Na' Yakop na'euk in tataf na' Esau
33
Neno nane, na' Yakop niit na' Esau neem neik atoni tuaf natun haa'. Nalalit in anbait in aanh eun es-es ate nok sin einaf. 2 In nahunub in fee panu' sin nane nok sin aanh eun antoman maat. Oka te bi Lea nok in aanh eun, na' anbi muni' te, bi Rahel nok in anah na' Yusuf. 3 Mes na' Yakop annao nahun-huun anbi maat. Tabu he nuu npaumaak in tataf ate, in nli'tuu ma na'bees naktein-teni hae' hiut.4 Mes tabu na' Esau niit in olif na' Yakop, in nan-naen aah he na'eku. Oka te in nhoo ma nneek suuk a'loo. Ma sin nua sin ankaen nmeu-meul eun. 5 Tabu na' Esau niit bifeen nane ma li'aan eun nane te, in nataan ma nak, “Tuaf amfa-faun ii, sekau nuu?”
On nane te na' Yakop nataah ma nak, “Sin le' ii, tuaf eun le' Uisneno nfee sin neu ho ate kau.”
6 Nalalit in fee paun eun nane, ma sin aanh eun neman ma na'besan neun na' Esau. 7 Oka te bi Lea nok in aanh eun neman ma na'besan neun na' Esau. Namuni te, na' Yusuf nok in einaf bi Rahel neman ma na'besan neun na' Esau.
8 Nalalit na' Esau nataan ma nak, “Pukan ahuunt eun le' ho mleun sin neem nahuun ma nekin mu'it nane, ho sailt ee saa'?”
Oka te na' Yakop nataah ma nak, “On ii, taat! Au 'fee ko sin luum-luumn aah, henati' ho msium kau nok neek manuan ma malinat.”
9 Mes na' Esau nataah ma nak, “Ako! Au 'mui'k eun amfaun amsa'. On nane te kais amfee kau saa'-saa'.”
10 Nalalit na' Yakop nataah ma nak, “Taat honi, kais mutenab on nane. Ho lo mees he msium sin, he nfani 'taka' nak, ho msium kau nok 'nima' nua'. Natuin tabu au 'iit ko mkumain fe' le' ii, on le' au 'iit Uisneno ankumain. 11 On nane te au 'toit ko taat honi, maut he ho msium au halian le' nane, natuin blua' eun nane sin ka ma'uup eun fa'. Uisneno nneek niis kau, es na' In anfee kau ale' saa'-saa', natuin au 'paluut enu.” Na' Yakop anhanet in tataf na' Esau, tal antia in anloim. On nane te na' Esau ansium halian le' nane.
12 Nalalit na' Esau na'uab ma nak, “Kaul on nane te, hi miloitan he tnao nai'! Au of a'nao u'aat ki'.”
13 Mes na' Yakop nataah ma nak, “Paliis kuun, taat. Amkius kuum. Li'aan eun fe' ba-baun eun. On nane te sin ka neu he nnaon fa lab-laab. Mu'it bian fe' nahonin. Kaul hit talelab sin he nnaon lab-laab neno mese' ahaa te, mui't eun ii of anmaten oke'. 14 On nane te leko nneis, ho muhuun. Hai mnao kle'-le'o ma mituin ki ambi hi kotim. Au of 'oum he 'kius ko 'bi Seir.”
15 Nalalit na' Esau na'uab antein ma nak, “Kaul on nane te, au 'ain au ameput bian he nok ko, he sin nlalin atoon lanan neu ki.”
Mes na' Yakop nataah ma nak, “Kais muhaeb om! Lamu au uhine 'lail 'ak ho msium kau wen.”
16 Anneen on nane te, na' Esau nnao nasaitan sin, he nfain neu Seir. 17 Mes na'ko bale nane te, na' Yakop annao neu Sukot. Anbi nane, in anmoe' ume, ma nmoe' o'of neu in mui't eun ok-oke. Etun sin nakanab bale nane, Sukot (le' in otan nak ‘ume le' he natuan ntaah eun’).
18 On nane te na' Yakop sin antian nok ao-mina neun kuan Sikem et pah Kana'an, na'kon Padan Aram. Nalalit sin nahaekb eun uim la'at, ma natuan anpaumak-maak kuan nane. 19 Nain le' sin natuan le' nane, na' Yakop ansoos nafeek na'ko na' Hemor, na' Sikem in amaf. In nbaen neik noin muti' fuan nautn es. 20 Anbi nane, in anbaik fatu he nmoe' mei 'tulu'. Nalalit in nakanab bale nane, El-Elohe-Israel in otan nak, ‘Uisneno nane, Israel in Uisneno’).