3 Nalalit anmui' naan biya hitu ntein, anpoin na'kon noe nane. Sin aok eun, nmaknau nmaten. Sin anhaken anpaumaak biya apookt eun nane. 4 Nalalit biya hiut amaknaut eun nane, an'ool naan biya hiut apookt eun nane. Oka te kesel naskeke nfeen aah.

5 Tabu in antuup anfini nfain, in nananai' antein. In niit ane pune hiut anpoin na'ko ane uu' es le' amlian ee kah. Sin puink eun a'naek ma manesa'. 6 Nalalit in niit antein ane pune hiut. Mes ain maputu' anfuu sin ma mmakneen eun. On nane te sin n'aap eun. 7 Oka te aen aap eun nane an'ool naan aen mapuin eun nane. Nalalit kesel anfeen. Na' in nahiin nak, in nananai' ntein.

8 Anmeu nfiin ite, kesel in teenb ee ka ntainine' fa'. On nane te in naplenat he nboin ale' kanan ahinet anbi pah Masir. Nalalit in n'etun sin nanait eun nane, mes ka tiit fa tuaf es, le' nabei' anbaan sin.

9 Nalalit a'naak balab loitan bukaet ma mninut neu kesel, na' in namnau niit na' Yusuf. On nane te in nnao nbaiseun kesel ma nak, ‘Au' baiseun, ahoit! Ho ate kau ii 'saan. 10 Nahunu te, tabu usi' ho mkaas kau 'ok au aok-bian, ma mutaam kai mbi uim o'of, 11 fai yes ate, hai nua kai minanai'. Es-es ate, nok in nanait aa kuun. Ma nanait eun nane amsa' sin ootk enu ka paap' mese' fa'. 12 Anbi uim o'of, anmui' atoni Ibranis yes, fe' munif. A'naak uim o'of naiti nfani a'naak mepu nbi uim o'of. Hai m'etun hai nanait eun nane. On nane te in anbaan sin. 13 Na'ko lasi nane, aam usi' ho muna'at mufani' kau au mepu. Mes au aok-bian ee, ho mhukun mu'mate. Lasin le' nane, natai nok saa' le' atoni Ibranis nane anbaan sin, ahoit!”

14 Anneen on nane te, kesel anleek tuaf he naen labah he neik na' Yusuf na'ko uim o'of. Nalalit na' Yusuf annao n'eu ma nseka' in paken, ma nnao he na'euk nok kesel. 15 In neem antia te, kesel na'uab neu ne ma nak, “Anah! Au unanai', mes ka tiit fa tuaf es, le' nabei' he nbaan nanait eun nane. Mes anmui' tuaf le' an'eut kau ma nak ho mubei'.”

16 On nane te na' Yusuf nataah ma nak, “Aam usi'. Ho ate kau msa' ka uhiin fa saa'-saa', ahoit. Uisneno nmees kuun es anbaan ale' kanan nanait. Oin of In anloim he n'eut ko lais leko, ahoit.”

17 Nalalit kesel an'eut nanait eun nane. In nak, “Anbi au nanait nane, au 'hake bi noe Nil in ninen. 18 On nane te anmui' biya apokat hiut, sin aok eun nalim-liman. Sin anpoin na'kon noe nane, ma nnaon nekun huun anbin noe nane in ninen. 19 Nalalit anmui' biya hitu ntein neman. Mes biyan nane nmaknau nmaten. Au ka 'iit 'iit fa biya human on le' nane anbin pah Masir ii! 20 Mes au 'sanmaak! Natuin, nok askeken ate, biya hiut amaknau eun nane, an'ool naan biya hiut apookt enu. 21 Sin n'olo nlail sin on nane msa' biyan nane anmaknaun nabaln aah. Nalalit au uskeke' 'feen aah.

