Na' Yusuf in bala klaas noin muti namneuk
44
Sin nbukaen nlalin ate, na' Yusuf na'seo' a'naak mepu nbi in ume ma nak, “Hoe! Ho mnao mulai pena' ma ane meu atoin eun ii sin i'kalon nane, nahen-henun. Nalalit ho mtao mufani' sin loit eun es-es ate meu sin i'kalon nane. 2 Nalalit ho mait au bala klaas noin muti ma mtao we meu a'heut susu in i'kalo.” On nane te in nmoe' natuin na' Yusuf in i'plenat.3 Nookf aa, fe' ka nmeus fa te, na' Yusuf nafetin sin nok sin bikaes keledai sin he nnaon nfanin ma nekin amnahat. 4 Sin nnaon fe' ka loo fa na'kon koot nane te, na' Yusuf an'eut neu a'nakat nane ma nak, “Ho mnao mliu' mutuin atoin eun nane labah. Kaul mupein sin ite, ho mak sin im mak, ‘Nasaa' am es hi mmoe' maufinu meu kesel? Hi mbalas in nekan leko meik moe' maufinu on nane! 5 On mee m'es hi mibaak meik hai a'nakat in bala klaas noin muti? Hi ka mihiin fa? Nane ka ala npake he nbukae oe nmees yah. Mes anpake he naim atoni in uan amsa', natuin bala klaas nane matua'! Hi moe'm eun ii, lo mafiun le'uf!”’
6 Nalalit a'nakat nane nliu' natuin sin tal antia napein sin. On nane te in an'eut neu sin natuin ahaa na' Yusuf in uaban lelo na.
7 Nalalit sin npenan maten ma nak, “Aam, ho sailt ee, on mee? Hai msuup. Hai ka neu he mibei' fa he mmoe' maufinu on nane! 8 Ho muhiin kuum. Loit eun le' neno naa anbin hai 'kalo nanan, hai mfee mifani sin neu ko. On nane te hai ka mibei' fa he mibaak hi a'nakat in bala klaas nane na'ko in ume. Hai ka neu he mibaak fa, pah! 9 Aam, ho mpukai ma mtae kuum. Mupein bala klaas nane anbi sekau in i'kalo te, amhukun misan! Maut he hai bian ee, mfain ate meu ko.”
10 Nalalit a'nakat nane na'uab ma nak, “Kahaf! On ii. Kaul au 'iit ee nbi sekau te, in le' nane anfain au ate. Hi bian ee, mnao mfiin.”
11 On nane te sin nasanut a'kalon nane, lab-labah. Nalalit sin npukai nain sin. 12 Oka te a'nakat nane anpalekas 'kalon nane ok-oke', anmulai na'ko a'naek in ini, ntia a'heut susu ini. On nane te in niit bala klaas noin muti' nane, anbi na' Benyamin in i'kalo.
13 Ankius nitan on nane te, na' Benyamin in taatf eun sin neek eun klati'-klati'. Nalalit sin nasaeb nafani' sin i'kaoln aa neun sin bikaes keledai sin, he ntaman nfanin neun koot.
14 Tabu sin antian na' Yusuf in ume te, in fe' anbi nane. On nane te sin nli'tuun anbin na' Yusuf in human ma in matan. 15 Oka te na' Yusuf ankabal sin ma nak, “Hoe! Nasaa' am es hi mmoe' kau on le' ii? Hi ka mihiin fa? A'naet on le' au, a'paek le'u le' he 'aim atoni in uan.”
16 Nalalit na' Yahuda nataah ma nak, “Ailoo! Uisneno npukai napoitan hit saant enu. Oka te hai he mak saa' antein, ahoit? Hai he mimneob hai tau'm eun on mee, ahoit! Kaul ho mtahan hai oli' te, leko nneis ho mtahan kai oke'. Mait kai mfain ho aten.”
17 Mes na' Yusuf nataah ma nak, “Kahaf! Niit bala klaas nane anbi sekau te, in es le' he nlail au ate! Hi bian ee, ao-sona'. Amfain nai' meu hi ama'!”
Na' Yahuda ntoit he nseka' na' Benyamin
18 Nalalit na' Yahuda annao npaumak-maak na' Yusuf, ma na'uab ma nak, “Au 'baiseun, ahoit. Au uhiin 'ak ho kuasat nane natai nok kesel in kuasat kuun. Natuin lasi nane, kais amkaas kau, ahoit. Au 'toit sona' he au u'uab 'aan a'kle'o, ahoit. 19 Neno naa, ho mutaan kai mmak, ‘Hi ama' nok hi oli tuaf es fe' et eun nane, ai'?’
20 Nalalit hai mitaah am mak, ‘Hai ama' namnasi yen. Hai oli a'heut susu mese' aah. Tabu nahoins ee te, hai ama' namnasi yen. A'heut susu in taat honi' mees' yah, mes anmaet nalali yen, ahoit. Sin nua sin, sin einf ee nmate nlali yen. On nane te tabu ii, hai oli' a'heut susu nane, in nmees. Es na' hai ama' anneek nisan.
21 Nalalit ho mleun kai he hai meik hai oli', he ho miit ee. 22 On nane te hai mitaah am mak, ‘Li'ana' le' na', ka neu he nnao nasaitan fa hai ama'. Kaul in nnao nasaitn ee te, hai ama' lo mees he nmaet kuun nai'.’
23 On nane te, ho mutaah am mak, ‘Kaul hi ka meik fa hi oli' nane te, hi ka neu he miit amtein kau fa yen.’
24 Nalalit hai mfain. Hai mtian hai ama' naa te, hai m'eut main lasin le' ho mu'uab sin meu kai. 25 A'loo-'loo te, hai mnaaht enu oek' eun. Oka te hai ama' anleek kai he mfain eim amtein meu pah Masir he msoos amnahat. 26 Mes hai mitaah am mak, ‘Aam honi! Hai ka neu he mnao fa meu naa ntein. Natuin kesel in tuaf mapalsai' na'uab nain nak, kaul hai ka mok fa hai oli' te, hai ka neu he miit amtein fa in human. On nane te hai lo he meik hai oli' a'heut susu nane fe', hena' hai mnao.’
27 Nalalit hai ama' na'uab am nak, ‘Hi mihiin main kiim. Au fee bi Rahel in aanh eun, tuaf nua yah. 28 Ahuunt ee annao namneuk. Oin mui' fui nuu npisu ma neuk niisn een. Es na' antia tabu ii, au ka 'iit a'teni' ee fa'. 29 Kaul hi mait meik a'heut susu nane ntein mi'ko kau, ma in napein snama' ate, hi mtao mtein kau suset meu au atoni mnasi' kau ii, he 'maet nai'.’
30-31 Es nane te, usi'. Au 'baiseun, ahoit. Kaul au 'fain 'eu au ama' mes au ka 'ok fa a'heut susu le' ii te, lo hai ama' of anmaet kuun een. Natuin in neekn aa, nmafuut nok li'ana' ii te. In namnasi nmaten amsa'. On nane te kaul hai mtao mtein' ee suset, in nmaet nai'. 32 Saa' antein, au 'ba'an ulail 'eu au ama' 'ak, au utaah li'ana ii. Au 'ba'an 'eu au ama, kaul au ka 'eik ufani' fa li'ana' ii neun, maut he au utaah kuuk sanat nane, tal antia au 'maet.