3 Nalalit UISNENO na'uab nok na' Yakop ma nak, “Antian in taubn aa yen, es le' ii. On nane te ho lo he mfain nai' meu ho eina' ma ho ama' sin. Au of 'ok ko.”

4 Nalalit na' Yakop anleun he nboin bi Rahel ma bi Lea, he neman ma na'euk nok ne nbi mnela' huun, le' sin mui't eun baelk enu. 5 Oka te in na'uab neu sin ma nak, “Muni' ii, au 'kius hi ama te, huumn ee ka nmeuf nok kau. Ma in ka nkiso ntoom kau fa msa' on le' biasa. Mes Uisneno, le' au ama' na'bees neu Ne nok kau. 6 Hi nua ki mihiin, a'loo-loo le' ii, au 'meup ma'tane' 'eu hi ama! 7 Mes maski on nane msa', in napoib kau hae'-hae'. In nseka' au baen sebo hae' bo'es een. Maski on nane amsa' Uisneno npanat ma npao kau. 8 Tabu hi ama na'uab ma nak, ‘Mui' ma'koto sin anlalin ho baen a'puse-haet,’ mui't eun nahonin aan ma'koto' oke. In anmoe' on nane neu kau hae'-hae'. 9 Uisneno anmoe' on nane, he In nait hi ama' in mui't eun ma anfee kau sin.

10 Neno wes, na'euk nok mui't eun nane sin tabu he na'sae' eun ate, au unanai' ma 'ak, ale' keson oke' le' na'sae' eun nane, anmui' ma'koto'. 11 Nalalit Uisneno In ameput na'ko neno tunan, anhaman kau nbi nanait am nak, ‘Yakop!’

Oka te au utaah ma 'ak, ‘On mee, pah?’

12 On nane te in an'eut kau ma nak, ‘Amkius fe'! Ale' keson le' na'sae' eun le' ii, ala nmu'i yaa ma'koto'. Au 'atol on nane, natuin Au 'iit a'lail ale' saa'-saa' le' na' Laban anmoe' sin neu ko. 13 Au le' ii, Uisneno le' nakliil On neu ko anbi Betel. Anbi naa, ho muhakeb fatu, oka te am'oop mina', ma m'onen meu Kau. Nalalit ho muhakeb lais manba'an mok Kau nbi naa. Tabu ii, ho lo he mnao musaitan pah le' ii, ma mfain meu ho eina' ma ho ama' sin pah.”’

14 Nalalit bi Rahel ma bi Lea natahan ma nak, “Es le' ho. Hai mituin aah! Hai ka mmui' fa paa' ma nama' antein mi'ko hai ama'. 15 A'loo-loo le' ii, hai ama' in anmoe' kai on le' atoin bute. In na'sosa' nalail kai. Nalalit in anpaek nonin nane. 16 Ale' kanan a'mu'if le' Uisneno nait sin na'ko ama na' Laban nane, tabu ii anlail pusaak neu kit ma neu hit aanh enu. On nane te kaul Uisneno nak on mee te, tatuin aah!”

17-18 Nalalit na' Yakop anmulai nabuab in iblua' enu. In nasaeb in fee nuu ma in aanh eun neu bikaes unta sin, ma anpoo' neik in mui't eun ok-oke' ma nasaeb neki blua' eun le' in napein sin anbin Padan Aram, he nnaon neun pah Kana'an.

19 Tabu nane, na' Laban annao nkateil in i'bib-kaesn eun sin fuunk enu. On nane te bi Rahel nabaak neik in amaf in faut leu' maluna'. 20 Na' Yakop sin anfeen annaon mnees am mnees. Sin ka n'etun fa in babaf. 21 In neik nain in i'mui'n eun ok-oke', nalalit sin annaon nok manapat ma nlaak noe Efrat, oka te sin nnaon an'anin a'tubun Gileat.

22 Anfiin neno tenu te, na' Laban napein hanaf nak, na' Yakop anfeen am naen nalali yen. 23 Nalalit na' Laban anboin nabuab inin, ma sin nliu' natuin in moen feuf nane. Sin anliu' sin tal antia neno hiut, na' napein sin anbin a'tubun Gileat.

