Na' Yusuf an'eut neu in sekau, ma ntoit he in aamf ee na'oina' neem neu pah Masir
45
Anneen on nane te, na' Yusuf in nekan klati'-klati' tal antia in ka nalan naan fa in neekn ee ntein anbi in ameupt eun sin maatk enu. Etun in nleun sin he npoin, he in nmees nok in olif ma in tataf sin. Nok lanan nane te, in nabei' an'eut neu sin nak in sekau. 2 Oka te ameupt eun anpoin oke'. On nane te na' Yusuf ankae nme'-me'ul. In ameupt eun, atoin Masir, le' anhaken anbin mone annenan. Ma abiit eun kesel in sonaf annenan amsa'.3 Nalalit na' Yusuf an'eut namneo waah neu in olif ma in tataf sin ma nak, “Ailoo, pah. Au le' ii, na' Usu kau'. Hi oli'. Hit aal kit atma'oil-tatan. Hit ama' fe' anmoni, neh?”
Annenan on nane te, in olif ma in tataf sin namtau nmaten, tal antia sin ka fefa' mese' fa'.
4 Nalalit na', na' Yusuf nak sin im nak, “Hae! Amfonat eim he mpaumaak kau fe'!”
On nane te sin nfoont eun ma ntaman npaumaak na' Yusuf. Oka te in na'uab nafani' ma nak, “Au le' ii, na' Yusuf, le' neno naa, hi mi'sosa main kau meu pah Masir ii. 5 Amneon ee, hi mi'sosa kau wen. Mes kais mimtau, ma kais ammatoe ma mmasanan es nok es. Natuin Uisneno es neik kau 'oum a'tia ii, he 'lail ahunut 'eu ki. Nok lanan nane, In npaek kau he In nafetin naan too mfaun he sin kaisa' namnaah anmaten.
6 Tabu ii, amnaahs ee fe' annao naan toon nua. Fe' aal toon niim. Tabu nane, ka tiit tain fa tuaf es he ntoof ai' ankaun, anseen, ma ka tiit fa leen es le' he nmui' pena' ma ane. 7 Nok lanan le' hit ka tahiin tani ye fa le' ii, Uisneno neik kau 'oum uhuun u'ko ki. Henati' na'ko hi aal ki, ma hi anah ma upuf sin napenin a'honis.
8 On nane te in amneon ee, ka hi es ammoe' kau fa he au 'oum a'tia ii, mes Uisneno In lekat. In es nait kau 'lail kesel in tuaf mapalsai' a'bi pah Masir ii. Oka te au 'lail a'nakat a'bi kesel in sonaf. Ka tiit tain fa es he nneis na'ko kau.
9 On nane te tabu ii, hi mfain labah nai', he m'eut au uabak le' ii meu hit ama' mak on ii: ‘Aam honi, ho anah na' Yusuf fe' anmoin! In nlail kase 'naek et pah Masir. In na'auba' ko aam honi, he mnao meu pah Masir es le' ii, pah. 10 Aam honi of ho mupein sona' he mutua mbi pah Gosen ampaumaak mokan. Bale nane manuan. On nane te hi mibei' mituuk ma mhao hi bib-kasen, 'bibin, ma biya nuu ok-oke'. In ntoit ko msa', he 'oum meik ho anah ma ho upuf sin, nok nain sin ume nanan ma sin iblua pusaak eun ok-oke' he mitua mibalah ambi naa, pah. 11 Kaul aam honi mutua mbi Gosen ate, in nabe'i npaloil ko anbi naa. Natuin amnaahs ee fe' aal toon niim antein. On nane te in of an'atol he aam honi mok ho fomili sin, ma ho mui't eun ok-oke' ka mkulan fa saa'-saa', pah.”’
12 Na' Yusuf an'etu nlail on nane te, in na'uab antein ma nak, “Tabu ii, hi miit meik hi matam, ai'? Ho msa' Min. Au le' ii, ho tata' na' Yusuf teb-teeb. 13 On nane te am'eut meu hit ama' mak, au kuasat a'bi pah Masir le' ii, nae' le'uf. Ma minu'un meu hit ama' saa'-saa' le' hi miit sin. Oka te hi meik ye neem labah nai' meu ii!”
14 Nalalit in nhoo ma nneek in olif na' Benyamin, ma sin nua sin ankaen. 15 In anhoo ma nneek in taatf eun mese'-mese' amsa'. Nalalit na' sin nmulai na'uab eun nokan.
Kesel pah Masir ansium na' Yusuf in olif ma in tataf sin
16 Nalalit, tabu kesel nok in a'naak mepu sin annenan nak na' Yusuf in olif ma in tataf sin neman, sin nmaliin anmaten. 17 On nane te kesel na'uab neu na' Yusuf ma nak, “Yusuf! Am'eut meu ho inin sin, he sin nasaeb eun pena' ma ane neu sin bikaes keledai nuu, he nekin nnaon neun pah Kana'an. 18 Oka te amleun sin he neik ho ama' ma fomili sin neman oke, he sin na'oin eun neman neun ii nai'. Au of a'feen sin afu ma bale le' leko nneis anbi pah Masir ii, he sin natuan anbin nane, ma sin napenin amnahat na'ko bale nane. 19 Amleun sin he sin neik nanin kleet bikase' fauk na'ko ii, he sin nasaeb li'aan enu, ma ho ama'. 20 Kais sin natenab a'maus eun le' sin ka nabei' he neik sin fa'. Natuin pah Masir ii, naheun nok ablua' le' alekot. Sin of anpaal sin.”
21 Anneen on nane te, na' Yusuf anfee kleet bikase fauk, ma beti' anbi lanan, natuin kesel in kabin. In olif ma in tataf sina naloitn eun he nfanin natuin kesel in kabin. 22 Na' Yusuf anfeen sin paek feu' amsa', es ate paasn es. Mes in nfeen na' Benyamin noin muti fuan natun teun, ma paek feu' pasan niim. 23 In nfee neu in aam honi blua' saa'-saa' le' naleok na'ko pah Masir, ma nasaeb sin anbi bikaes keledai mone bo'es. In anfee na'baba' antein pena' ma ane, utunu, ma mnahat huma'-huma', nasaeb sin neun bikaes keledai einaf bo'es. In n'ook-beit sin nbi tabu sin annaon nfain neman neun pah Masir. 24 Nalalit in nnao nasaina' sin, ma namnauba sin ma nak, “Nati hi kaisa' mmatoe mbi lanan, oo!”
Na' Yakop anneen nak na' Yusuf fe' anmoin
25 Nalalit sin nnaon nfanin neun sin amaf et pah Kana'an. 26 Antian na te, sin an'etun sin amaf ma nak, “Aam honi! Ho anah na' Yusuf fe' anmoin. In nlail kase 'naek et pah Masir! In nnaa' aplenat.”
Tabu na' Yakop anneen on nane te, in ntakmaan ma ka npalsai' fa' sin uabk eun nane. 27 Mes tabu sin an'etun nlail na' Yusuf in uab eun nane, ma in niit akleet bikase le' na' Yusuf anfeen ee he nasaeb neki neu pah Masir ate, na' in anpalsai'. 28 On nane te in na'uab ma nak, “Ailoo! Au aanh ee fe' anmoin! On le' nane te, na' au 'maliin. Au lo he 'nao 'kius 'aan ee fe', na' au 'mate msa', leko.”