Atoin uim o'of nua sin nananain, ma na' Yusuf an'eut in otan
40
1-3 Anbi uim o'of nane, anmui' naan a'naak mepu tuaf nua le' anmeup nitan anbin kesel pah Masir in sonaf. Es na'naak mepu balab loitan bukae-mninut neu kesel; ma es antein na'naak mepu balab loitan bukae-kokis neu kesel. Sin nua sin anmo'en sanat neu kesel. Es na' kesel natoo', ma nataam sin neun uim o'of. On nane te sin nabuan bale mese' nok na' Yusuf anbin uim o'of nane. 4 Nalalit a'naak uim o'of nane naplenat na' Yusuf he n'ulus a'nakat tuaf nua le' nane. Sin nabuan anbin uim o'of nane, tal antia oin toon es ai' nua'.5 Fai yes ate, tuaf nua' eun nane nananain. Es-es ate, nok in nanait aa kuun. Ma nanait eun nane msa' sin ootk eun ka huma' mese' fa'. 6 Nokfa te, na' Yusuf neem ma niit atoin nua' eun nane, sin huum fousun. 7 On nane te in nataan sin ma nak, “Nasaa' am es neno ii hi mhuum fous on nane?”
8 On nane te sin nataah ma nak, “Fini, hai minanai'. Mes hai ka mihiin fa in otan.”
Nalalit na' Yusuf nataah sin ma nak, “Ka tiit fa mansian es, le' he nahiin nain nanait eun sin ootk eun nane, alahaa Uisneno es le' nahiin sin. M'eut miit kau hi nanait eun nane. Maut he au 'aim 'iit sin ootk eun na'ko Uisneno.”
9 Nalalit a'naak mepu balab loitan bukae-mninut neu kesel an'eut ma nak, “On ii. Au unanai' m'ak, au 'iit hau anggur uu' es, 10 tlaef teun. Hau nane nanoo, nasuuf, ma nakii ma nafua mfa-faun tal namnatun. 11 On nane te au 'iit, au 'naa' kesel in balaf klaa oe. On nane te au 'ait hau nane in fuan amnatus, ma au 'aes 'eu balaf klaa oe nane. Nalalit au 'nona' 'eu kesel he nbukae.”
12 Anneen on nane te, na' Yusuf an'etu ma nak, “Aam. Nanait nane in otan on ii: tlaef teun le' nane, in otan neno teun. 13 Anbi neno teun amnemat le' ii, kesel of napoitan ko na'ko uim o'of ii. Nalalit in nasaeb nafani' ko, he mu'naak amfain meu balab loitan bukae-mninut neu ne. 14 Kaul ho uam aa leko on nane te, kais amnikan kau, yoo! Kaul ho mneek kau te, mtulun kau he m'eut meu kesel he napoitan kau na'ko bale ii. 15 Natuin, kaul he tkius lasi ii in imneon ate, sin nait kau nok a'seke' na'ko abiit eun Ibrani sin pah. Anbi bale ii msa', au ka 'moe' fa lais amle'ut mese' msa'. Mes sin nheek kau ma nataam kau neu uim o'of, on le' atoin maufinu.”
16 Anneen nanait nane in otan leokn ee kah ate, a'naak balab loitan bukae-kokis neu kesel na'uab neu na' Yusuf ma nak, “Bae! Au unanai' msa' on ii: au 'suu kanat ktuta' teun. 17 Kanat ktuta' fafon, matua' nok kokis huma'-huma' neu kesel. Mes kolon sin neman ma neuk naan koiks eun le' anbin au 'fufuk.”
18 Anneen on nane te, na' Yusuf nataah ma nak, “Aam! Ho nanait nane in otan on ii: kanat teun eun nane, sin ootk eun neno tenu msa'. 19 Neno teun amnemat le' ii, kesel of anleek tuaf he neem ankeut nain ho 'nakam. Nalalit sin nposun ho aom a'naen nane neu nii ma'aika'. Nalalit kolon sin neman, nteo, npius ma neuk naan ho neesm aa oke.”
20 Neno tenu nfiin ite, na'euk nok kesel in neon manohit. On nane te in anmoe' fesat neu in a'naak mepu sin ok-oke'. In naplenat he sin annaon napoitan a'naak mepu tuaf nua' eun le' et eun uim o'of. 21 Nalalit in nasaeb nafani' neu a'naak balab loitan bukae-mninut, he nanaob nafani' in mepu.
22 Mes a'naak balab loitan bukae-kokis neu kesel sin nposun in aon ee, natai nok saa' le' na' Yusuf in uaban.
23 Mes a'naak balab loitan bukae-mninut nane, annikan nain na' Yusuf.