2 On nane te na' Yakop ankabal ma nak, “Ho mak oin au Uisneno kau'? Au ka 'moe' uhiin fa li'ana' he 'fee ko.”

3 Nalalit bi Rahel na'uab ma nak, “On ii! Leko nneis ho mtuup mok au ate bi Bilha. Maut he on mee te, in nahoin li'ana neu kau.”

4 Nalalit in annona' bi Bilha neu in mone. On nane te na' Yakop antuup nokan. 5 Nalalit bi Bilha na'aup, ma in nahoin li'aan mone yes. 6 Es nane te bi Rahel na'uab ma nak, “Uisneno nneen au onen. Etun In anfee kau li'aan mone yes. Uisneno nafeek nataib ahaa au lasi.” Oka te in nakanab li'ana' nane na' Dan (le' in otan nak ‘afeek lasi’).

7 Nalalit bi Bilha na'apu ntein, ma nahoin li'aan mone yes. 8 Es nane te bi Rahel na'uab ma nak, “Au 'ok au tata' mmali'un mahonit. On nane te au 'iis 'aan. Etun in nakanab li'ana nane na' Naftali (le' in otan nak ‘anmali'un’).

9 Tabu bi Lea natenab nahiin neu in ka nahoin fa yen, in annona' bi Silpa he na' Yakop naan. 10 Nalalit bi Silpa nahoin li'aan mone yes. 11 Es nane te bi Lea na'uab ma nak, “Au ua leko kau.” Oka te in nakanab li'ana' nane na' Gat (le' in otan nak ‘ua leko’).

12 Nalalit bi Silpa nahoni ntein li'aan mone yes. 13 Es nane te bi Lea na'uab ma nak, “Hoe! Tabu ii, na' au 'maliin! Amkius kiim, of bifeen eun na'uab eun ma nak, au 'iis manenu'.” Etun in nakanab li'ana' nane, na' Aser (le' in otan nak ‘malinat’).

14 Neno wes, na'euk nok tabu mnonut, na' Ruben annao nbi nasi. In napein hau le'u le' antulun tuaf he kaul leko te nahoin. Nalalit in neki neu in einaf bi Lea. Ankius niit on nane te, bi Rahel antoit bi Lea ma nak, “Ailoo, taat! Amfee maan kau le'u kle'o le' na' Ruben neki ye nane.”

15 Mes bi Lea nataah ma nak, “Hoe! Ho lo manenu' ko! Ho musiik amlail au mone yen. Ma tabu ii, ho he musiik amtein le'u na'ko au anah. Ho ka mmae kuum fa'?”

Mes bi Rahel na'uab ma nak, “On ii taat. Kaul au upein le'u nane te, mabe' ii ho mok hit mone.” Bi Lea nloim on nane.

16 Manas anmabe te, na' Yakop anfain neem na'ko lene. On nane te bi Lea nnao na'euk nokan, ma na'uab ma nak, “Aam! Ho lo he mtuup mok kau mabe' ii! Natuin au 'baen ulail ko 'eik au anah in le'u.” Nalalit mabe' nane, na' Yakop antuup nok bi Lea.

17 Nalalit Uisneno nneen bi Lea in onen. On nane te in na'aup, ma nahoin li'aan mone yes. Tabu ii, in nahoin hae' niim een. 18 Nalalit bi Lea nakanab li'ana nane na' Isaskar (le' in otan nak ‘baena' haet’), natuin in na'uab ma nak, “Uisneno nbaen nalali au haet, natuin au 'nona ulail bi Silpa he naan au mone.”

19 Nalalit bi Lea na'apu ntein, ma nahoin li'aan mone yes. Le' ii, hae' nee yen. 20 In na'uab ma nak, “Uisneno n'ook-soun kau. Es nane te tabu ii, au mone lo he ntola' kau, natuin au uhoin 'aan li'aan mone nee yen.” Etun in nakanab li'ana' nane na' Sebulon (le' in otan nak ‘anfee 'tola'’).

21 Nalalit bi Lea nahoin li'aan feto wes. On nane te in nakanab bi Dina.

22 Mes Uisneno namnau bi Rahel amsa' ma In nneen in onen totis. Etun In nfei bi Rahel in apun. 23 On nane te in na'aup ma nahoin li'aan mone yes. In na'uab ma nak, “Uisneno nait inpolin au lais mae.” 24 Es nane te in nakanab li'ana nane, na' Yusuf (le' in otan oin nak ‘maut he in nfee ntein’), natuin in na'uab ma nak, “Au toit he Uisneno nfee kau li'aan mone yes antein.”

