Na' Yakop antia in babaf na' Laban in ume
29
Nalalit na' Yakop annao nfini n'ain neon-saet. 2 In nna-nao te, in niit oe hani' es anpaumaak kuan es. Anpaumaak oe hani' nane, anmu'i 'bibi ma 'bib-kase pukan teun, le' anpaon he napenin oe mninu'. Mes anmui' fatu 'naek es an'oeb naan oe hani' nane. 3 Biasa kaul mui't eun nane nabua nlalin ate, of na' atuuks eun antite na'loba fatu nane, nalalit ankuin oe ma na'inu' sin. Ninu nlalin ate, sin n'oeb nafani'.4 On nane te na' Yakop annao nataan atuuks eun nane ma nak, “Hoe, pah! Hi mi'ko mee, pah?”
Sin nataah ma nak, “Hai mi'ko kuan Haran, pah.”
5 Nalalit na' Yakop nataan antein ma nak, “Hi mihiin au baba' na' Laban, ai' kahaf? In le' nane, na' Nahor in anah.”
On nane te sin nataah ma nak, “Hai mihiin ee, pah.”
6 Na' Yakop nataan piut ma nak, “In n'ao-mina', ne?”
Sin nataan ma nak, “A'naef et le' naa. In leko. Amkius. In aan feto bi Rahel anpoo' neik in mui't eun neman he na'inu sin anbin le' ii. Ho mpao mbi ii.”
7 Nalalit na' Yakop na'uab antein ma nak, “Manas fe' nafufu'. On nane te leko nneis mui't eun le' neem nabuan nlalin ii, hi mi'inu' sin nai'. Nalalit hi mpoo' meik sin he sin nekun huun.”
8 Mes sin npenan nak, “Hoe, ka on fa nane! Hai lo he mpao atuuks eun neman ok-oke' neik sin mui't eun antian ii fe'. Hena' hai mtite' fatu naa, he mi'inu' mui't eun nane.” 9 Na' Yakop fe' na'ub-uab nok atoin eun nane te, bi Rahel neem antia nok in aamf ee mui't enu. Biasa in es natuuk mui't eun nane.
10 Tabu na' Yakop niit bi Rahel nok in i'bibin ma 'bib-kasen nane te, in nnao ntite' nain faut tobef nane. Nalalit in na'inu' in baabf aa mui't enu. 11 Oka te in nneek bi Rahel ma nkae. 12 Nalalit in na'uab neu bi Rahel ma nak, “Au le' ii, ho baba feto bi Ripka in anah.” On nane te bi Rahel naen anfain neu ume he n'eut neu in amaf.
13 Tabu na' Laban anneen haan etus nak na' Yakop nane, in fetof bi Ripka in anah, in naen ansenu. Tabu sin na'ekun ate, na' Laban anhoo ma anneek. Nalalit in nokan neu in ume. On nane te na' Yakop nanu'un ale' saa'-saa' neu in babaf. 14a Oka te na' Laban na'uab ma nak, “Namneo! Hit nua kit ume nanan!”
Na Yakop naan bi Lea ma bi Rahel
14b Tabu na' Yakop natua nok sin fuun es, 15 na' Laban na'uab neun ma nak, “Ako! Au ka 'loim fa he ho mmeup luum-luumn aah meu kau, natuin hit nua kit ume nanan. On nane te ho mtoit fauk?”
16 Na' Laban anmui' aan feto nua'. Ahunut, in kanan bi Lea. Amunit, in kanan bi Rahel. 17 Bi Lea in maat filo.a Mes bi Rahel in huumn aa namaas, ma in aon amsa' lo leko. 18 Na' Yakop in ntaam nekan bi Rahel. On nane te in nataah na' Laban ma nak, “Au 'meup 'eu ko toon hiut, lamu ho mloim he au 'aan bi Rahel.”
19 Nalalit na' Laban nataah ma nak, “Leko! Nane es le' naleko nneis, natuin hit nua kit ume nanan. Maut he au anah bi Rahel kais naan atoni 'teta'. On nane te ho mutua mbi ii, he mmeup meu kau.” 20 Nalalit na' Yakop anmeup toon hiut, henati' in nabei' naan bi Rahel. In nneek niis bi Rahel. Etun toon hiut le' nane, on le' neno fauk aah.
21 Toon hiut namsopu te, na' Yakop namnauba' in babaf na' Laban ma nak, “Baab usi'! Au 'meup toon hitu wen. Tabu ii, mfee kau bi Rahel he au 'aan.”
22 On nane te na' Laban anhone ma nmoe elaf neu mafeet-mamoent eun nane. In na'auba' too mfaun anbin kuan nane. 23-27 Mabe' nane, na' Laban ka nfee fa bi Rahel, mes in anfee bi Lea he ntaam neu na' Yakop in uim la'at. On nane te na' Yakop antuup nok bi Lea. Nokfa te, na' na' Yakop nahiin nak in ntuup nok bi Lea. On nane te na' Yakop anmatoe in babaf mone na' Laban ma nak, “Au 'aetn ok toon hiut he 'aan bi Rahel! Te ho mseka' meik bi Lea! Nasaa' am es ho mfuil kau on le' ii?”
Nalalit na' Laban nataah ma nak, “Ho kais mutoo'! Tatuin hai halat anbi bale ii, feto kliko' ka nabei' fa he nmamoen nahunun feto 'nae. On nane te leko nneis on ii! Ho mpao fe' he elaf neno hiut namsopu te na' ho mupein bi Rahel. Mes ho lo he mmepu mtein toon hiut meu kau.” Nalalit na' Laban anfee in ate bi Silpa he nlail bi Lea in ate.
28 Na' Yakop anloim on naan. Es nane te elaf neno hiut namsopu te, na' Laban anfee bi Rahel he na' Yakop naan. 29 Nalalit na' Laban anfee in ate bi Bilha he nlail bi Rahel in ate. 30 On nane te na' Yakop naan bi Rahel amsa'. In nneek nanesib bi Rahel. Es nane te in nmepu ntein toon hiut neu in babaf mone.
Na Yakop in aanh enu
31 Mes UISNENO nahiin nak na' Yakop anneek nanesib bi Rahel. Es nane te, In nafetin bi Lea he nahoin. Mes bi Rahel kahaf. 32 Bi Lea na'aup, ma nahoin li'aan mone yes. In nakanab li'ana nane na' Ruben (le' in otan nak ‘mkius, anmui' anah’),b natuin in na'uab ma nak, “UISNENO nkius niit au suset. Etun es tabu ii, au mone he nkius kau.”
33 Nalalit bi Lea na'apu ntein, ma nahoin li'aan mone yes. In nakanab, na' Simeon (le' in otan oin nak ‘atoni nneen anlail’), natuin in nak, “UISNENO nneen anlail nak au mone ka nfiloil kau fa'. Es na' In nfee ntein kau li'ana ii.”
34 Nalalit bi Lea na'apu ntein, ma nahoin li'aan mone yes. In nakanab li'ana nane na' Lewi,c natuin in na'uab ma nak, “Nok le' li'ana ii, au lasi oke' nalali yen. Namneo, au mone of na'kii' anbi kau, natuin au uhoin aan li'aan mone tenu wen neun.”
35 Nalalit bi Lea na'apu ntein, ma nahoin li'aan mone yes. In nakanab li'ana' nane na' Yahuda (le' in otan oin nak ‘pules’), natuin in na'uab ma nak, “Neno le' ii, au he 'pules UISNENO!” Nalalit bi Lea ka nahoin fa yen.