Na' Yakop namtau neu he na'euk nok in tataf na' Esau
32
Nalalit na' Yakop sin nnaon nfinin. On nane te Uisneno In ameupt eun na'kon neno tunan neman ma na'euk nokan. 2 Tabu niit sin ite, in na'uab ma nak, “Bale le' ii, Uisneno In solauls eun bale snasat!” Etun sin nakanab bale nane, Mahanaim, (le' in otan nak ‘bale snasat nua'’).3 Nalalit na' Yakop anleun in ameput tuaf fauk annaon nahunun neun pah Edom (es le' Seir), he nfee hanaf neu in tataf na' Esau, nak in he neem. 4 Na' Yakop na'uab neu in ameupt eun nane ma nak, “Hi mnao meik hanaf meu au tata' na' Esau mmak, ‘Aam Esau! Ho ate na' Yakop kau a'fee haan tola' 'eu ko, pah. Na'ko afi unu' tal antia tabu ii, ho ate kau, utua 'bi hit baba na' Laban in ume. 5 Tabu ii, ho ate kau ii, a'mui' biya, bikaes keledai, 'bibi, ma 'bib-kase. Au 'mui' ate msa', et ko atoni ma bifee. Au 'leek tuaf eun le' ii, he neik ko hanaf, nak au he 'oum. Au ufneek a'bi au nekak, henati' ho msium kau 'nima' nua', pah.”’ On nane te tuaf eun nane annaon.
6 Tabu sin nfain neman neun na' Yakop, sin nekin hanaf am nak, “Hai mnao mi'eku mlail mok ho tata na' Esau. Tabu ii in neem ma nok tuaf natun haa', he na'euk nok ko, pah.”
7 Anneen on nane te, na' Yakop in nekan sebo-sebo, ma in namtau nmaet. Nalalit in anbait in ameupt eun ma mui't eun ok-oke', anlalin pukan nua'. 8 In natenab ma nak, “Kaul na' Esau neem ma nbius pukan ahunut, pukan amunit naenan he napenin fetin.”
9 Nalalit na' Yakop an'onen ma nak, “Koi, Uisneno! Usi' le' au nai' na' Abraham ma au ama' na' Isak na'luli' ma na'bees neu Ko! Amneen maan kau fe', ahoit. Uisneno, afi neno, Ho es le' mleun kau he 'fain 'oum 'eu au ume ma au fomili 'bi pah le' ii. Ho es le' amba'an kau mmak, Ho of am'atol he muleko' sin ok-oke. 10 Au le' ii, atoin ka maso'ik fa, mes Ho manekam meu kau nabal-baal. Nahunu te, tabu au 'laak noe Yarden le' ii, au 'eki yaa teas. Mes tabu ii, au 'fain 'oum 'eik tuaf pukan nua' ma mu'it amsa'. 11 Au umtau', kais-kaisa' au tata' na' Esau neem ma nbius niis kai'. On nane te au 'toit Ko Usi' he mufetin maan kai na'ko na' Esau in i'niman. Hai aal kai es le': au, au fee nuu, au anah sin, ma au ate sin ok-oke'. 12 Usi', Ho es amba'an mak, Ho es amfee kau tetus anho-hoen, ma mfee kau sufa' ma ka'uf on le' snaen et tasi ninen, le' biak eun ka nsoi' nabei' fa sin, pah.”
13 Nalalit na' Yakop antuup anbi bale nane. Nokfa te, in naloitan mu'it he nhalia sin neun in tataf. 14 In npiil naan a'bib einaf natun nua', 'bib keso bo' nua', 'bib-kaes einaf natun nua', 'bib-kaes keso bo' nua', 15 bikaes unta einaf bo' teun nok in aanh eun le' fe' ansusun, biya einaf bo' haa', biya keso bo'es, bikaes keledai einaf bo' nua', ma bikaes keledai mone bo'es. 16 Nalalit, in anbait mui't eun nane, huum es ate puukn es. In nfee pukan es ate nok in atukus. In n'etun sin ma nak, “Hi mnao mihuun. Au utuin ki 'bi hi kotim. Hi mnao, mes puukn es nok puukn es ate suuk anmaka'loon.”
17 Nalalit na' Yakop naplenat a'nakat neu pukan ahunut ma nak, “Kaul au tata' na' Esau na'euk nok ko, ma in nataan ma nak, ‘Ho he mnao meu mee? Sekau in ameput, es le' ho'? Mui't eun le' ii, sekau inin?’ 18 Ho mutaah ma mak, ‘Mui't eun le' ii, ho ate na' Yakop inin, pah. In nfee sin neu in tataf, aam usi' na' Esau. In namuin.”’ 19-20 In naplenat on le' nane amsa' neu atukus pukan bian ma nak, “Kaul hi mi'euk mok au tata' na' Esau, hi mnona' mui't eun le' ii. Oka te hi m'etun mak, au umuin.” Na' Yakop natenab ma nak, kaul in anfee mui't eun le' nane ok-oke' te, na' Esau of nekan ansaisuum. 21 On nane te in nfee mui't eun nane nahunun. Mes mabe' nane, in ntuup nabalah anbi nane.
Na' Yakop nok Uisneno anma'uub eun
22 Mabe' nane, na' Yakop anfeen ma n'atol in fee nuu nua sin, in fee panu' sin, ma in aanh eun bo'es am mese', he sin nnaon nlakan neun noe Yabok in ninen. 23 Tabu sin aal sin antian noe nane in ninen, in nsonu' in pusaak eun ok-oke' neun pai naa.
24 Mes na' Yakop na'maika' anmees anbi noe in ninen. Oka te atoni yes neem. Atoni nane nok na' Yakop anma'uub eun anbi nane, tal antia nuu nmeu. 25 Tabu atoni nane natenab nak, na' Yakop he niis een ate, in ntuuf na' Yakop in i'bokon, tal antia in nuif pusun uun anta'seu' anpoi na'ko in talun. 26 On nane te atoni nane na'uab ma nak, “Mufetin' kau. Kle'o wes ate manas he npee' een.”
Mes na' Yakop nataah ma nak, “Ho mu'uab amfee kau tetus fe', na' au ufetin' ko.”
27 On nane te atoni nane nataan ma nak, “Ho kaanm ee sekau?”
In nataah ma nak, “Na' Yakop.”
28 Nalalit atoni nane na'uab ma nak, “Ho kanam nane, ka na' Yakop fa yen. Mes anmulai tabu ii, atoni anteek ko nak, na' Israel (le' in otan nak, ‘anma'uba nok Uisneno’), natuin ho mma'uba ma'tane' mok mansian ma mok Uisneno, tal antia ho miis.”
29 On nane te na' Yakop nataan ma nak, “Ho kaanm ee sekau?”
Mes atoni nane nataah ma nak, “Ho he mutaan au kaank ee he musaa'?” Nalalit in na'uab anfee tetus neu na' Yakop anbi nane.
30 On nane te na' Yakop na'uab ma nak, “Au iit ulail Uisneno humaf nok humaf, mes au fe' amoin.” Natuin lasi nane te, in nakanab bale nane, Peni'el (le' in otan nak, ‘Uisneno In human’).