24 Anfai te, Uisneno nakliil On neu na' Laban anbi nanait. In na'uab ma nak, “Laban! Nati' ampanat ho fefam tabu ho mu'uab mok na' Yakop.”

25 Mabe' nane, na' Yakop nahakeb nalail uim la'at anbi 'tubun Gileat. Na' Laban sin nahaekb eun uim la'at amsa' ka na'loo fa na'ko bale nane.

26 Nalalit na' Laban neem na'euk nok na' Yakop. On nane te in na'uab ma nak, “Yakop! Anmoe' on mee m'es ho maen meik au aan feotn ee mnees am mnees? Ho on le' meik tuaf le' ho mheek maan sin anbin makenat. 27 Ailoo, ho maen amnees am mnees. Ho ka mpaek fa atolan a'kle'o he museona kau, wo! Kaul ho m'eut kau lek-leko te,^a bait au 'fesat he usain ki 'eik malinat. 28 Ho saant es antein, ho ka mfee kau fa sona' he au 'taben ma 'neek 'aan au anah ma au upuf sin hena' au usain sin. Ho 'moe'm ee on le' amonot! 29 Au he u'le'un ko te, labah! Mes fini na, Uisneno, le' ho ama' na'bees neu Ne nakain kau ma nak, kaul au u'uab 'ok ko, au lo he 'panat au fefak. 30 Au uhiin 'ak ho mumnau ho kuan, he mfain. Mes nasaa' am es ho mubaak meik au faut-le'un le' maluun enu?”

31 Nalalit na' Yakop nataah ma nak, “Aam, kais muto'an kau'! Au 'feen ma 'nao mnees am mnees natuin au utiun kuuk, kaul ho ka mloim fa he mufetin kau li'aan eun he nok kau te, of on mee?” 32 Mes na' Yakop ka nahiin fa neu in fee bi Rahel es nabaak neik faut-le'un le' maluun eun nane. On nane te in na'uab ma nak, “Aam, faut le'un maluun eun nane te, ho maim kuum! Kaul ho mupein sin anbin sekau te, mu'mate. Ampukai hai blua' eun oke'! Kaul mupein ho blua pusaak bian amsa' te, mait mufani' sin. Maut he tuaf eun le' ii anlalin saksii.”

33 Nalalit na' Laban anpoi ma ntaman sin uim la'at sin mese'-mese'. Nahunun na' Yakop in uim la'at. Nalalit bi Lea. Oka te neu bi Bilha ma bi Silpa sin imsa'. Mes ka niit fa blua' eun nane. Namuni te, in ntaam neu bi Rahel in uim la'at. 34 Mes bi Rahel ankonob na'tolo' faut-le'un le' maluun eun nane anbin a'pein bikaes unta. Nalalit in antook natau 'peni' nane. Na' Laban anpalekas bi Rahel in uim la'at nanan ok-oke', mes ka napein fa blua' eun nane.

35 On nane te bi Rahel na'uab nok in amaf ma nak, “Aam honi, kais mutoo'. Au ka 'feen fa, pah, natuin au upein funan.” On nane te na' Laban naim piut, mes ka niit fa faut-le'un le' maluun eun nane.

