Na' Yusuf in taatf eun anfanin neun pah Masir, nok sin olif na' Benyamin
43
Tabu nane, amnahas anbi pah Kana'an maneun le'uf antein. 2 Na' Yakop in ume nanan nalail nafinib mnaaht eun le' neno naa, in aanh eun annaon nsoos sin na'kon pah Masir. Nalalit in nak sin ma nak, “Li' teun! Leko nneis hi mfain meu pah Masir, he msoos amtein kit imnahat fe'!”3 Mes na' Yahuda nataah ma nak, “Aam honi! Neno naa, kesel pah Masir in tuaf mapalsai' namnauba kai ma'tane nak, hai ka mibei' fa he mitoon hai huum eun meu ne, kaul hai ka mok fa ho aan a'heut susu na' Min! 4 On nane te aam honi. Ho lo he mufetin kai na' Min, he nok kai, hena' hai mfain he msoos kit imnahat. 5 Mes kaul ho ka mufetin kai fa na' Min ate, hai ka neu he mnao fa'. Atoin Masir nane na'uab anlail on nane te.”
6 On nane te na' Yakop nakain sin ma nak, “Nasaa' am es hi m'etun atoni nane mak hi fe' ammui' olif es antein! Hi mami yaa kau suset antein!”
7 Nalalit sin anhanet na' Yakop ma nak, “Aam honi! Atoni na nataan piut, he nahiin kit nok nain hit ume nanan ok-oke'. In nataan ma nak, ‘On mee? Hi ama' fe' anmoni ka? Hi fe' ammui' olif et hi ume, ai' kahaf?’ On nane te hai he mak saa' antein! Oka te lo hai m'eut namneo waah. On nane te, sekau nahiin nain nak, in he nleun kai he hai mok na' Min on naa?”
8-9 Na' Yahuda na'uab antein ma nak, “Aam honi! Mufetin kai na' Min he nok kai'. Au 'ba'an ain, kaul anbool saa'-saa' neu ne te, au es utaah he 'seka'. Kaul au ka 'eki nfain neem fa nok ao-mina' neu ko te, maut he ho musaan kau tal antia au 'maet. On nane te ho mufetin kai na' Min, fun hai he mnao wen. Leko nneis hai mnao nai', he hit kais tamnaah atmaet. 10 Bait hai kais ampao 'loo-'loo, oin hai mnao ma mfain eim hae' nua yen.”
11 Nalalit sin amaf nak, “Kaul on nane te, hi mmoe' on ii: hi mnao mait meik hau fua ma foboon leko na'ko hit pah. Es eun le': bumbu sin, hau oef le' foo bona', le'u he ttuis, oin hau, kanari,a ma hau fua bian. Nalalit meik sin meu kesel pah Masir in tuaf mapalsai' nane, ma m'eutn am mak hai mneikt eun le' ii nlalin ook-sonun neu ne. 12 Hi meki mtein loit amsa' nneis hae' nua na'ko tabu neno naa hi mnao. Natuin hi lo mees he mfee mifani' loit eun le' hi miit sin anbin hi 'kaoln aa neno naa. Kais-kaisa' sin es le' antaon nsaan sin. 13 Hi mok hi oli', mes nati' mfain eim labah, oo! 14 Au 'on-'onen, he kaul Uisneno le' Akuasat Afinit nabaina' kesel pah Masir in tuaf mapalsai' nane he nkasian ki. He kaul leko te, in nfee nafani' ki au anah na' Min ma na' Meon, he hi mfain eim mibu-bua'. Mes kaul au aanh eun namnekun oke' te, maut he au usaah suset ii nfiin piut.”
15 Nalalit sin annaon ma nabuab eun mnekit ook-soun eun ma loit, he nekin nnaon neun pah Masir. Sin nok na' Benyamin amsa'. Antian naa te, sin annaon nbaiseun na' Yusuf. 16 Tabu na' Yusuf niit na' Benyamin nok in taatf eun ate, in anleun a'naak mepu nbi in ume ma nak, “Hoe! Meik atoin eun le' ii ntaman neun au ume! Nalalit amlool biya yes, mihaan ee lek-leko. Sin mes he nbukaen nok kau tabu maans ee na'fufu'.
17 Nalalit a'nakat nane anmoe' natuin na' Yusuf in i'plenat. On nane te in annao ma nanaat sin neu na' Yusuf in ume.
18 Tabu sin nnaon neun na' Yusuf in ume, in taatf eun namtaun nmaten. Anbin lanan, sin na'uab eun ma nak, “Ailoo! Nasaa' am es in nleun he neik kit teu ii? Kais-kaisa' in he nasuseb kit, natuin loit eun le' sin anfee nafani' kit sin anbin hit i'kaoln aa neno naa. Sin anmoe' napoib kit he neem nanaat kit teu ii, he nok askeken ate, sin nheek kit, ma nmoe' kit nfani sin aten. Oka te sin nasiik naan hit bikaes keledai sin oke'.”
