Na' Yakop anfain neem neu pah Kana'an
37
1-2a Le ii, na' Yakop sin nu'un. Neno naa, na' Yakop anfani ntein, ma natuan anbin pah Kana'an, le' in amaf na' Isak natua nbi nane na'ko unu'.Na' Yusuf nok in taatf enu
2b Tabu nane, na' Yakop in aanh es na'ko in fee bi Rahel, kanan na' Yusuf. Tabu in anmoin naan toon bo'es am hiut, in nok in taatf eun biasa sin nnaon ma natuuk sin i'bibin ma 'biib-kasen nabu-buan. In taatf eun, na' Yakop in fee bi Bilha ma bi Silpa sin aanh enu. Na' Yusuf le' ii, in aktuta' uab neu in amaf, anmatoom nok in taatf eun sin i'moe'k enu.
3 Tabu nahoin na' Yusuf, na' Yakop namnasi yen. Etun in nneek nanesib na' Yusuf na'ko in anah bian sin. Neno wes na' Yakop ansoo fanu mnanu es leokn ee kah,a ma anfee ye neu na' Yusuf. 4 Tabu in taatf eun nitan nak sin aamf ee nneek nanesib neu na' Yusuf ate, sin neek-menan na' Yusuf, tal antia sin ka nlomin fa he na'uab eun nokan.
5-7 Fai yes, na' Yusuf nananai'. Oka te in an'eut nanait nane neu in taatf eun ma nak, “Hae! Hi mneen fe'! Au unanai' m'ak hit tfuut hit aen-gandum sin atbi lene. Nalalit au aen leif eun le' mafuut eun nane, anfeen anhaken amneof aah. Mes hi anen anhaken nfuun naan au inin, nalalit na'luil eun ma na'besan neun au inin.” Annenan on nane te, in taatf eun anneek-menan ntenin.
8 Nalalit sin nakaina' na' Yusuf ma nak, “Hoe! Ho mak oin ho he mfain kesel he muplenat kai?” Sin nneek-menan ma'tane, natuin in an'eut nanait nane neu sin.
9 Nalalit na' Yusuf in nananai' ntein. Oka te in an'eut neu in taatf eun ma nak, “Hae! Au unanai' 'tein. Au 'iit manas, funan, ma kfuun bo'es am mese'. Sin na'luil eun ma na'besan neu kau lek-leko.” 10 Tabu na' Yusuf an'eut nalail nanait nane neu in amaf ma in taatf enu te, in aamf ee nakain na' Yusuf nok ma'tane' ma nak, “Nanait saa' es le' nane! Ho mutenab mak, au 'ok ho eina' ma ho tata' sin eim he mneek ho haem eun nane, ai'? Ho loimt aa on nane yah?!” 11 On nane te na' Yusuf in taatf eun nneek-menan namneo-namneo. Mes in aamf ee natenab nanait eun nane anbi in nekan.
Sin na'sosa' na' Yusuf he nlail ate anbi pah Masir
12 Neno wes, na' Yusuf in taatf eun neik sin aamf ee in i'bibin ma 'bib-kasen annaon npaumak-maak kuan Sikem. 13 Ka 'loo fa te, in aamf ee nak, “Usu! Ho taat enu natukun mu'it anpaumak-makan et eun Sikem. On nane te ho muloitan he mnao mkius miit sin fe'.”
Na' Yusuf nataah ma nak, “Leko, aam.”
14 Oka te in aamf ee nak, “Ho mnao mkius miit ho tata sin nok mui't eun fe'. Sin ona mee? Lekon, ai' on mee? Oka te ho mfain oum he m'eut kau.”
On nane te na' Yusuf annao nasaitan amnela' pah Hebron ma nfini ntia Sikem. 15 Antia naa te, in naim sin anfuun am nateef anbin amnela' huun nane. Tabu in na'euk tuaf es, tuaf nane nataan ee ma nak, “Ho maim saa?”
16 Na' Yusuf nataah ma nak, “Aam, au 'aim au taat enu. Sin anpoo' neik hai mui't eun he nhao sin anpaumak-maak anbin bale ii. Ai' ho miit sin, pah?”
17 Tuaf nane nataah ma nak, “Sin ka et eun fa ii ntenin. Mes sin nak he nnaon ntenin anpaumaak kuan Dotan.”
Nalalit na' Yusuf annao natuin sin, tal in niit sin anbin Dotan. 18 Mes tabu na' Yusuf fe' anbi 'loo, sin niit nani. On nane te sin nma'akol eun he nlolo. 19 Nalalit sin na'uab eun ma nak, “Hi mkius miit. Ananait ee neem een! 20 Neu' eim nai' he tlool tisan. Oka te hit tait itpolin neu 'bool nain es anbi ii. Nalalit hit 'etun ama' mtak, mui' fui nuu anpisu ma neku nlali yen! Maut he hit tkius tiit in nanait eun on mee!”