25 Tabu bi Rahel nahoni nlail na' Yusuf, na' Yakop na'uab nok na' Laban ma nak, “Aam! Kaul leko te, au 'fain 'eu au pah ee fe'. 26 Maut he au 'eik au fee ma au aanh eun amsa'. Ho muhine mlail, au 'meup ma'tane' 'eu ko. On nane te au 'baen ufeek sin een. Natuin lasi nane, tabu ii sin nlalin au ini yen.”

27 Nalalit in babaf nataah ma nak, “Ako! Ho mneen fe'. Au takseel ma au 'iit u'lali yen, es au uhiin 'ak Uisneno npaek ko he nfee kau tetus-athoes. 28 On nane te tabu ii ho mtoit fak-fauk aah. Au 'baen! Lamu ho mutua mok kau mbi ii, ma mmeup meu kau.”

29 Nalalit na' Yakop nataah ma nak, “Aam, ho miit kuum au mepuk. Nok lanan nane, ho mui't eun ansaat ok piut. 30 Tabu au fe' ka 'oum fa te, ho 'mui'm eun fe' ka mfaun fa'. Mes tabu ii, ho atoin amu'it. Uisneno anfee ko tetus, natuin au mepuk. Tabu ii, antia in tabu wen he au 'meup 'eu au fee ma au anah sin.”

31 Nalalit na' Laban nataan ma nak, “Leko. On nane te au he 'baen ko on mee '?”

Na' Yakop nataah ma nak, “Aam, ho kais musuusb om he mfee kau saa'-saa'. Au of utuuk ufinib ho mui't eun, mes lamu au 'moe' 'aan moe't es. 32 Amfee kau sona', he neno ii au 'nao 'eu ho mui't enu. Au he 'piil 'aan a'bibi ma 'bib-kase le' ka ma'koto' fa'. Sin le' nane, ho ini, pah. Mes le' ma'koot' eun au nuu. Ma au 'heit ale' 'bib-kaes metan amsa'. Maut he sin ok-oke' nane, anlalin baen neu au suset ma au haet.^a 33 Anbi neon amunit ate, of na' ho muhiin mak au nekak knino, ai' kahaf. Tabu mee yah, ho oum he mpalekas au mui't enu. Kaul ho miit a'bibi le' ka ma'koto' fa, ai' 'bib-kase le' muti' te, ho muhiin mak au es le' ubaak 'aan ho inin.”

34 Nalalit na' Laban anloim natuin ma nak, “On le' nane msa', leko.” 35 Mes anbi neno nane, na' Laban anbati 'bib-kasen le' ma'koto, ma bib-kasen le' metan. Nalalit in nleun in aanh eun he natuuk mui't eun nane. 36 Es nane te sin neik mui't eun nane annaon na'loon na'kon na' Yakop, neu bale yes le' in a'loon, atnao hae te neno teun fe' ate na' attia. Nalalit na' Yakop fe' natuuk in babaf in i'bibin ma 'bib-kaes aneist eun nane.

37 Nalalit na' Yakop ankeut naan hau-tlaef na'ko hau huma' teun. In nsapi ntui lana' hau-tlaef eun nane. 38 In ntao hau-tlaef eun le' in ntui lana' sin nane, anbin a'bai oe. Mui't eun nane biasa anma'sae' eun anbin bale nane. 39 On nane te tabu mui't eun nane anma'sae' eun anpaumaak hau tlaef matui laanf eun nane te, sin of nahonin ana' 'koto'.

40 Nalalit kaul na' Laban in mui't eun es le' he nma'sae' eun ate, na' Yakop na'ekab sin neu a'bibi ai' a'bib-kase le' ma'koto'. Es nane te sin nahonin aan ma'koto' amsa'. Nok lanan nane, in mui't eun kuun es na'baab ok piut. Nalalit in nbeit sin na'kon na' Laban inin. 41 Tabu mu'it mee le' ma'tane na'sae' eun ate, na' Yakop antao hau tlaef le' in nluun sin nane, antoom a'bai oe, le' anhaumaak sin maatk enu. 42 Mes kaul in nkiso ma mu'it mee an'oel tabu he na'sae' ate, in ka ntao fa hau tlaef eun nane. On nane te na' Laban in napein mui' maknau' ma a'olet. Mes na' Yakop inin ok-oke' es eun le' apokat ma ma'tane'. 43 Nok lanan nane te, na' Yakop anlail atoin amu'it. In nmu'i 'bibi, 'bib-kase, bikaes unta, bikaes keledai, ma ate, amfaun kah.