19 Etun tabu sin anpaumaak na' Yusuf in ume te, sin nataan a'nakat nane ma nak, 20 “Aam, kais muto'-to'an kai'. Neno naa, hai eim amsoos miit amnahat ambi ii. 21-22 Nalalit tabu hai mfain meu hai kuan, hai misnaas ambi lanan he mtuup. On nane te hai mfei 'kaoln aa he mhao mui't enu. He'e! Hai mtae miit hai loit enu, antao nafani' kai sin anbin hai 'kaol aen aa sin luulk enu. Hai ka mihiin fa he sekau es le' antao sin ii. Mes tabu ii, hai meik mifani' sin oke'. On nane te aam, kais mutoo' oo! Maut he ho muhiin neu tabu ii hai meik loit bian antein he msoos amnahat antein.”
23 Nalalit a'nakat nane nataah sin ma nak, “Hi mtaa'-taa' kiim. Kais mimtau! Of oin hi Uisneno es anfee tetus neu ki anbi hi 'kalon nane. Neno naa, au 'sium ulail hi loit eun nane oke'. Hi ka mmui' fa' tusa'!” Nalalit in napoitan na' Simeon na'ko uim o'of he nabua nok sin.
24 On nane te sin ntaman oke' neu na' Yusuf in ume. Nalalit a'nakat nane anfeen sin oe ma nboe sin haek enu. In nhao sin bikaes keledai nuu msa'. 25 Nalalit in an'eut ma nak, “Hi of ambukae mok hai aam usi' tabu maans ee na'fufu'.” Tabu sin anpao na' Yusuf he neem na'euk nok sin ite, sin n'atol ook-soun eun nane.
26 Tabu na' Yusuf neem antia te, sin nli'tuun ok-oke' anbin in human ma in matan. Nalalit sin natnana' ook-soun eun neu ne. 27 Nalalit na' Yusuf nataan sin ma nak, “On mee? Hi aal ki m'ao-mina, ne? Hi ama mnasi' on mee? In n'ao-miin amsa' ai' kah?”
28 Sin nataah ma nak, “Ho ate mnasi, le' hai aam honi, in n'ao-miin, ahoit.” On nane te sin na'luil eun ma nabesan antenin.
29 Nalalit na' Yusuf na'aiti' matan ma ankius niit in olif na' Benyamin. Sin nua sin, einaf ma amaf mese'. On nane te in nak, “Ooo! Hi oli' a'heut susu le' neno naa hi m'et-etu es le' ii, yah?”
Nalalit in na'uab neu na' Benyamin ma nak, “Bae'! Au 'on-'onen he Uisneno anfee ko tetus a'na-'naek.”
30 Ankius na' Benyamin ate, na' Yusuf in lasi mnaut neu in oilf ee he npe'-pee' yah een. Natuin in nneek niis in olif na' Benyamin. In ka nalan nabei' naan fa in nekan nane antein. On nane te in nnao ntaam neu in ke'an labah. Nalalit in nkae nme'-me'ul anbi naa. 31 Ankae nlali te, in nnao nameu in human. In nafani' in nekan, oka te in nnao na'euk nok sin. On nane te in nleun in ameupt eun ume nanan he nabaalb eun bukaet neun mei.
32 Sin nabalab bukaet neu na' Yusuf anbi mei yes in nmees kuun. In olif-tataf sin nbukaen anbin mei yes a'teta'. In ameupt eun, anbukaen anbin mei yes kuun. Natuin atoin Masir sin natenab ate, sin nha'niis sin tau'k eun kaul sin nbukaen nabuan nok atoin Ibranis sin.b 33 A'nakat nane an'atol nalail he na' Yusuf in olif-tataf sin antokon nmabain eun nok na' Yusuf. In n'atol sin he ntokon nmakatui eun anmulai na'ko a'naet ntia a'heut susu. Tabu sin ankius niit le' mo'et le' ii te, sin nsanmakan. 34 Nalalit na' Yusuf an'atol he in ameupt eun nane naitin bukaet na'kon in mei neu in olif ma in tataf sin. Sin nsimon paap' mese'. Mes na' Benyamin ansimo mfaun anneis hae' niim na'ko in taatf eun nane. Nalalit sin nbukaen tal antia sin ampetan namneo-namneo.