Na' Isak ma kesel Abimelek
26
Tabu wes, amnahas antaman pah nane, on le' amnahas tabu na' Abraham fe' anmoin. On nane te na' Isak antoit he kaul leko te kesel Abimelek, atoin Filistinas sin kesel, anfee ne sona' he in natua anbi kuan Gerar. 2 In anmoe' on le' nane, natuin UISNENO nakliil On neu ne ma nak, “Ho kais amnao meu pah Masir. Au of uklila' ko bale 'teta'. 3-4 Kaul ho mutua on le' atoin anao-amnemat ambi bale nane, Au of 'ok ko, ma 'fee ko tetus ma athoen huma'-huma'. Au of a'moe' ho suufm eun amfau-le'uf on le' kfuun sin abiit neno tnanan. Ma Au 'fee 'eu ho sufam sin pah le' ii ma in kuan sin oke'. Na'ko ho sufam ma ho kau'm eun nane, of ale' uuf anbin pah-pinan ii napenin tetus ma athoen. Nok lanan nane, Au unokab Au lais manba'an 'ok ho ama' na' Abraham.a 5 Au 'moe' on le' ii, natuin ho ama' natuin Au 'lomik, Au plenat, ma Au atolan.” 6 On nane te na' Isak natua ntahan anbi kuan Gerar.7 Bi Ripka nane maas le'uf. On nane te tabu atoin eun le' anbin bale nane niit, sin nmakataan eun neu ne. Mes na' Isak nataah ma nak, “Bi Ripka nane, au feto'.” In namtau kaul in nmanaku' nak in fee ya te, atoin eun nane of anlolo ma nsium neik bi Ripka. 8 Na' Isak natua suuk a'loo anbi nane. Neno wes, kesel nasneku' niit na' Isak nok bi Ripka na'ko in eon ana'. In niit sin anmahoon fee ma mone. 9 On nane te in nleek tuaf he nnao nboin na' Isak, ma nabokan ma nak, “Isak! Au uhiin namneo-namneo, bifee nane, ho fee ya'! On nane te, nasaa' am es ho mak ho feto'?”
On nane te na' Isak nataah ma nak, “On ii, aam usi. Au umtau kaul au 'etu ma 'ak au fee ya te, kais-kaisa' biak eun anlool niis kau.”
10 Nalalit kesel nataah ma nak, “Kaul anmui' tuaf anbi le' ii le' antuup nok ho fee, ho lo he musaan kai! Nasaa' am es ho mmoe' on nane meu kai?”
11 Nalalit na' Abimelek namnauba' neik haan ma'tane' neu in too nuu ma nak, “Hi aal ki mimnau milek-leko! Sekaum-sekau le' anmoe' amle'ut neu atoni ii ai' in fee, au of a'hukun u'mate.”
Sin nmatoena' oe hain' eun
12 Tabu nane na' Isak naleen anbi pah nane. In napein nafani' in lene aafk eun antia hae nautn es, natuin UISNENO anfee ne tetus-athoes. 13 In i'mui'n eun ansaat ok piut, tal antia in nlail atoin amu'it namneo-namneo. 14 In biya, 'bibi, ma 'bib-kase ansaat ok amfaun. In ameupt eun namfaun amsa'. Tal antia atoin Filistinas sin natenab amle'ut neun.
15 Nahunu te, na' Isak in amaf na' Abraham sin nhanin oe hani' amfaun. Mes tabu ii, atoin Filistinas sin nkuub naneuk oe hain' eun nane nekin afu.
16 Nalalit kesel Abimelek na'uab nok na' Isak ma nak, “Isak! Leko nneis ho mnao musaitan hai pah ee nai'. Hai mkis-kiso te, ho fiunm aa nneisi nlail kai.”
17 Nalalit na' Isak annao nasaitan kuan nane, ma nfanin ma natua anbi nonof amnela' Gerar. 18 On nane te in nhain nafani' oe hain' eun le' sin nkuub sin nane. Ma in nakanab oe hain' eun nane, natuin kaanf eun le' nahunu te in amaf nakanab nalail sin.
19 Tabu na' Isak in ameupt eun anhanin oe anbin mnela' Gerar nane te, sin nhain napein oe maat es, le' nasbula' anpoi. 20 Mes atuuks eun na'kon Gerar anmatoen nok na' Isak in atuuks eun, natuin oe hani nane. Sin nak, “Ii hai oe!” Es nane te na' Isak nakanab oe hani' nane Esek, le' in otan, nak, ‘matoes’.
21 Nalalit na' Isak inin, anhain oe yes antein. Mes sin anmatoen ntenin natuin oe hani' nane. Es na' na' Isak nakanab oe hani' nane Sitna, le' in otan, nak, ‘anmalaabn eun’.
22 Nalalit in nasaitan bale nane, ma nhani ntein oe hain es. Neno le' ii, sin ka nmatoen fa. Es na' na' Isak nakanab oe hani' nane Rehobot, le' in otan, nak, ‘bael manuan’. Ma in na'uab ma nak, “Tabu ii, Uisneno anfee kai bale he mitua mbi bael manuan ii. Anbi ii te, na' hai mibei' mihoin ma amsaat om he mimfau.”
23 Na'ko nane te, na' Isak sin annaon n'anin Beer Seba, he natuan anbin nane. 24 Mabe' nane, UISNENO nakliil On neu ne, ma na'uab ma nak, “Isak! Au le' ii, ho ama' na' Abraham in Uisneno. On nane te kais mumtau', natuin Au 'panat ma 'pao ko. Au of a'fee ko tetus athoen. Ho sufam ma ho kau'm eun of ansaat ok amfaun. Au 'moe' on le' ii, natuin Au lais manba'an 'ok ho ama'.”
25 Nalalit na' Isak anbakin fatu he nafena' mei 'tulu' anbi nane. On nane te in ntoit makasi neu UISNENO anbi bale nane. In natua nbi nane, ma in ameupt eun nmulai nhanin oe ntenin.
Kesel Abimelek ma na' Isak anhaaln eun
26 Tabu nane, kesel Abimelek neem na'ko kuan Gerar. In nok in soob leko na' Ahusat, ma in meo pa'e na' Fikol, neman ma na'euk nok na' Isak. 27 Oka te na' Isak nataan ma nak, “Aam usi'! Nahunu te hi mliu' kai mpoi mi'ko hi pah. On nane te tabu ii hi eim he misaa' amtein?”
28 Nalalit sin nataah ma nak, “On ii! Tabu ii hai mihiin mak Uisneno npanat ma npao ko, anhao ma nfait ko. Natuin lasi nane, hai mitenab ate, leko nneis hit nua kit tahakeb lais manba'an. Ho msuup am mak, 29 hi of ka mmoe' fa lais amle'ut meu kai, on le' hai ka mmoe' fa lais amle'ut meu ki msa'. Namneo hai neekm eun leko mok ki. Es na' neno wes na, hi misaitan hai pah nok mamut. Hai mihiin namneo-namneo, UISNENO es anfee ki tetus-athoes.”
30 Nalalit na' Isak anmoe' elaf neu sin. Sin nbukaen nabuan. 31 Anmeu nfiin ite, sin nsupan. On nane te na' Isak nafetin sin he nfanin nok mamut.
32 Neno nane, na' Isak in ameupt eun neman ma n'etun ma nak, “Aam! Hai mipeni mlail oe yen.” 33 Nalalit na' Isak nakanab oe hani' nane Seba, le' in otan nak ‘supat’. On nane te sin nakanab koot nane Beer Seba antia tabu ii.b
Na' Esau naan bifee nua' na'kon uuf a'teta'