6 Tabu in aan mone 'nae na' Er na'nae te, na' Yahuda nnao neik 'oko mama' ma ntoitn ee li' feot muinf es, kanan bi Tamar. Oka te na' Er naan bi Tamar. 7 Mes na' Er nane atoin maufinu'. Es nane te, Uisneno anhukun na'mate. On nane te na' Er anmaet, mes ka nmui' fa anah.

8 Nalalit na' Yahuda nleun aan mone tnana ma nak, “Onan! Ho tata anmaet nalali yen, mes in ka nmui' fa anah. On nane te tabu ii, tatuin atoni mnais enu sin halat ate, ho lo he mseka' ho tata' he maan in fee. Nok lanan nane te, maut he ho muhoin li'ana neu ho tata' in paa'.”

9 Na' Onan nahiin halat nane. Mes in ka nloim fa he nahoin neu in tataf na' Er. On nane te kaul in ntuup nok bi Tamar ate, in oen aa an'opan napoitan henati' bi Tamar kais na'aup he nahoin. 10 Na' Onan anmoe' on nane, m'es nato'ab niis Uisneno. Etun Uisneno anhukun niis ne msa'.

11 Tabu na' Yahuda nkiso te in aan moen nua' eun le' naan bi Tamar nane anmaten ate, in nas'unu'. In natenab, kais-kaisa' in aan mone 'heut susu na' Sera naan bi Tamar ate, of in anmate msa'. On nane te in nnao ma n'etun in nanef bi Tamar ma nak, “Tamar! Leko nneis ho mfain meu ho mahoint enu. Kaul au anah na' Sera na'nae te, na' ho mfain oum he maan.” Nalalit bi Tamar anfain.

12 Ka 'loo fa te, na' Yahuda in fee ye anmaet. On nane te in nkae ma nsuis tal antia neon nuukt eun namsopun ate,^a in anboin in soba' na' Hira, he sin nua sin annaon neun kuan Timna. Anbi nane, atoin eun ankateel bib-kaesn eun sin fuunk eun, he na'sosa' sin. Akateels eun namfa-faun ma sin feest eun amsa'.

13 On nane te in aon bian sin an'etun bi Tamar ma nak, “Ho baba' mone annao et Timna, he n'ulus tuaf akateel funu neu in i'bib-kase sin.”

14 Tabu nane, na' Yahuda in aan mone a'heut susu na'nae yen. Mes bi Tamar nahine nlail nak in babaf mone ka nloim fa he na' Sera naan ne'. On nane te bi Tamar naim lanan he ntoit in paa'. Nalalit in anseka' nain in paek-baun eun, oka te in npaek paek leko. In npaek mau ana' ma nsakluub naan in human. Nalalit in annao ma ntook anbi eno' he ttaam teu kuan Enaim, anbi yaa le' lanan he tnao teu Timna. 15 Tabu na' Yahuda nnao npiu' kuan nane in laan 'tamas, in niit bifee yes. In natenab nak oin bifee a'onit, natuin bi Tamar in i'paekn ee on le' bifee a'oint enu. Anneis-neis in nluub naan in human. 16 Na' Yahuda ka nahiin naan fa mnak, bifee nane in nanef. On nane te in nnao npaumaak bifee nane, ma nataan ee ma nak, “Hae! Kaul ho mlomi te, au 'tuup 'ok ko'. Ho mtoit fauk?”

Mes bi Tamar nataah ma nak, “Es le' ho, pah. Ho 'loim maa on mee te, au utuin aah.”

17 Na' Yahuda nakeo ma nak, “On mee kaul au 'fee ko 'bibi yes, ho mlomi, kah?”

Nalalit bi Tamar nataah ma nak, “Leko, pah. Lamun ho mfee kau blua' es fe'. Leek'-leka' ho mfee 'bibi nane, na' ho msium mufani' ho blua' le' ho muna'at sin.”

