Na' Abraham anmafee ntein
25
Na' Abraham naan antein bifee yes, kanan bi Ketura. 2 Bi Ketura nahoin li'aan eun le' ii: na' Simran, na' Yoksan, na' Medan, na' Midian, na' Isbak, ma na' Sua. 3 Na' Yoksan in aanh eun, es eun le' na' Seba ma na' Dedan. Na' Dedan in sufan ma in ka'un sin, es eun le' atoin Asuras, atoin Letus, ma atoin Leumas. 4 Na' Midian in aanh eun es eun le': na' Efa, na' Efer, na' Henok, na' Abida ma na' Eldaa. Sin ok-oke le' ii, eina' Ketura in sufan.5-6 Tabu na' Abraham fe' anmoin, in anbait nani in i'mui'n eun neu eina' Hagar ma eina' Ketura sin aanh eun, es-es ate nok in paa'. Nalalit in anleun sin, he nnaon natuan anbin pah Kana'an aon-bian neon-saet, he sin na'loon na'ko in anah na' Isak. Mes in iblua pusaak eun ok-oke', in anfee sin neu na' Isak.
Na' Abraham nasaeb on
7-8 Na' Abraham anmaet tabu in nmoin naan toon nautn es am bo' hitu mniim (175). 9-10 Nalalit in anah na' Isak ma na' Ismael ansuub anbi nuat Makpela, le' anpaumaak kuan Mamre. Nahunu te, na' Abraham ansoos po'an nane na'ko atoin Hetes es, le' in kanan na' Efron, na' Sohar in anah. Sin nsuub nahunun eina' Sara anbi nuat nane. 11 Na' Abraham anmaet nalali te, Uisneno anfee tetus-athoes neu na' Isak ma in nmoni nbi tetus ma ao-mina' nok mamut. Tabu nane, na' Isak natua npaumaak oe hani' Beer Lahai Roi.
Na' Ismael in sufan
12 Na' Ismael in nu'un on ii. In le' nane, na' Abraham nok in fee tnana' eina' Hagar sin anah. Eina' Hagar nane, eina' Sara in ate na'ko pah Masir. 13-16 Na' Ismael in aan monen tuaf bo'es am nua'. In aanh eun es eun le' ii, nmakatui eun na'ko mone 'naek antia a'heut susu, es eun le' na' Nebayot, na' Kedar, na' Atbeel, na' Mibsam, na' Misma, na' Duma, na' Masa, na' Hadat, na' Tema, na' Yetur, na' Nafis, ma na' Ketma. Li'aan monen le' ii, sin anlalin aam uuf neu too pah bo'es am nua, es-es ate, anmui' kuun in pah. Sin nakanab sin pah, es-es ate natuin sin bei' ma sin nai' sin kaank enu.
17 Na' Ismael anmaet tabu in anmoin naan toon nautn es am bo' tenu mhiut (137). 18 Mes in sufan sin nane, anmamusun es nok es. Nalalit sin npe'en ma natuan anbaits ok anmulai na'ko Hawila tal antia Sur, le' anmanakan nok pah Masir, nfini ntian pah Asur.a
Nu'un na'ko na' Esau ma na' Yakop
19 Na' Abraham in anah na' Isak in nu'un, es le' ii. 20 Tabu na' Isak naan bi Ripka, na' Isak anmoin naan toon bo' haa'. Bi Ripka in amaf, es le' na' Betuel. In naof, es le' na' Laban. Sin le' nane atoin Aramas, na'kon pah Padan Aram.b
21 Bi Ripka ka nahoin fa'. Etun na' Isak an'onen ma ntoit UISNENO he nfei bi Ripka in apun. UISNENO nneen in onen nane, es na' bi Ripka na'aup. 22 Bi Ripka natniin ate, in na'aup li'aan kuana'. Li'aan eun nane anmatiikn eun piut anbin sin einaf apun. On nane te bi Ripka natenab ma nak, “Nasaa' am es li'aan nua eun ii, on le' ii?” Nalalit in nataan neu UISNENO.
23 Ma UISNENO nataah ma nak,
“Anbi ho apum, anmui' naan li'ana' nua' le' of he nlalin uuf nua' le' sin of anmamusun piut-piut.
Ana kliko' of nabe'i nneis na'ko ana 'nae.
Ma tataf of anlail ameput neu in olif.”
24 Tabu in neon na antia te, bi Ripka nahoin li'aan kuana'. Monen oke. 25 Ahuunt ee me'-mee', ma in aon ee ma'funu'. Es na' sin nakanab na' Esau (le' he nuu paap mese' on le' uab tuuk es, le' in otan nak, ‘ma'funu'’).
26 Nalalit na' in olif. Mes tabu in npoi, in annaa' in tataf in haen tikan. Es na' sin nakanab na' Yakop (le' he nuu paap mese' on le' uab tuuk es, le' in otan nak, ‘haen tikan’). Tabu nahoin sin ite, na' Isak anmoin naan toon bo' nee yen (60).
Na' Esau annona in hak aan mone 'nae
27 Tabu li'aan kuana' nane sin na'naen ate, na' Esau anlail aliu' mui' fui. In nloim he natua nbi nasi. Mes na' Yakop atoin ata'as. In nloim he nbi-bi yaa ume. 28 Na' Isak biasa anloim he neuk siis fui. Es nane te, in nneek nanes-nesib na' Esau. Mes bi Ripka nneek nanesib na' Yakop.
29 Neno wes, tabu na' Yakop nahaan koot kase le' ma'oef, na' Esau nfain neem na'ko li'ut. In nhae nmaet ma namnaah anmate msa'. 30 On nane te in na'uab neu na' Yakop ma nak, “Ako! Ho msuun maan kau oef me'-mee le' ho muhaan ee nane. Maski kle'o, he au 'ha'taen ok. Au umnaah ka ubei' fa yen.” (Etun sin nteek ee te Edom, le' he nuu paap mese' on le' uab tuuk es, le' in otan, nak, ‘mee'’.)
31 Nalalit na' Yakop nataah ma nak, “Leko, taat honi. Mes kaul ho mfee kau ho hak aan mone 'nae nane fe'!”c
32 On nane te, na' Esau nataah ma nak, “Ahh. Te saa' es le' hak aan mone 'nae nane! Ho mpaal. Au umnaah ka ubei' fa yen. Ho msuun maan kau oef he meki neem labah. Au he 'uah een.”
33 Mes na' Yakop na'uab antein ma nak, “Taat honi. Ampao kle'o. Ho msuup fe' am mak, ho mnona' kau hak nane.” On nane te na' Esau nsuup on le' nane. 34 Oka te na' Yakop ansuun ma nfeen ee koot kaes oef nane nok utunu'. Na' Esau nbukae nlali te, in anfeen ma nnao kuun.
Nok lanan nane, na' Esau annona' nani in hak aan mone 'nae.