3 Nalalit na' Yusuf in taatf eun le' tuaf bo'es nane, naloitn eun he nnaon nsoosn aa mnahat nbi pah Masir. 4 Mes na' Yakop ka nafetin fa na' Yusuf in olif na' Benyamin he nok sin. In natenab ma nak, “Kais-kaisa' li'ana' nane napein snama' amsa' on le' in tataf.” 5 Anbi mee-mee te, too mfaun eun annenan nlalin nak anmu'i mnahat et pah Masir, es nane te, too mfaun ee annaon ma nsoosn aa mnahat anbin nane. Amnahas nane, lo nasoup antian pah Kana'an amsa'. Nalalit na' Yakop in aanh enu^a annaon ma nsoosn aa mnahat anbin naa msa'.

6 Tabu nane, na' Yusuf anfain tuaf mapalsai' neu kesel pah Masir. Kaul sekaum-sekau neem na'ko mee-mee he nsoos pena ma ane te, na' Yusuf es na'sosa neu sin. Es na' tabu in taatf eun neman ntian ate, sin nli'tuun ma na'besan antian nain. 7-8 Tabu in niit sin ite, in nahiin nain sin. Mes na' Yusuf anmoe's on, on le' atoin Masir, es na' sin ka nahiin ne fa. Oka te in nataan sin nok haan maputu ma nak, “Hi le' ii, mi'ko mee?”

Sin nataah ma nak, “Ho aten kai mi'ko pah Kana'an. Hai eim he msoos amnahat mi'ko ko, ahoit.”

9 Nalalit na' Yusuf fe' namnau in nanait eun un-unu'. In aka'tau sin ma nak, “Au ka 'palsai ki fa'! Hi le' ii of a'mata' ki. Hi eim maim he mihiin pah Masir in lasi 'tolo' sin, oka te hi mfain-koit he eim ma mislutu' mok kai, ai'?”

10 Mes sin nataah ma nak, “Kahaf, ahoit! Hai le' ii ala ho aetn aa kai. Namneo-namneo hai ala eim he msosa haa mnahat. 11 Hai aal kai le' ii, hai ama' mese'. Hai ka a'mata' kai fa, ahoit! Hai atoin lekon kai, ahoit.”

12 Mes na' Yusuf na'uab nameep ma nak, “Hoe! Hi mipoib om. Kais amputa-bliu kau'! Au uhiin 'ain 'ak hi a'mata' ki. Hi eim he maim pah le' ii in lasi 'tolo' sin!”

13 Nalalit sin naplotes ma'tane. Oka te sin nataah neun na' Yusuf ma nak, “Kahaf, ahoit! Hai le' ii ala ho aetn aa kai. Hai eim mi'ko pah Kana'an. Hai mma'oil-tatan bo'es am nua'. Hai aal kai ama' mese'. Hai oli' a'heut susu in na'maika' nok hai ama'. Ma hai oilf es antein, annao namneuk.”

14 Na' Yusuf nataah sin ma nak, “Kahaf! Namneo uab le' fee le' ii au u'uab ee nane. Hi le' ii lo a'mata' ki. 15 On nane te hi lo mees amfee kau bukti fe', he au uhiin 'ak hi uab eun fee le' ii teeb-teeb, ai' kahaf. Au 'suup! Kaul hi oli' a'heut susu ka mok ne fa neem neu ii te, hi ka mibei' fa he mnao misaitan pah le' ii! 16 On nane te hi mpiil maan tuaf es he nnao nanaan hi oli' neem neu ii. Bian sin, au 'tahan sin. Au he 'iit, hi uab eun nane teeb-teeb, ai' kahaf. Kaul kaah fa te, namneo, hi le' ii a'mata' ki.” 17 Nalalit na' Yusuf anleun he nataam sin neu uim o'of nanan, neno teun.

18 Neno tenu te, na' Yusuf annao ma na'uab nok sin anbin uim o'of ma nak, “Au le' ii, umtausan Uisneno. Ma au utuin In i'loimn aa piut-piut. Au ufetin ki he hi mmoin. Mes hi lo mees minokab uab es. 19 Kaul hi uab eun namneo-namneo 'tebe' te, hi mes mitoon kau bukti. In lanan on ii: au 'tahan tuaf es anbi uim o'of le' ii. Hi bian amfain meu hi pah, he meki mnahat meu hi fomili sin. Natuin sin anpao ki he mekin sin imnahat. 20 Nalalit hi eim mok hi oli', he nlail bukti, neu hi atoni neek amneo'. On nane te, hi ka mipoiba kau fa'. Maut he nok lanan nane te, au kais a'hukun u'maet ki.”

Sin nnenan on nane te, sin nlomin. 21 Nalalit sin na'uab eun es nok es ma nak, “Neu! Leko wen! Tabu ii hit tapein hit i'mo'ek neno nane in neesn een. Hit tmoe' amle'ut neu hit oli'. Hit tkius tiit ee neu in nsuse nmaet, in ntoit neik haan sakoit he hit ttuuln ee, mes hit ka tfiloli ye fa. Etun tabu ii, hit tsuus een on le' ii msa'.”

