Bi Ripka napoiba' ama' na' Isak he nfee tetus neu na' Yakop
27
Tabu na' Isak namnasi yen ate, in maatn eun anfolo nmaten. On nane te in nboin in aan mone 'nae le' in nneek nisan ma nak, “Esau! Ho oum fe'!”Na' Esau nataah ma nak, “On mee, pah?”
2 Na' Isak an'eutn ee ma nak, “On ii! Au umnasi yen. Au ka uhiin fa au neno 'maten. 3 On nane te mait ho blua' eun le' ho mpaek sin he mliu mui' fui nane, mnao nai' he mliu' maan kau mui' fui yes. 4 Nalalit ho muhaan maan kau mnaah amin-minat le' au 'lomi, oka te meki neem. Au 'uah a'lali te, na' au 'fee ko tetus. Ma kaul au 'fee 'lail ko tetus ate, au 'mate msa' leko.”
5 Nalalit na' Esau nnao ma nliu'. Mes bi Ripka nneen niit na' Isak in uaban nane. 6 Nalalit bi Ripka na'uab neu na' Yakop ma nak, “Hoe, Ako! Amneen mulek-leko! Fe' le' ii au 'neen ho ama' na'uab nok ho tata' na' Esau, ma nak: 7 ‘Ho mnao mliu' maan kau mui fui yes, he muhaan amnaah aminat neu kau. Kaul au 'uah a'lali te, na' au 'fee ko tetus anbi UISNENO In matan.’ 8 On nane te ho mneen mulek-leko! Au u'uab saa' ate, mutuin. 9 Tabu ii, mnao nai' meu hit i'bib-kasen, mpiil maan a'bib tiup apokat nua'. Amlool sin, ma mait meik sin siisk eun nane neman neu kau'. Au of uhaan sin utuin ho ama' in i'lomin. 10 Kaul au uhaan a'lali te, ho meik sin meu ho ama' he in nbukae. Nalalit in nfee ko tetus fe', hena' in nmaet. Nok lanan nane, ho es mupein tetus. Ka ho tata' fa'.”
11 Mes na' Yakop na'uab nok in einaf ma nak, “Ein'! Mes au tata' na' Esau in aon ee ma'funu'. Au aok ee kahaf! 12 Kais-kaisa' ama' nabsai' au aok, ma in nahiin nani nak au upoib ok. On nane te in ankaas kau'!”
13 On nane te in einaf nak, “Ako. Kais ho mus'unu'. Paliis he au es a'atol! Kaul ho ama' ankaas ko, maut he au es le' a'sutai. Tabu ii, mnao nai' he mlolo 'bibin nane.”
14 Nalalit na' Yakop annao ma npiil naan a'bibin nane. Oka te in nlool sin, ma neik sin siisk eun neun in einaf. On nane te bi Ripka nahaan sin namin-minan on le' na' Isak in i'lomin. 15 Nalalit bi Ripka nnao nait na' Esau in blua-paken le' namasan, ma nfeen na' Yakop he npaek sin. 16 In n'aum na' Yakop in i'niimn eun ma in to'an, npaek pasu 'bibi nane. 17 Nalalit in anfee sisi mtaas eun nane nok utunu' neu na' Yakop.
18 Nalalit na' Yakop neik sisi mtaas eun nane neu in amaf. In na'uab ma nak, “Aam! Au 'oum een.”
Na' Isak nataah ma nak, “Hoe! Ho sekau ko?”
19 On nane te na' Yakop nataah ma nak, “Au le' ii, ho aan mone 'nae, na' Esau! Au 'moe' utuin ho lekat. Amfeen nai' he mbukae. Au uhaan sisi na'ko mui' fui le' au 'heek 'aan. Ambukae nai', hena' oka te mu'uab amfee kau tetus, pah!”
20 Nalalit na' Isak na'uab ma nak, “Ho maneun le'uf ko! Ho mliu' labah, hoo!”
Oka te, na' Yakop nataah ma nak, “Natuin UISNENO le' ama' ho mu'bees meu Ne, es le' antulun ma nbaab kau, etun au upein laab aah.”
21 On nane te na' Isak anhaman na' Yakop ma nak, “Ho mpaumaak kau fe', he au ubsai' 'iit ko! Na' Esau es le' ho, ai' kahaf?”
22 Nalalit na' Yakop anfonat antaam ma npaumak-maak in amaf. On nane te a'naef nabsai' ma na'uab ma nak, “In hanan, on le' na' Yakop in hanan! Mes in i'niman, on le' na' Esau in i'niman.” 23 Mes na' Isak ka nahiin fa na' Yakop natuin in i'niimn eun ma'funu on le' na' Esau. Mes tabu in he nfee tetus neun ate, 24 in nataan antein ma nak, “Ho le' ii, na' Esau namneo-namneo, kah?”
On nane te na' Yakop nataah ma nak, “Namneo, pah!”
25 Nalalit na' Isak na'uab ma nak, “Ho mnona' sisi nane he au 'euk. Oka te na' au 'fee ko tetus.” Es nane te na' Yakop annona' sisi ma tua miin-kase neu in amaf, ma in nbukae. 26 Oka te in amaf na'uab ma nak, “Ailoo. Ampaumaak oum he mhoo ma mneek maan kau.”
