Sin namin na' Isak bifee he nmafeeb aa
24
Na' Abraham in ua mnaun, tal antia in namnais le'-le'uf. UISNENO npanat, ma nfee ne tetus-athoes. 2-3 Na' Abraham anmui' in atoin mapalsai' es, le' an'ulus ale' kanan in i'mu'in. Neno wes, na' Abraham anboin ee ma nak, “Amneen mulek-leko! Au 'toit ko, he ho msuupa ampaek UISNENO le' anmoe' neno tnanan ma pah-pinan In kanan mak, ho kaisa' mtoti bifee munif na'ko atoin Kananas sin he mafeeb aa neu au anah na' Isak. 4 Mes ho lo he mnao meu au kua-mnasi, meu au fomili sin. Ho maim bifee muinf es ambi naa, he tmafeeb aa nok au anah.”5 Nalalit ate nane nataan na' Abraham ma nak, “Leko, pah! Mes au he 'moe' on mee, kaul bifee munif nane ka nloim fa he nok neem neu ii? Kaul on nane te, au lo he 'eik na' Isak he tmafeeb aa aal pai naa, ai' on mee?”
6 Na' Abraham nataah ma nak, “Ho mumnau mulek-leko'! Maski on mee msa' ho ka mubei' fa he meik au anah nnao aal pai naa! 7 Mumnau', UISNENO le' annaa' kuasa et neno tunan, neik kau poi ulail u'ko au kua-mnasi', ma neik kau 'taam a'tia bale ii. Ma In nahakeb lais manba'an nok kau msa' ma nak, ‘Au of a'fee ko bale ii ok-oke' 'eu ho sufam ma ho ka'um sin.’ On nane te kais ho nekam nane na'oina'. Ho mnao. Uisneno of anleek In ameput na'ko sonaf neno tunan he nfei lanan neu ko, he ho mubei' muteef mok bifee munif, le' he nlail au anah in fee. 8 Mes kaul bifee nane ka nloim fa he neem nok ko neu ii te, ho supat ii ka naah ko fa'. Maski on mee msa' ka nabei' fa he ho meik na' Isak meu pai naa.”
9 Nalalit ate nane ansuup neu na' Abraham ma nak, “Leko, pah. Au 'moe' utuin ho uabam nane ok-oke', pah.”
10 On nane te ate nane anpiil naan bikaes unta bo'es. In nasaeba' blua huma'-huma' le' namasan ma ma'upa' anbi bikaes unta sin. Oka te in nok in aon-bian sin annaon neun na' Nahor in koot et pah Mesopotamia.b
11 Ate nane in nnao piut tal antia koot nane in ninen. Nalalit in nasnasab in bikaes unta sin anbin nane, anpaumaak oe hani' es. Tabu nane manas anmabe een. Tabu nane bifee muinf eun neman he nahenun oe anbi oe hani' nane. 12 Nalalit ate nane an'onen ma nak, “UISNENO le' au aam usi' na' Abraham in Uisneno. Amtulun amfei kau lanan, maut he au salit antia ma upein in nesan alekot. Muklila' Uisneno Ho nekam alekot meu au aam usi', ma mumnau in lais manba'an meu kau. Maut he leko te, au uteef 'ok na' Isak in fee anbi bale ii. 13 Usi', au 'haek et oe hani' ii ninen. Li' feot muinf eun neman na'kon koot he nahenun ma nsuun oe na'kon oe hani' ii. 14 On nane te au 'toit Ko, pah, on ii: Kaul au u'uab 'ok bifee muinf es 'ak, ‘Palmiis, pah. Kaul leko te, musanut ho 'nai' oe he au 'iun 'aan akle'o.’ Kaul in nataah ma nak, ‘Leko, pah. Ma au of u'inu' ho bikaes unta sin imsa'.’ Na' le' nane anlali 'taka' nak, bifee munif nane es le' Uisneno Ho mbeti amlail na' Isak in fee! Nok a'taka' nane, au uhiin 'ak, Uisneno mululu' mulail Ho manekam meu au aam usi', na' Abraham.”