22 Nalalit au 'tupa' 'fini 'fain. Oka te au unanai' 'tein. Au 'iit ane pune hiut, anpoin na'kon ane uu' es le' amlian ee kah. Sin puink eun a'naek ma manesa'. 23 Nalalit au iit a'tein, ane pune hiut. Mes ain maputu anfuu sin ma maknenen. On nane te sin n'aap eun. 24 Oka te aen aap eun nane an'ool naan aen manees eun nane. Nalalit au 'feen. On nane te au eut nanait eun ii 'eu ahiint enu. Mes ka nmui' fa tuaf es, le' nabei' he nbaan nanait eun nane.”

25 Nalalit na' Yusuf anbaiseun ma nak, “Aam usi'. Nanait eun nane, sin ootk eun mese' aah. Uisneno an'eut nain ko, saa'-saa' le' In he nmo'e, ahoit. 26 Nanait eun nane sin ootk eun on ii: biya hiut apookt eun nane, ma aen hiut manees eun nane, es eun le', tabu haot anho-hoen toon hiut. Sin ootk eun mese' aah. 27 Ma biya hiut amaknaut eun nane, ma aen puin hiut a'aap eun nane, es eun le' tabu amnahas toon hiut, ahoit.

28 On nane te Uisneno an'eut nain saa' le' In he nmo'e, ahoit. On le' fe' le' ii au u'uab. 29 Hit of attian tabu athoes toon hiut atbi pah Masir ok-oke'. 30-31 Nalalit na' hit ittian tabu amnahas toon hiut. Amnahas nane ma'tane, tal antia ka tiit tain fa mnahat atbi hit pah ii. Ale' pah ee namnaah ok-oke', tal antia sin ka namnau ntein fa tabu mnaaht eun anhoen.

32 On nane te aam usi', ho mupein nanait hae' nua le' nane, in ootk eun nak, Uisneno nafeek anlail nak, ka 'loo fa nteni te, saa' le' In nafeek sin nane, lo he nlail.

33 Es nane te, au 'peint ee on ii, ahoit: leko nneis aam usi', ho maim tuaf ahiint es, le' an'ulus nahiin nok leko. Nalalit ho maiti ye he n'atol ma naloitan lek-leko pah le' ii. 34 Tabu mnahat anhoe toon hiut nane, leko nneis aam usi, ho mait tua 'teet es antein, he in nakbubu' pena' ma ane na'ko too nuu sin lenen. Pena' ma ane nane anbait sin paa' niim, he nabela paa' es. 35 Sin lo he natuin aam usi' ho plenat, he sin nsimon pena' ma ane na'ko kuan-kuan anbin pah Masir ii. Nalalit sin lo he nabela' sin anbin lopo le' he tabela' mnaaht enu. Oka te lo he npao sin lek-leko. 36 He kaul toon hiut amnahas nane antia te, hit fe' atmu'i mnahat. Kaul sin n'aotl ee on le' nane te, ka tiit fa tuaf he namnaah anmaet, ahoit.”

37 Anneen na' Yusuf na'uab on nane te, kesel ma in a'naak anesit sin, anlomin he natuin in uab eun nane. 38 Nalalit kesel na'uab ma nak, “Uisneno In Ismanan ankuaas na' Yusuf le' ii. Es nane te, hit ka neu he tapein fa tuaf es antein, le' anneis na'ko na' Yusuf.”

39 Nalalit kesel na'uab nok na' Yusuf ma nak, “Uisneno an'eut ko ale' kanan lasin ii. Tabu ii, hai fe' mihiin mak ho atoin ahinet ko. Ma ho hinem anneis na'ko too mfaun. 40 On nane te tabu ii, au 'ait ko mfain au atoin mapalsai'. Ho mfain a'nakat ambi au sonaf. Au too nuu lo mees natuin ho pleent enu. Mes alahaa au 'mees, es a'neis u'ko ko.”

41-42 Nalalit kesel nous in klein mamalak, ma napaekb ee neu na' Yusuf in iklulun. Ma in na'uab ma nak, “Nok lanan ii, au 'ait ko mfain au atoin mapalsai' anbi pah Masir ii.” Nalalit in napakeb na' Yusuf 'fanu mnaun ma'uup es, ma na'heekb ee 'heke' mnatu es.

