Na' Esau in sufan ma in ka'un
36
Na' Esau in sufan ma in ka'un sin es eun le' ii. In kanan es antein, es le' na' Edom. 2 Na' Esau naan li' feot munif nua' na'kon pah Kana'an. Tuaf es, bifee na'ko atoin Hetes, kanan bi Ada, na' Elon in aan feto. Es antein atoin Hewis. In kanan bi Oholibama. In amaf, kanan na' Anah, ma in na'if, kanan na' Sibeon. 3 Na' Esau naan na' Ismael in aan feto wes amsa', kanan bi Basmat. Bi Basmat in naof ee, es le' na' Nebayot.4 Na' Esau in fee 'naek, bi Ada, nahoin na' Elifas. Bi Basmat nahoin na' Rehuel. 5 Oka te bi Oholibama nahoin na' Yeus, na' Yaram, ma na' Kora. Na' Esau in aanh eun ok-oke', nahoin sin anbin pah Kana'an.
6 Neno wes, na' Esau na'oina' neu pah a'teta es, na'loo na'ko na' Yakop. In neik in fee nuu ma in aanh eun, ameupt eun, mu'it ma 'mui'f eun ok-oke'. 7 Na' Esau nbaits on nok in olif na' Yakop, natuin sin mui't eun namfaun, ma sin i'mu'ik bian, amfaun ee kah. On nane te sin naheun bale nane yen. 8 Etun na' Esau (es le' na' Edom), annao natua nbi netun abiit Seir.
9 Na' Esau in sufan ma in ka'un sin, le' sin nteek nani ye ma nak, ‘atoni Edomas’, es eun le' ii: sin natuan anbin netun et Seir.
10-13 Na' Esau in fee bi Ada, nahoin li'aan mone yes, kanan na' Elifas. Na' Elifas in aan monen tuaf niim, es eun le': na' Teman, na' Omar, na' Sefo, na' Gatam ma na' Kenas. Na' Elifas anmui' fee panu', kanan bi Timna. In nahoin li'aan mone yes, kanan na' Amalek.
Na' Esau in fee bi Basmat nahoin li'aan mone yes, kanan na' Rehuel. Na' Rehuel nahoin aan mone haa', es eun le': na' Nahat, na' Sera, na' Sama, ma na' Misa.
14 Na' Esau in fee bi Oholibama, le' na' Anah in aan feto, ma le' na' Sibeon in upuf nane, nahoin li'aan mone teun, es eun le': na' Yeus, na' Yalam, ma na' Kora.
15-16 Na' Esau in sufan ma in ka'un sin anbaits ok amfaun ma nlalin uuf-uuf. Es-es ate nok kuun sin i'naak uuf. Na' Esau in aan mone 'nae na' Elifas aanh enu, nlalin a'nakat neu uuf Teman, a'nakat neu uuf Omar, a'nakat neu uuf Sefo, a'nakat neu uuf Kenas, a'nakat neu uuf Kora, a'nakat neu uuf Gatam, ma a'nakat neu uuf Amalek. Sin aal sin le' nane, na' Esau nok in fee bi Ada sin suufk enu.
17 Na' Esau in anah na' Rehuel in aanh eun anlalin a'nakat neu uuf Nahat, a'nakat neu uuf Sera, a'nakat neu uuf Sama, ma a'nakat neu uuf Misa. Sin aal sin le' nane, na' Esau nok in fee bi Basmat sin suufk enu.
18 Na' Esau nok in fee bi Oholibama sin aanh eun, anlalin a'nakat neu uuf Yeus, a'nakat neu uuf Yalam, ma a'nakat neu uuf Kora.
19 Uuf eun le' nane ok-oke', na' Esau in sufan ma in ka'un sin.
Na' Seir in sufan ma in ka'un
20-21 Anbi bale nane amsa' anmui' naan atoin Horis es, in kanan na' Seir. In aanh eun anbaits ok anlalin uuf-uuf amfaun, es-es ate nok in a'nakat. Nalalit in aanh eun anlalin a'nakat neu uuf Lotan, a'nakat neu uuf Sobal, a'nakat neu uuf Sibeon, a'nakat neu uuf Anah, a'nakat neu uuf Dison, a'nakat neu uuf Eser, ma a'nakat neu uuf Disan.
22 Na' Lotan in aanh eun, es eun le': na' Hori, ma na' Heman (na' Lotan in fetof es le' bi Timna).
23 Na' Sobal in aanh eun, es eun le': na' Alwan, na' Manahat, na' Ebal, na' Sefo, ma na' Onam.
24 Na' Sibeon in aanh eun, es eun le': na' Aya, ma na' Anah. Na' Anah, in es le' niit oe maat maputu' anbi bael sona' tabu in natuuk in aamf ee bikaes keledai sin.
25-26 Na' Anah in aan feto es le', bi Oholibama. Ma in aan mone es le' na' Dison. Na' Dison in aanh enu, es eun le': na' Hemdan, na' Esban, na' Yitran, ma na' Keran.
27 Na' Eser in aanh eun, es eun le': na' Bilhan, na' Sa'aban, ma na' Akan.
28 Na' Disan in aanh eun es eun le': na' Us ma na' Aran.
29-30 On nane te a'naak uuf eun atoin Horis sin, es eun le': na' Lotan, na' Sobal, na' Sibeon, na' Anah, na' Dison, na' Eser, ma na' Disan. Sin aal sin natuan anbin pah Seir.
Pah Edom in kesel sin
31 Tabu pah Israel fe' ka nmui' fa kesel ate, anbi pah Edom anmu'i nlail kesel. Sin kaank eun anmaka'tui eun, es eun le':
32 Sin nait na' Beor in anah na' Bela, anlail kesel anbi koot Dinhaba.
33 Tabu na' Bela anmaet, na' Yobap anseka' anlail kesel. In amaf, kanan na' Sera na'ko kuan Bosra.
34 Tabu na' Yobap anmaet, na' Husam anseka' anlail kesel. Na' Husam nane, na'ko atoin Temanas sin pah.
35 Tabu na' Husam anmaet, na' Hadat anseka' anlail kesel. In amaf, kanan na' Bedat na'ko kuan Abit. (In le' nane, es le' niis atoin Midianas sin, tabu sin nmakenan anbin pah Moap.)
36 Tabu na' Hadat anmaet, na' Samla anseka' anlail kesel. Na' Samla nane, na'ko kuan Maslela.
37 Tabu na' Samla anmaet, na' Saul anseka' anlail kesel. Na' Saul nane na'ko kuan Rehobot et noe in ninen.
38 Tabu na' Saul anmaet, na' Ba'al-Hanan anseka' anlail kesel. In amaf, kanan na' Akbor.
39 Tabu na' Ba'al-Hanan anmaet, na' Hadar anseka' anlail kesel. Na' Hadar nane, na'ko kuan Pau. In fee kanan bi Mehetabel. Bi Mehetabel in amaf, kanan na' Matret. Ma in na'if kanan na' Mesahap.
40-43 On nane te a'naak uuf eun le' anpoin ma mbolan na'kon na' Esau in sufan ma in ka'un sin es eun le': na' Timna, na' Alwa, na' Yetet, na' Oholibama, na' Ela, na' Pinon, na' Kenas, na' Teman, na' Mipsar, na' Magdiel, ma na' Iram. Sin es-es ate, nakanab sin pah anpaek kuuk sin kaank enu.
Oka te sin le' nane ok-oke', na' Esau in sufan ma in ka'un. Na' Esau anfani aam uuf neu atoin Edomas sin.