Na' Abraham in ate na'euk li' feot munif bi Ripka
15-16 In fe' ka n'onen nalail fa te, li' feot muinf es neem. In kanan bi Ripka. In le' nane na' Abraham in olif na' Nahor ma bi Milka sin upuf. In aamf ee, na' Betuel. Bi Ripka namaas a'teeb-teeb, ma fe' ao-'temef. In nsaun neu oe hani' nane, nalalit in naheun oe neu in i'nai' oe, oka te in nsae nfain.
17 Tabu bi Ripka nsae nfani te, na' Abraham in ate nane naen neem ansenu. Nalalit in ntoti ma nak, “Palmiis, pah! Amfee maan kau oe he au 'iun 'aan akle'o.”
18 Nalalit bifee munif nane nataah ma nak, “Leko, pah!” Es nane te in nasanut in i'nai' oe nane lab-laab, ma anfeen ate nane he niun. 19 Ninu nlail on nane te, bifee munif nane na'uab ma nak, “Maut he au 'kui oe he u'inu' ho bikaes unta sin. Maut he sin ninun tal namsenan.” 20 Nalalit in nnao n'opan oe nesif nane anbi 'bai oe. Oka te in ansae ma nsaun he naheun oe na'ko oe hani' nane, ma na'inu bikaes unta sin ok-oke', tal antia namsenan. 21 Na' Abraham in ate nane anhake ma ntaa'-taa' kuun, mes ankius nalek-leko' li feot munif nane in i'mo'en. In nateen-tenab ma nak, “Le' Uisneno nbeti ye es le' ii, kah?”
22 Bikaes unta sin ok-oke' ninun tal namsenan. On nane te ate nane nait ikleni mnatu' le' sin biasa antao anbi sin paank enu, ma niti mnatu' paasn es ma nanitib bifee munif nane neu in i'niimn eun nua sin.c 23 Nalalit ate nane nataan ma nak, “Ho ama' in kanan sekau? Kaul leko te, mabe' ii au 'tuup a'tahan 'bi ho ama' in ume.”
24 On nane te bifee munif nane nataah ma nak, “Au ama' kanan na' Betuel. Au nai' es le' na' Nahor. Au bei' es le' bi Milka. 25 Anbi hai ume anmui' hala' tupa' neu ki. Ma nmui' huun neu ho mui't enu.”
26 Nalalit ate nane na'luli ma na'bees neu UISNENO. 27 Oka te in na'uab ma nak, “Pules ma liatas neu Uisneno! Usi nfei lanan neu kau, tal antia au uteef 'ok au aam usi' in fomili sin anbin ii. Nok lanan nane, Uisneno naklila In nekan alekot neu au aam usi', na' Abraham, ma natiis in lais manba'an neu kau.”
28 Nalalit bifee munif nane naen anfain lab-laab, he n'eut lasi nane neu in ume nanan. 29-30 Bi Ripka in naof kanan na' Laban. Tabu in niit blua amnaut eun, ma nneen bi Ripka in uaban nane te, na' Laban naen anpoi lab-laab, he na'euk nok ate, le' fe' anhaek nabalah nok in bikaes unta sin anpaumaak oe hani' nane. 31 Nalalit na' Laban na'uab ma nak, “Aam! UISNENO neik ko mtia ii yen nok ao-mina'. On nane te kais amhaek mubalah ambi ii. Au u'auba' he tnao teu hai ume. Hai miloitan ke'an, ma bukae neu ko ma neu ho bikaes unta sin, pah.”
Na' Abraham in ate ntaam antoit bi Ripka
32 Nalalit na' Abraham in ate nane nnao natuin na' Laban, he nnaon neu na' Betuel in ume. Na' Laban sin antulun he nasanut sin iblua' eun na'kon bikaes unta sin. Nalalit sin nhao bikaes unta sin neik huun. Sin nekin oe msa' he ate nane nok in aok-biak sin nafanun. 33 Tabu sin n'atol bukaet anbi mei te, ate nane na'uab ma nak, “Nahuun na'ko hai he mbukae te, au 'toit sona' a'kle'o he 'eut 'aan hai sailt ee, pah.”