36 Na' Yakop natoo' ma nhuum npuut, on nane te in ankabal in babaf na' Laban ma nak, “Au uleu' ho saa'? Tal ho mliu' mutuin kau, on le' au atoin abulalut kau. 37 Ho mpukai mulail ale' au blua' eun ok-oke'. On nane te ho mupein saa'? Mait meki neem meu matan ii he hit tiit ok-oke'. Maut he hit aok-bian sin le' ii, nafeek nitan nak blua' nane, sekau ini. 38 Toon bo' nua yen au 'aetn ok a'bi ko. Tabu au utuuk ho mui't eun nane, ka ti-tiit fa es he nlopo'. Au ka 'tuun he 'euk 'iit fa mese' amsa'. 39 Kaul anmui' mui' fui na'maet ho mui't eun, au ka 'eut ko fa' mes au 'seka' sin, pah. Kaul anmui' tuaf nabaak naan ho nuu, ho mleun kau he 'senu' maski au ka 'saan fa'. 40 Neno-neno' te, manas anhoi kau. Fa-fai te, au 'maniik tal u'tai' a'maet. Au 'bee' ma ka tuup fa leko, natuin au 'panat ho mui't eun nane, pah. 41 Toon bo' nua nane namneo! Au 'meup toon bo'es am haa' he 'aan ho aan feton. Nalalit a'kuli 'tein toon nee', he 'heit mu'it. Au 'aetn ok a'loo-loo le' nane, mes ho mubaina' au baen sebo nane hae' bo'es. 42 Moin-moni te anmui' Uisneno le' au nai' na' Abraham ma au ama' na' Isak na'besan neu Ne. Kaul In ka npanat kau fa te, ho mliu' mulail kau, ma au 'feen ma 'nao luum-luumn aah. Mes Uisneno ka nfolo ma ntono fa neu au suset. In niit kau neu au 'meup ma'tane'. Es na' fiin fai ii, In neem ma nakain ko, pah.”

43 Anneen na' Yakop na'uab on nane te, na' Laban nataah ma nak, “On ii! Bifee nua' eun nane, au aanh enu. Li'aan eun le' sin nahoin sin nane, sin au upu' ok-oke'. Mui't eun le' ii, namneo au inin. Ale' saa'-saa' le' ho miit sin anbin ii, au inin. Mes au he u'saa'? Au ka ubei' fa he utau sin. 44 On nane te leko nneis hit nua kit tahakeb lais manba'an. Ma hit nua kit lo he tmoin tatuin hit lais manba'an nane.”

45 Nalalit na' Yakop nait fatu 'naek es, ma nahakeb anbi nane, he nfani 'taka'. 46 Oka te na' Yakop anleun in ameupt eun he anniubn eun fatu, ma ntupu' sin. On nane te sin antokon ma nbukaen nabuan anpaumaak fatun nane. 47 On nane te na' Laban nakanab faut a'kupu' nane ma nak, Yegar Sahaduta. Mes na' Yakop nakanab Galeet.^b

48 Nalalit na' Laban na'uab ma nak, “Faut a'kupu ii, nfani 'taka' le' ansaksii hit lais manba'an.” Es nane te, bale nane, in kanan Galeet. 49 Na' Laban nakanab bale nane msa' nak, Mispa (le' he nuu on le' uab tuka' bian le' in otan, nak, ‘bael paot le' ma'aiti’, natuin in na'uab ma nak, “UISNENO of neikn On anpanat kit, he maski hit nua kit atmaka'loon amsa' hit kais attanhai hit lais manba'an ii. 50 Kaul ho mmoe' amle'ut meu au aanh eun ii, ai' amafee bifee 'teta' au of ka uhiin fa'. Mes mumnau! Uisneno nlail saksii neu hit nua kit. 51-52 Amkius miit faut ahaket ii, ma faut atuup eun ii. Mumnau! Fatun le' ii msa' anlalin nakat. Ho ka mubei' fa he mtanhai fatun le' ii, he mmoe' amle'ut meu kau. Ma au msa' on nane. 53 Hit tahakeb lais manba'an ii, tpaek hit bei' ma hit nai' sin Uisneno. Eseun le' ho nai' na' Abraham, ma au nai' na' Nahor sin Uisneno. In of neikn On anfain Afeek Lasi neu hit lasin.”

Anneen anlail on nane te, na' Yakop ansuup neik Uisneno kanan le' in amaf na' Isak na'luli' ma na'bees neu Ne.

54 Nalalit na' Yakop anlool mu'it ma nait neik sin siisk eun ma na'tulu' sin neun Uisneno anbin a'tubu sin nane. On nane te in na'auba' tuaf eun le' anbin nane, ma sin nbukaen nabuan, ma nbe'en tal anmeus anfiin.

55 Nok-nok ana' te, na' Laban anhoo ma nneek in anah ma in upuf sin ok-oke'. Nalalit in na'uab anfeen sin tetus, ma nfain-koit neu in pah.