43 Nalalit in nana'at in ikleet bikase es antein, he na' Yusuf anpake. Anmui' tuaf-tuaf naen anbi kleet nane in matan ma nkoa' naktein-tein eun ma nak, “Uwoo! Misoitan lanan! Amfee tola'!^a A'naet ee, he nkoen on anfiin!” Nok lanan nane, kesel nait na' Yusuf anfain in atoin mapalsai' anbi pah Masir.

44 Nalalit kesel na'uab nok na' Yusuf ma nak, “On ii. Ho muhiin main, au le' ii kesel. Au etun ulail too pah Masir 'ak, kaul ho ka mno'al fa sin ite, sin ka nabe'in fa he nmo'en saa'-saa'.”

45 Nalalit kesel nakanab na' Yusuf ma nak, Safnat Panea, natuin abiit eun Masir sin kaank enu. In mafeba' na' Yusuf nok li' feot muinf es, in kanan bi Asnat. Na' Yusuf in babaf mone kanan na' Potifera. In es le' na'naak lais palsait anbi koot On.^b Nok lanan nane, na' Yusuf anfain atoin makana' ma mateka' anbi pah Masir.

46 Tabu sin nait na' Yusuf ate, in nmoin naan toon bo' tenu wen. Nalalit in nnao nfuun am nateef kuan-kuan ma bale-bale anbi pah Masir. 47 Anbi tabu athoes toon hiut nane, sekit ma mnonut anho-hoen. 48 Oka te na' Yusuf annao ma nakbubu' sekit ma mnonut anneisi ntein, ma nabuab sin anbin lopo le' he tabuab haot enu. Sekit ma mnonut na'ko bale-bale le' anpaumaak koot mee te, in nabuab sin anbi lopo buaba' anbi koot nane. 49 Tal antia pena ma ane le' in nakbubu' ma nabuab sin nane, mfau le'uf. On le' snaen abit tasi ninen, tal antia ka tiit fa tuaf es, le' nabe'i nsoi' naan sin.

50 Tabu amnahas fe' ka ntia fa te, na' Yusuf in fee bi Asnat nahoin li'aan mone nua. 51 On nane te na' Yusuf na'uab ma nak, “Uisneno nmoe' kau ma au 'nikan 'ain au suset, tabu au 'poi u'ko au ama' in ume.” Es na' in nakanab in aan mone 'nae, na' Manase (le' anpaumaak on le' feef es antein le' in otan, nak ‘nikan’).

52 Tabu in napein li'aan moen muni te, in na'uab antein ma nak, “Au upein suset ma nukat amfaun a'bi bale ii. Mes Uisneno anfee kau tetus, ma au uhoni 'bi ii.” On nane te in nakanab li'ana' nane, na' Efraim.^c

53 Nalalit tabu athoes toon hiut nane namsoup. 54 On nane te tabu amnahas toon hiut nane anmulai ntaam, natai nok le' na' Yusuf na'uab nani. Anbi ale' bale, amnaahs ee ntaam een, mes anbi pah Masir, anmu'i mnahat. 55 A'loo on nane te, abiit eun pah Masir anmulai namnahan. Nalalit sin annaon ma ntotin amnahat na'ko kesel. On nane te kesel anleek sin he nnaon neu na' Yusuf, he natuin in i'plenat.

56 Mes amnahas nane maneun le'uf. Ale' bale nbi pah Masir in nanan napenin amnahas ok-oke'. On nane te na' Yusuf anmulai nasoitan lopo buab haot eun, ma na'sosa pena' ma ane neu abiit eun Masir. 57 Nalalit too na'kon mee-mee neman ma nsosan amnahat na'kon na' Yusuf anbin pah Masir. Natuin tabu amnahas nane namneo-namneo maneun le'uf.