Na' Yakop sin naenan neun Betel
35
Nalalit Uisneno nakua' a'an neu na' Yakop ma nak, “Au le' ii, Uisneno le' nakliil On neu ko, tabu ho maen mu'ko ho tata na' Esau. Tabu ii, ho mnao nai' mu'ko bale ii meu Betel. Amtia naa te, ambaik mei 'tulu' ma mfee fua'-tulu' meu Kau. Oka te ho mutua mubalah ambi nane nai'.”2-3 Nalalit na' Yakop na'uab nok in ume nanan ok-oke' ma nak, “Tabu ii, hit he tnao teu Betel. Nahunu te, tabu au' bi suset ma neek as'unu', Uisneno ntulun kau nbi naa. Au he 'moe' mei 'tulu' a'bi bale nane. On nane te tabu ii, hi mait impolin hi faut-le'un le' maluun eun oke'. Miknino' hi ta'um, ma mseka' hi blua-paken, natuin hit he ta'luli' ma ta'bees teu Uisneno.” 4 On nane te sin annona sin faut le'un le' maluun eun ma sin faoln aa msa'.a Nalalit na' Yakop ansium sin ma nsuub sin anbi hau 'naek es in uun, anpaumaak kuan Sikem. 5 Tabu na' Yakop sin nnaon nasaitan Sikem, Uisneno nfee lasi mtaus neu too pah anfuun am nateef, tal antia sin ka nbalanin fa he ntaon lais amle'ut neu na' Yakop sin.
6 On nane te na' Yakop nok in too pukan nane, antian nok mamut anbin Betel et pah Kana'an. (Betel nane, nahunu te, in kanan Lus.) 7 Anbi nane, na' Yakop anbakin fatu anlail mei 'tulu'. Nalalit in nakanab bale nane nak El Betel (le' in otan nak, ‘Betel in Uisneno’), natuin nahunu te Uisneno nakliil On neu na' Yakop anbi nane, tabu in naen nasaitan in tataf.
8 Anpaumaak kuan Betel, anmui' hau uu' 'naek es le' atoni nakanab Aron Bakut. In otan nak, ‘hau kulut-kaet’. In napein kanaf nane, natuin tabu bi Ripka in bifee abha'et, es le' bi Debora anmaet, sin nsuub anbi hau nane in uun.
9 Neno wes, tabu na' Yakop anfain neem een na'ko Padan Aram, Uisneno nakliil On antein, ma anfee ne tetus-athoes. 10 Uisneno nakua' a'an ma nak, “Anmulai tabu ii, ho kanam ka na' Yakop antein fa yen. Mes Au ukanab ko 'eik kaan feu' es, es le' Israel.b 11 Au le' ii, Uisneno le' Akuasat Afin-finit. On nane te ho muhoin ma musuuf amfa-faun. Uuf-uuf ma pah-pah of anpoin ma mbolan na'kon ho sufam ma ho ka'um sin. Ma ho of muhoin maan kesel-kesel amsa'. 12 Pah le' nahunu te Au 'fee ye 'eu ho nai' na' Abraham ma ho ama' na' Isak nane, tabu ii Au 'fee ko, ma ho sufam ma ho ka'um sin.”
13-14 Uisneno nakua' nalail a'an ate, na' Yakop nahakeb fatu nbi nane, he nlali 'taka' he namnau Uisneno In lais manba'an. Oka te in n'oop tua miin-kase ma mina' anbi fatu nane, ma n'onen neu Uisneno. 15 In nakanab bale nane, Betel.
Na' Yakop in fee bi Rahel anmaet tabu nahoin
16 Nalalit na' Yakop sin annaon nasaitan Betel. Tabu sin he nuu nhaumaak kuan Efrata (es le' Betlehem), antia in tabu he bi Rahel nahoin. Mes in nahoin nok suset. 17 Tabu in fe' namenu won ate, bifee atusit an'etun ma nak, “Ein Rahel! Amha'taen ho nekam. Ho aanh ee mone!” 18 Tabu bi Rahel he nuu nmaet, in nakanab li'ana' nane, na' Ben-Oni (le' in otan, nak, ‘li'ana' na'ko au suset ma au nukat’). Nalalit in isnasan natfeek. Mes na' Yakop nakanab li'ana' nane, na' Benyamin (le' in otan nak, ‘li'ana' anbi au 'nimak a'ne'u’).
19 Nalalit sin nsuub bi Rahel anbi lanan le' he tnao teu Efrata in ninen, (le' tabu ii in kanan Betlehem). 20 Oka te na' Yakop nahakeb faut nate es anbi nane. Bi Rahel in faut nate nane, fe' etan tal antia tabu ii.
Na' Yakop in aanh enu
21 Nalalit na' Yakopc na'oina' bale piut-piut. Neno wes, in nahakeb uum-ume' anbi bael paot le' ma'aiti' Eder in aon bian. 22 Tabu sin anbin nane te, na' Ruben antuup nok in amaf in fee panu' bi Bilha. Na' Yakop nahiin lasi nane.
Na' Yakop in aan monen, tuaf bo'es am nua'.
23 Bi Lea in aanh eun es eun le': na' Ruben (na' Yakop in aan mone 'nae), na' Simeon, na' Lewi, na' Yahuda, na' Isaskar, ma na' Sebulon.
24 Bi Rahel in aanh eun es eun le': na' Yusuf ma na' Benyamin.
25 Bi Rahel in ate bi Bilha in aanh eun es eun le': na' Dan ma na' Naftali.
26 Nalalit bi Lea in ate bi Silpa in aanh eun es eun le': na' Gat ma na' Aser.
Nahonis li'aan eun nane anbin Padan Aram.
Na' Yakop in amaf na' Isak nasaeb on
27 Nalalit na' Yakop annao ma nkius in amaf na' Isak anbi Mamre anpaumaak kuan Kiryat-Arba (kuan nane, tabu ii, in kanan Hebron). Nahunu te, in na'if na' Abraham natua nbi bale nane msa'. 28-29 Na' Isak anmoin naan toon nautn es am bo' fanu te (180), na' in inmaet. Oka te in anah na' Esau ma na' Yakop, ansuub ee.