21 Anneen on nane te, in tataf na' Ruben naim lanan he nafetin naan na' Yusuf. On nane te in nakaina' in oilf enu ma nak, “Hae! Hit kais atlolo. 22 Leko nneis, hit t'okal tataam ee neu 'bool nain le' ii. Bale ii, bael luman. On nane te ka tiit fa tuaf le' nahiin mo'et ii. Lamu hit kaisa' tapapa' he naa' ee nsai'.” In na'uab on nane, natuin in he nafetin na' Yusuf he nlenu we he nfain.
23 Tabu na' Yusuf neem antia te, sin anheke ma nholo' nain in i'faun leko nane. 24 Nalalit sin nkini' ma n'okal nataam ee neu 'bool nain nane.
25 Nalalit sin nfain-kotin ma nbukaen. Sin fe' anbukaen ate, nok askeken sin niit atoni puukn es neman. Pukan amneemt eun nane anpaken bikaes unta. Sin nasaeb eun ablua' he nlaakn eun. Blua 'soos eun nane es eun le': hau foo bona' in oen, bumbu huma'-huma', ma le'u huma'-huma'. Ankis-kison ate, pukan amneemt eun nane, atoin Ismaelas sin le' neman na'kon kuan Gileat. Sin he nnaon neu bale 'loo neun pah Masir.
26 Nalalit na' Yahuda na'uab neu in olif ma in tataf sin ma nak, “Hae! Leko nneis on ii. Hit kais atlolo. Hit tapein saa'? Maski on mee msa', hit ka neu he ta'tolo' taan fa in naa'. 27 Leko nneis hit ta'soos ee teu atoni Ismaelas sin. Maski hit tmo'e on mee msa', hit oil honi. On nane te hit kaisa tapapa'.” Nalalit sin nmatutan lasi nane.
28 On nane te tabu atoin alaakn eun nane he nfinin ate,b na' Yusuf in taatf eun anheel napoitan na'ko 'bool nain nane. On nane te sin na'soos ee neu atoni Ismaelas sin. In upan noin muti' fuan bo' nua'.c Nalalit alaakn eun nane neik na' Yusuf antian pah Masir.
29 Tabu sin na'sosa' na' Yusuf ate, na' Ruben ka nahiin fa'. On nane te tabu in nnao neu 'bool nain nane te, in naskeek, natuin na' Yusuf ka nbin ee fa yen. Nalalit in npius naklati' in paken anbi in aon, natuin in nsuse nmaet. 30 Nalalit in nfain-koit neu in oilf eun ma nak, “Ailoo! Na' Usu ka et fa 'bola. Tabu ii au he u'sa'a a'tein?”
31 Nalalit sin nlolo 'bibi yes. Sin nait na' Yusuf in i'faun leko nane, ma nateep ee neu naa' nane. 32 Nalalit sin naiti' faun manaa' nane ma neki neu sin amaf, ma natonan ma nak, “Aam! Hai maiti' fanu' ii. Amkius miit ee. Kais-kaisa' na' Usu in i'fanu'.”
33 Ankius fanu' nane te, na' Yakop nahiin nain neu in aanh ee fanu'. On nane te in nataah ma nak, “Ailoo! Namneo, au aanh ee in i'fanu' es le' ii. Ka tahiin fa neu mui' fui nuu npius niis ne et mee. Ailoo! Au aanh ee nmaet nalali yen!”
34 Nalalit na' Yakop anpius naklati' in pake ma ntainuus a'kalo' natuin in nsuse ma nkuul.d In nkae nme'-me'ul a'loo neu in anah nane. 35 In aan mone ma aan feto neman ma nhaliin, mes ka nabei' naan ye fa. In na'uab ma nak, “Kahaf! Au of a'suse ma 'kuul tal antia au 'maet. Natuin au ka neu he 'nikan' fa au anah le' ii.” On nane te na' Yakop ansuse ma nkuul piut, natuin in namnau in anah na' Yusuf.
36 Tabu fe' na' Yakop ansuis on nane te, alaakn eun nanee antian nlalin pah Masir. Sin neik na' Yusuf ma na'soos ee neu kase 'naek es, kanan na' Potifar. In le' ii, kesel pah Masir in i'naak a'paot.