yakop nok in fee bi Bilha sin hoint eun tuaf hiut. Bi Bilha nane, es le' bi Rahel in ate, le' in napeni ye na'ko in amaf na' Laban.
26 On nane te na' Yakop in hoint eun le' annaon neun pah Masir nane, tuaf bo' nee mnee'. In naenf eun fe' ka masoi'k eun fa. 27 Sin anbaab ok nok na' Yusuf in aanh eun le' nahoin sin anbin pah Masir, sin tuaf nua'. On nane te na' Yakop in fomili le' natuan anbin Masir, sin al-aal sin tuaf bo' hiut.
Na' Yakop na'euk nok in anah na' Yusuf
28 Tabu sin he nuu ntian pah Masir ate, na' Yakop anleun in anah na' Yahuda he nnao nahuun, he nboin na' Yusuf, he neem na'euk nok in amaf anbi pah Gosen. Tabu sin antian nlalin anbin Gosen, 29 na' Yusuf ansae neu in i'kleet, he nnao na'euk in amaf anbi nane. Tabu sin na'ekun, na' Yusuf anhoo in amaf ma nkae 'loo le'uf.
30 Nalalit na' Yakop na'uab nok na' Yusuf ma nak, “Usu! Tabu ii, au 'iit ko wen. On nane te au uhiin 'ak ho fe' amoin. Maski tabu ii au 'mate msa', leko.”
31 Nalalit na' Yusuf an'eut neu in olif ma in tataf sin ma nak, “Au lo he 'nao 'baiseun kesel he 'eut 'ak au fomili sin na'kon pah Kana'an neman ntian neen. 32 On nane te au of a'eut 'ak hi le' ii, atuuk mu'it. Etun hi meik hi mui't eun ma hi 'maus eun na'kon Kana'an. 33 Kaul kesel anboin ki, ma nataan hi meup saa'? 34 Hi mitaah am mak, hi aal ki le' ii, atuuk mu'it anmulai mi'ko hi fe' aan'-ana', on hi nai' ma hi bei' sin. Nok lanan nane, in of anleun ki he mitua ambi Gosen.” Na' Yusuf an'eut on nane, natuin abiit eun pah Masir anma'nisin kaul sin natua nabuan nok atuuk mui't enu.