28
Nalalit na' Isak anboin na' Yakop, ma nfee ne tetus ma fainekat ma nak, “Amneen mulek-leko'! Ho kaisa' maan bifee munif na'ko pah Kana'an. 2 Mes ho mnao meu Padan Aram, meu ho nai' na' Betuel in ume. Ho mnao ma maan ho baba' na' Laban in aan feto wes.a 3 Maut he Uisneno le' Akuasat Afin-finit nane, es anfee ko tetus, he ho anah ma upu' sin namfaun, ho sufam ma ho kau'm eun anlalin uuf-uuf amfaun le' ma'taen eun. 4 Maut he Uisneno In lais manba'an neu na' Abraham naneet yon neu ko, ma neu ho sufam ma ka'um sin. Maut he ho mpaal pah le' Uisneno nba'an nalali ye neu na' Abraham.”b 5 Na'uab anlail on nane te, na' Isak nafetin na' Yakop he nnao neu Padan Aram, neu in babaf na' Laban ma na'if na' Betuel sin ume.Na' Esau naan na' Ismael in aan feto wes
6 Na' Esau nneen nak na' Isak anfee nlail tetus neu na' Yakop, ma ntaal he kais naan li' feot munif na'ko pah Kana'an. In nneen amsa' nak in amaf anlenu he nnao ma naan in babaf in aan feto wes et Padan Aram. 7 Nalalit na' Yakop natuin in fainekat, on nane te in nnao neu Padan Aram.
8 Na' Esau nahine msa' ma nak, in amaf ka nloim fa in fee nuu le' na'kon pah Kana'an. 9 On nane te in nnao neu in amaf a'naek na' Ismael, nalalit in naan na' Ismael aan feto bi Mahalat. Bi Mahalat nane, na' Nebayot in fetof.
Na' Yakop nananai' nbi Betel
10 Nalalit na' Yakop annao nasaitan Beer Seba neu kuan Haran. 11 Tabu manas antees, in antia bale yes, ma in antuup anbi nane. Tabu in he ntuup ate, in nait fatu wes he n'aka'nunu'.
12 Mabe' nane in nananai'. In niit elak es, le' in tunan ansookt on antia neno tnanan. Nalalit Uisneno In ameput neno tunan sin ansaen ma nsanun anbin elak nane. 13 Anbi nanait nane, na' Yakop niit UISNENO anhake nbi in aon-bian, oka te In na'uab ma nak, “Au le' ii, UISNENO, ho nai' na' Abraham ma ho ama' na' Isak sin Uisneno. Au of a'fee pah ii 'eu ko, 'eu ho sufam ma ho ka'um sin. 14 Ho sufam ma ho kau'm eun of amfaun on le' afu skuku'. Ma sin of ansiksaan ok neun bale-bale. Na'ko ho sufam ma ho ka'um, ale' uuf anbin pah-pinan of napenin tetus-athoes.c 15 Mumnau mulek-leko! Ho mnao meu mee-mee yah, Au 'ok ko, 'panat ma 'pao ko. Au of 'eik ko mfain oum meu pah ii. Au ka ufetin ko mmees fa. Ma Au of utiis lais manbaa'n eun le' Au 'fee ko sin.”
16 Tabu na' Yakop anfeen na'ko tupas nane, in na'uab ma nak, “Au fe' uhiin 'ak, UISNENO et bale le' ii msa'!” 17 On nane te in namtau'. Ma in natenab ma nak, “Bale ii anmoe' kau ma au fuunk eun nfenan. Namneo-namneo, Uisneno In ume et le' ii! Ma eno' he ttaam teu sonaf neno tunan, es le' ii.”d
18 Nokfa te, na' Yakop anfeen. Nalalit in nait faut aka'nunu' nane, ma nahakeb anlali 'taka'. Nalalit in n'oop mina anbi fatu nane, ma n'onen neu Uisneno. 19 In nakanab bale nane Betel, le' in otan nak ‘Ume Uisneno’. (Nahunu te bale nane, kanan Lus).
20 Nalalit na' Yakop ansuup ma nak, “Kaul Uisneno nok kau, npanat ma npao kau 'bi au lanan ii, ma nfee kau mnahat ma pake, 21 tal antia au 'fain 'oum 'bi mamut ma ao-mina', UISNENO of anfain au Uisneno. 22 Fatu le' au uhakeb ii, anlail bael onen neu Uisneno. Ma saa'-saa' le' Uisneno anfee kau sin, au of a'fee ufani' paa' es na'ko bait bo'.”