27 Tabu na' Yakop anpaumaak he nhoo ma nneek in aamf ee te, na' Isak naskiu nahiin na' Esau in paekn aa fook enu. Nalalit in nfee tetus neu na' Yakop ma nak,
“Au anah in foon, on le' mnela' huun le' UISNENO nasanut tetus.
28 Maut he Uisneno nasanut akum na'ko neno tnanan,
he namliab ma nasnaub ho lenen!
Maut he In nfee ko pena' ma ane' nathoe-hoen,
ma ho poo' anggur sin nafuan nathoe-hoen.
29 Uuf-uuf of anlalin ho aten sin,
ma uuf-uuf na'ko pah-pah of na'luli' ma antola' ko.
Maut he ho muplenat ho aom-bian sin ok-oke',
ma sin aal sin of anli'tuun anbin ho humam ma ho matam.
Sekau es le' ankaas ko, sin of napenin kasat amsa'.
Mes sekau es le' anfee ko tetus, sin of napenin tetus amsa'.”
Na' Esau nfain neem ma ntoit tetus na'ko na' Isak
30 Tabu na' Isak anfee nlail tetus, ma na' Yakop fe' anpoi nasaitan in amaf ate, in tataf na' Esau nfain neem ma neik mui' fui le' in nheek naan. 31 On nane te in nnao nahaan, oka te in neki neu in amaf. In na'uab ma nak, “Aam! Amfeen he mbukae nai', pah. Au uhaan a'lail siis fui le' au 'nao ma' 'liu 'aan. Ambukae mlali te, na' amfee kau tetus.”
32 Na' Isak naskeek. In nataan ma nak, “Hoe! Ho sekau ko ntein?”
Nalalit na' Esau nataah ma nak, “Au na' Esau kau'! Au ho aan mone 'nae, pah.”
33 On nane te na' Isak na'tai'. Nalalit a'naef nataan ma nak, “Kaul on nane te, fee le' ii sekau es le' neik kau sisi ma au 'euk? Au 'eku lail, ma 'fee ulail tetus neun. Ma au ka ubei' fa he 'heel ufani' tetus le' au 'fee ye nane.”
34 Anneen in amaf na'uab on nane te, na' Esau nekan nameen, ma nkae nme'-me'ul. Ma na'uab namep-meep am nak, “Koi, aam! Amfee kau tetus amsa', pah!”
35 Mes na' Isak nak, “Ho oli' neem ma napoib nalail kau, ma nabaak naan ho tetus.”
36 Nalalit na' Esau na'uab ma nak, “In napoib kau hae' nua yen. Nahunu te, in napoib kau ma nsium naan au hak aan mone 'nae. Tabu ii, in napoib kau ntein ma nsium naan au tetus. Etun in kanan ‘Yakop’. Mes ho mmui' tetus bian antein he mfee kau, ai' kahaf?” (Kanaf Yakop in otan ‘nnaa' haen 'tikan’. Mes in otan bian ‘apoiba'’.)
37 Nalalit na' Isak nataah ma nak, “Au u'aiti' ulail ho oli anlail ho usi'. Ma in aon-bian sin oke' anlalin in ate sin. Au 'fee ne pena' ma ane' anho-hoen, ma hau fua anggur nathoe-hoen amsa'. On nane te Esau! Tabu ii au he 'fee ko tetus saa' a'tein?”
38 Anneen on nane te, na' Esau noik in amaf piut ma nak, “Aam, ho mmu'i yaa tetus mese', kah? Au 'tebes, ho of ammu'i mtein tetus bian. Maski aan'-ana' amsa', leko!” On nane te in nmulai nkae ntein.
39 Nalalit na' Isak nataah in anah na' Esau ma nak,
“Ho 'monim of na'loo na'ko leen amliat eun,
ka tiit fa akum ansaun na'ko neno tnanan he napete' ho afun.
40 Ho suni' of es anfee ko he mmoin.
Mes maski on mee-on mee msa' ho mlail ate meu ho oli'.
Ala kaul ho mlaban mube'i ye, of na' ho mufetin maan om mu'ko in i'niman.”
Bi Ripka nleun na' Yakop he naen
41 Na' Esau nato'an niis na' Yakop natuin na' Yakop nasiik naan in tetus. Mes in natenab ma nak, “Ka 'loo fa te, ama' anmaet. On nane te au 'pao. Be'et oke te, au 'lolo!”
42-43 Tabu bi Ripka nneen na' Esau in salit nane te, in anboin na' Yakop ma nak, “Ho mneen mulek-leko! Ho tata' ansail nalail he nseun banin in neek menan. In he nlool niis ko. On nane te ho maen nai' meu ho baba' na' Laban et Haran. 44 Amnao mutua mtahan ambi naa, tal antia ho tata' in nekan anmaniik. 45 Kaul in nnikan nain saa'-saa' le' ho mmoe' sin neu ne te, au of a'leek tuaf he neit naan ko. Natuin au ka 'loim fa he uneuk au aanh eun nua sin hae' mese' nain.”
46 Nalalit bi Ripka na'uab nok na' Isak ma nak, “Au 'lenan na' Esau in fee nua' eun le' na'kon atoin Hetes sin ii! Kaul na' Yakop naan li' feot munif Hetes, leko nneis au 'maet kuuk nai'.”