18-19 On nane te na' Yahuda nataan anteni ma nak, “Au he 'fee ko blua' saa'?”

Bi Tamar nataah ma nak, “Ho mfee kau blua maluna' le' ho mu'heke ye nane nok nain in tanin. Oka te ho teas nane msa'.” On nane te na' Yahuda nfee blua' eun nane.

Nalalit sin nua sin ntuup nabuan. Oka te bi Tamar anfain. In nholo' nain in paek lekon nane ma in mau ana', nalalit in npaek nafani' in 'paek baun enu. Namuni te, bi Tamar nahiin nak in na'apu wen.

20 Ka 'loo fa nteni te, na' Yahuda ntoit tulun na'ko in soob leko na' Hira ma nak, “Ho meki 'bibi ii meu bifee a'onit le' et Enaim, he msium maan kau au blua' eun le' in nnaa' sin.” Na' Hira nnao ntia Enaim. In nataan neu-mneem, mes ka niit ai' na'euk fa bifee nane. 21 On nane te in nataan abiit eun bale nane ma nak, “Au he utaan 'aan, pah. Hi miit bifee a'oint es, le' biasa antook anbi kuan in eno' 'taamn ee, ai'? In et mee?”

Mes sin nataan ma nak, “Aam, ka tiit fa bifee a'onit et ii.”

22 On nane te na' Hira nfain neem neu na' Yahuda. In an'eut ma nak, “Au ka u'euk 'aan fa bifee nane. Au 'ami ma 'hae 'maet, mes abiit eun naa nak, ka tiit fa bifee a'onit anbi nane.”

23 Na' Yahuda nataah ma nak, “Maut he in paal ablua' eun nane! Lamu biak enu kais namaeba' kit. Natuin au he 'baen, mes hit ka ta'euk fa bifee nane te.”

24 Anfiin funan tenu te, tuaf bian annaon ma n'etun na' Yahuda ma nak, “Ho nanef bi Tamar nane anmoe's on, on le' bifee a'onit. Tabu ii in na'aup.”

Anneen on nane te, na' Yahuda natoo' anmaet. Oka te in nleun tuaf a'etus nane ma nak, “Amnao mheel meik kau bifee nane neem neu ii, he ttotu we 'hon-honis!”

25 Nalalit sin annaon ma nheel neik bi Tamar. Mes in nait napoitan blua maluna' ma teas nane. Nalalit in nleek tuaf he nnao ma n'eut neu in babaf mone ma nak, “Aam. Amtae mulek-leko' blua' eun le' ii fe'. Tuaf le' anmui' blua maluna' ma teas le' ii, in es le' na'apub kau.”

26 Ankius niit ablua' eun nane te, na' Yahuda nahiin nain nak blua' eun nane, lo inin. Nalalit in na'uab ma nak, “Namneo! Bifee nane ka nsaan fa'. Au es le' asanat. In ntoom. Amneon ee, au lo he mamoenb ee nok au anah na' Sera, mes au es le' ka 'lomif. Amnao mifeitn ee nai'!” Nalalit na' Yahuda ka ntuup nabua ntein fa nok bi Tamar.

27 Bi Tamar in tabu he nahoin antia yen. On nane te in nahoin li'aan kuana' nua'. 28 Tabu in nahoin, li'aan es napoitan nahunun in i'niman. Bifee atuis mahoint ee nfutun aab mee' anbi in i'niman. In nak, “Le' ii, es le' ahunut.” 29 Mes li'ana' nane anheel nataam nafani' in i'niman. Nalalit in es ee npoi nahuun. On nane te bifee atusit nane nak, “Hoe. Ho lo ma'tane, oo! Etun ho mu'seti' ma mpoi muhuun!” Nalalit sin nakanab li'ana' nane na' Peres (le' in otan nak, ‘na'seti' npoi’). 30 Nalalit na' in olif le' mafuut aab mee' nane anpoi. Sin nakanab na' Sera (in otan nak ‘mee' mtasa'’).