5 Tabu Na' Yakop anneen nak anmui' atoni yes anheek ma nalelab in aan feto ma ntuup nokan, in ntaa'-taa' aah kuun, ma ka nmoe' fa saa'-saa'. Natuin tabu nane, in aan monen natukun mu'it anbin amnela' huun. Es nane te in anpao sin tal sin neman ok-oke'.

6 Tabu nane, na' Sikem in amaf na' Hemor, neem neu na' Yakop, he ntaam antoit bi Dina. 7 Tabu sin nua sin na'uab eun ate, na' Yakop in aan monen anfain neman na'kon amnela' huun. On nane te tabu sin nnenan nak na' Sikem anheek ma nalelab sin fetof ma ntuup nokan, sin neek eun namenan, ma sin natoo' nisan. Nalalit sin na'uab eun ma nak, “Lasi on le' nane, ka nabei' fa he nlali nbi pah Israel! On nane te ka nabei' fa he hit atta'an moe' amle'ut on le' nane.”

8 On nane te na' Hemor anhanet na' Yakop ma nak, “Aam Ako! Namneo, au anah na' Sikem antao nekan neu ho aan feto bi Dina. In nloim he naan. On nane te au 'toit ko henati' mfee kai ho anah bi Dina he au anah na' Sikem naan. 9 Kaul leko te, hit aanh eun anmaka'aan eun. Hi aan monen naan hai aan feton. Ma hai aan monen, naan hi aan feton. 10 Maut he hi mitua mibua mok kai msa' ambi le' ii. Hi mloim kiim he mitua mbi mee-mee yah. Nalalit hi misosa' ma mipeni 'mu'if ambi ii.”

11-12 Nalalit na' Sikem na'uab nok bi Dina in amaf, ma in naof eun ma nak, “Hi mtoit saa'-saa' aah, au utuin ki. Hi he mtoit loit he abtai ufani' bi Dina, ma noni fak-fauk aah, au 'baen! Lamu hi mloim he au 'aan hi feto'.”

13 Mes na' Yakop in aan monen nahine nlalin nak na' Sikem anheek ma nalelab bi Dina ma ntuup nokan. On nane te sin na'uab anlolon na' Sikem ma in amaf na' Hemor. 14 Sin nataah ma nak, “Ka nabei' fa he hai mamoneb hai feto' nok atoni le' ka ma'heli' fa'! Lasi nane, namaeb kai! 15 Mes in laan a'poi' ne on ii. Hi atoni bale ii, et li'ana ma 'naek, lo he mi'heli' on le' hai'. 16 Kaul hi mmoe' on nane te, na' hit ma'anan bian am bian. Ma hai of mitua mibua mok ki msa' ambi ii, he hit aal kit atlail on le' pah mese'. 17 Mes kaul hi ka mmoe' mituin fa hai 'loim eun, ma ka mloim fa he mi'heli' te, hai msium mifani' hai feto', oka te hai mnao misaitan bale ii.”

18 Na' Hemor ma na' Sikem ansium sin uabk eun nane nok leko. 19 Mes na' Sikem ka nalan naan fa in nekan, natuin in ntao nekan bi Dina. Abiit eun pah nane antola' na' Sikem amsa'. 20 On nane te na' Hemor ma na' Sikem annaon neun bale feek lasi kuan nane, et eno' 'naek he ttaam teu kuan, ma nabuan ma na'uab eun nok abiit eun pah nane. Sin na'uab eun ma nak, 21 “Au aok-bian aal ki! Atoin Israelas sin le' ii anlomin he anmonin nabu-buan nok kit anbin mamut. On nane te maut he sin natuan nok kit anbin hit pah le' ii. Hit pah le' ii suuk manuan neu kit ok-oke'. Hit aan monen nabei' naan sin aan feton. Ma sin aan monen amsa' nabei' naan hit aan feton. 22 Sin ala ntotin lais aan'-aan' es na'ko kit. Lasi nane es le', hit ala kit atoni et ko li'ana ma 'naek, mnasi ma munif lo he ta'heli' on le' sin. 23 Kaul hit tmoin tabu-bua tok sin, sin mui't eun, ma sin i'mui'k eun ok-oke' anlalin hit pusaak eun amsa', ai'? On nane te leko nneis hit tsium sin haan totis nane. Eim he aal kit ta'heli' ok-oke'! On mee? Hi mlomi, kah?”

24 Nalalit atoin eun le' nabuan anbin nane, anloim natuin na' Hemor ma na' Sikem sin uabk eun nane. On nane te atoni eun bale le' nane, sin na'heil eun ok-oke'.

25 Neno tenu te, tabu sin npaap eun fe' namenan, bi Dina in naof na' Simeon ma na' Lewi, nait neik sin suin eun ma ntaman amnees am mnees neu kuan nane. Oka te sin nlool niis atoin eun nane oke'. 26 Na' Hemor ma na' Sikem amsa', sin nlool niis sin. Nalalit sin nok nafani' sin fetof bi Dina na'ko na' Sikem in ume, ma nfanin neun sin ume.

27 Nalalit na' Yakop in anah bian sin, antaman neun pah nane, ma nasiik neik pah nane in nesan. Sin nato'an, natuin anmui' tuaf anheek ma nalelab sin fetof ma ntuup nokan anbi bale nane. 28 Sin nasiik neik biak eun sin iblua' eun oke' na'kon sin umen naank enu. Ma sin anpoo' neik biak eun sin mui't eun amsa' na'kon amnela' huun. 29 Sin nheek neik bifee nuu, li'aan enu, ma nasiik pah nane in iblua ma'uup eun ok-oke'.

30 Tabu na' Yakop nahiin lasi nane te, in na'uab neu na' Simeon ma na' Lewi ma nak, “Nasaa' am es hi mmoe' maan kit lais amle'ut ii? Hi misuseb kau'! Of abiit eun Kana'an, abiit eun Peris, ma ale' abiit eun pah le' ii, nato'an niis kau'. Sin nmu'in tuaf amfaun. Hit ala fua' fauk aah. Kaul sin neman nbius kit ite, hit tle'u tfiin.”

31 Mes sin nataah neik haan to'as ma nak, “Aam! Ho muteenb ate, mak ai' hai he mifetin sin he nmoe' hai feto on le' bifee a'onit?”