22 On nane te na' Ruben namnauba sin ma nak, “Hae, sin au oli' aal ki. Neno nane au 'taal ki, he kais misaa'-saa' li'ana' nane! Mes hi ka mneen main fa au uaba' nane. On nane te tabu ii, hit tseu fuan een. Na' Usu in naa' ansaen kit yen.” 23 Sin na'uab eun on le' nane, mes sin ka nahinen fa neu na' Yusuf nahiin sin uab. Natuin tabu na' Yusuf na'uab nok sin ite, in npaek uab Masir. Nalalit na' anmui' asoin uab' na'bain ee neu sin anpaek uab Ibrani.

24 Anneen sin na'uab eun on nane te, na' Yusuf annao nasaitan sin, ma nkae nmes-mees anbi bale le' in aon bian sin ka niit ee fa. Tabu in nkae nlali te, in nfain neem neu sin. Nalalit in nleek tuaf ma nfuut na' Simeon anbi in olif ma in tataf sin maatk enu.

25 Nalalit na' Yusuf naplenat in ameupt eun he nalain pena' ma ane neu in taatf eun sin i'kaoln aa. Ma sin ntao nafani' loit eun anbin a'kaoln aa sin feefk enu. Nalalit ansoo sin. In nleun he nfeen sin beti' amsa'. Ameupt eun nane anmo'en natuin na' Yusuf in i'plenat. 26 Nalalit na' Yusuf in taatf eun nasaeb a'kalon nane neun sin bikaes keledai sin. Nalalit sin anpoin ma nnaon nasaitan pah Masir.

27 Anbi lana tnanan, sin nasnasan. Tabu tuaf es anfei in i'kalo' he nhao in bikaes keledai te, in niit in loit eun anbin a'kalo in fefan. 28 In naskeek! On nane te in nhaman in olif ma in tataf sin ma nak, “Hoi! Hi eim he mkius miit ii fe'! Hit tmate tfiin! Sin ntao nafani' au loit eun es eun au 'kalo'.”

Ankius nitan on nane te, sin neek eun namnekun. Sin namtau nmaten. Nalalit sin na'uab eun ma nak, “Uisneno nmoe' saa' antein es le' ii neu kit?”

29 Nalalit sin nnaon nfinin. Antian Kana'an ate, sin npi'on neu sin amaf saa'-saa' le' sin natniin niit ee, anmulai na'ko sin anbin pah Masir, tal antia sin nfain neman. 30 Sin an'etun ma nak, “Aam honi! Kesel pah Masir in tuaf mapalsai', maneun le'uf. In na'uab aah amsa', ka tiit fa haan ma'nula'. In nhaman ma nbuu' kai, ma nak hai mnao mi'mata' in pah. 31 Mes hai mitaah mak, ‘Kaah fa, ahoit! Hai mi'uab namneo-namneo, ahoit. Hai aal kai le' ii, ka a'mata' fa, ahoit. 32 Hai atoin neek lekon kai, ahoit. Hai mma'oil-tatan tuaf bo'es am nua'. Hai ama' mese'. Mes tuaf es na'ko kai, annao ma namneuk, ma a'heut susu in na'maika' nok hai ama' et pah Kana'an.’

33 Nalalit kase 'naek ee nak, ‘Au he 'soba' ki. Hi atoin amneot, ai' kahaf. Hi tuaf es lo' he nabalah anbi ii. Hi bian amfain, meki mnahat meu hi fomili sin, he sin kaisa' namnaah anmaten. 34 Hi lo he meik hi oli' neem neu ii fe'. Nok lanan nane te, na' au uhiin 'ak hi ka a'mata' ki fa, mes namneo-namneo hi atoin neek amneo'. On nane te au of ufetin ki hi benu' le' au 'taahn ee le' nane. Ma au ufetin ki he mnao meu mee-mee yah, ambi pah le' ii.”’

35 Anpi'o nlalin on nane te, sin npukai sin i'kaoln aa. Sin naskeken, natuin sin es-es ate, niit sin loit enu anbin sin i'kaoln aa. Ankius on nane te, na' Yakop nok in aanh enu namtau nmaten.

36 Nalalit na' Yakop na'uab nok sin ma nak, “Hi moe'm eun, es na' au aanh eun namnekun. Na' Usu namneku wen. Amteni' na' Meon. Tabu ii hi he meki mtein na' Min? Hi lo namneo-namneo he mha'mui' kau, es le' ii!”

37 On nane te na' Ruben na'uab neu in amaf ma nak, “Aam honi! Amfee kau na' Min. Au es utaah. Au 'ba'an 'ain, au lo mees 'oum 'eik ye nfain neem 'eu ko, aam honi. Mes kaul kaah fa te, aam honi, ho mlool au aan moen nua eun nane.”

38 Mes na' Yakop na'uab ma nak, “Kahaf! Ka nabei' fa he hi meik na' Min. In tataf na' Usu nmate nlali yen. Tabu ii, aal in nmees. Kaul in napeni snama' anbi lana tnanan ate, hi lo mees misuseb miis kau, au atoni mnasi' ii, tal antia au 'taam 'eu nopu 'maten.”^b