Na' Yusuf, ma kase 'naek Potifar in fee
39
1-2 Neno wes naa, atoin Ismaelas sin neik na' Yusuf annao neu pah Masir. Anbi nane, anmui' kase 'naek es, kanan na' Potifar. In le' nane, a'nakat neu ale' solauls eun le' anpao kesel pah Masir in sonaf. Na' Potifar ansoos na' Yusuf na'ko alaakn eun nane, he in naiti ye nlail ate nbi in ume. Anbi nane, UISNENO antulun na' Yusuf. Es nane te, in mepu sin ok-oke' nanaob ok nok leko. 3 In aam usif ankius na' Yusuf in mepu sin nane lo leko, in nahiin namneo-namneo nak UISNENO ntulun ma nbaab na' Yusuf. 4 Es nane te, aam usi' nane anlomi yaa na' Yusuf, ma npalsai. On nane te in nait na' Yusuf anfain apanat neu in ume. In annona' in ume he na' Yusuf an'ulus. In iblua pusaak sin, na' Yusuf es an'ulus sin amsa'. 5 Natuin na' Yusuf natua anbi nane, es na' Uisneno anfee tetus neu in aam usif, atoni Masir nane. In ume nanan, in i'maus eun, in lene-po'an, ma in mepun nane nanaob ok nok leko. 6 Tabu na' Potifar niit na' Yusuf in mepu sin leko ok-oke', in ka natenab fa saa'-saa' antein. In nahine yaa he naah.Tabu nane, na' Yusuf in aon ma in human, maasn ee kah. 7 In natua nbin fe' ka 'loo fa, mes na' Potifar in fee ye, ntao neka neun. On nane te in nhanet na' Yusuf he kaul leko te sin nua sin antupan.
8 Mes na' Yusuf ka nloim fa'. In nataah ma nak, “Kais on nane, pah! Au aam usi' Potifar anfee kau kuasat he 'ulus in ume ma mone'. 9 Anbi ume ii, ka tiit fa tuaf le' annaa' aplenat anneis kau. Aam usi' nana'at kau ale' saa'-saa' he 'ulus sin. Mes in ka nana'at ko fa neu kau. Nok lanan mee, au he 'moe' lais amle'ut le' ii? Lasi nane, nasuil nok Uisneno In i'lomin amsa'!”
10 Maski on nane msa', mes na' Potifar in fee ye noik na' Yusuf piut. Mes na' Yusuf ka ntoe natuin ee fa'.
11 Neno wes, na' Yusuf antaam neu ume he nkius mepu. Neno nane, ka tiit fa tuaf es anbi nane. 12 On nane te bifee nane neem ma nnaa' na' Yusuf in fanu' ma nheel ee ma nak, “Oum nai'! Hit nua kit atmes-mees. Oum he hit ttuup nai'.”
Mes na' Yusuf ka nloim fa'. On nane te in aukbilu', tal antia in i'fanu' nane natpuu' nain. Nalalit in naen anpoi. Mes bifee nane annaa' natau na' Yusuf in i'fanu'.
13 Tabu na' Potifar in fee niit na' Yusuf naen nasaitan in i'fanu' te, 14-15 in anboin ameupt eun, ma n'etun sin ma nak, “Hoe! Hi eim he mkius miit! Fe' le' ii, atoin Ibranis nane, antaam anbi au ke'an. In he nmoe' amle'ut neu kau, mes au 'koa' umeep-meep. Amkius miit, in naen ma npolin in i'fanu'. Au mone in nait neik kit kuun atoin maufinu ii he nmoe' namab-maeb ahaa kit!”
16 On nane te na' Potifar in fee annaa' fanu' nane, tal antia in mone nfain neem. 17 Tabu in mone nfain neem ate, in an'eutn ee ma nak, “Amneen! Atoin Ibrani le' ho mait meki ye neem nok kit nane, fe' le'ii in ntaam neu au ke'an. In he ntuup kau nok a'seke! 18 Mes au 'koa' umeep-meep ma 'boin ameupt enu. On nane te in naen namneuk ma nasaitan nain in i'fanu ii.”
19 Anneen in fee n'eut on nane te, na' Potifar natoo' niis. 20 Es nane te in nleek tuaf ma nnaon nheek na' Yusuf. Oka te sin nataam ee anbi kesel in uim o'of.
21 Mes UISNENO ka nnikan' fa na' Yusuf. Etun In ntuuln ee piut, tal antia a'naak uim o'of nane anneek nisan. 22 Nalalit in npalsai na' Yusuf. On nane te in anfee ne kuasat he n'ulus atoin o'of sin ma ale' kanan mepu anbi uim o'of nanan. 23 Es nane te, a'naak uim o'of nane in ka natenab fa meup saa'-saa' anbi uim o'of. UISNENO ntulun ma nbaab na' Yusuf piut-piut, es na' in mepu sin anbi uim o'of nanaob ok nok leko.