On nane te na' Laban nataah ma nak, “Neu! Leko, pah.”
34 Ate nane na'uab ma nak, “Au le' ii, hi nai' na' Abraham in ate. 35 UISNENO anfee tetus nathoe neu au aam usi', tal antia in anmui' namneo-namneo. Uisneno anfee ne muti' ma mnatu', ate (et ko bifee ma atoni), ma mu'it amfau le'uf, es le' biya, bikaes unta, bikaes keledai, 'bibi, ma 'bib-kase. 36 Tabu au aam usi' ma au ein usi' namnasin on ii te, eina' Sara nahoin naan li'aan mone yes. In es le' he nsium aam usi' na' Abraham in pusaak eun ok-oke'. 37 On nane te au aam usi' na' Abraham anleun kau he 'suup ma 'ak, ‘Ho ka mubei' fa he mait bifee munif Kananas, he mafeeb aa neu na' Isak. 38 Mes ho lo mees he mait bifee munif mu'ko au fomili sin, he nlail na' Isak in fee.’
39 Nalalit au utaan au aam usi' ma 'ak ‘Mes on mee kaul li' feot munif nane ka nloim fa he nok neem neu ii?’
40 Nalalit in nataah ma nak, ‘UISNENO le' au utuin In i'lomin piut nane, of anleek In ameput na'ko sonaf neno tunan he nfei lanan neu ko, he ho mubei' muteef mok li' feot munif, le' he nlail au anah in fee. 41 Mes kaul au fomili sin ka nlomin fa he nafetin li' feot munif nane he nok neem neu ii te, ho supat ii ka naah ko fa.’
42 On nane te lelon na au 'oum a'tia oe hani' te, au 'onen a'bi au nekak 'ak, ‘UISNENO le' au aam usi' na' Abraham in Uisneno. Amtulun amfei kau lanan, he au salit antia ma upein in nesan alekot. Maut he leko te, au u'euk 'ok na' Isak in fee nbi bale ii. 43 Usi' au 'haek et oe hani in ninen. Ma li' feot muinf eun neman na'kon koot he nahenun ma nsuun oe anbin ii. On nane te au 'toit on ii: kaul au u'uab 'ok bifee muinf es 'ak, “Palmiis, pah! Kaul leko te, musanut ho 'nai' oe he au 'iun 'aan akle'o.” 44 Kaul in nataah ma nak, “Leko, pah! Ma au of u'inu' ho bikaes unta sin imsa'.” Na' le' nane anlali 'taka' nak, bifee munif nane es le' Uisneno Ho mbeti ye anlail na' Isak in fee!’
45 Au fe' ka 'onen ulail fa te, bi non Ripka neem neik in i'nai' oe, ma naheun oe nbi oe hani' nane. Tabu in nsae nfani te, au 'toti m'ak, ‘Palmiis, pah! Amfee maan kau oe he au 'iun 'aan akle'o.’ 46 On nane te in nasanut in i'nai' oe nane lab-laab, ma nak, ‘Leko, pah! Maut he au uheun oe he u'inu' ho bikaes unta sin.’ Nalalit au 'iun, ma au bikaes unta sin ninun amsa'.
47 Nalalit au utaan ee ma 'ak, ‘Ho ama' in kanan sekau?’
In nataah ma nak, ‘Au ama', es le' na' Betuel. Au nai', es le' na' Nahor. Ma au bei', es le' bi Milka.’ Nalalit au uklenib nbi in panan, ma unitib niti mnatu' paasn es.
48 Oka te au u'luli' ma u'bees 'eu Uisneno m'ak, ‘Pules ma liatas 'eu Uisneno! Usi Ho mfei lanan meu kau, tal antia au u'euk 'ok au aam usi' in fomili sin anbin bale ii. Ma au u'euk ulail 'ok na' Isak in fee msa'. 49 On nane te tabu ii, kaul sin ama aal ki mneek au aam usi' na' Abraham ate, am'eut kau muti'. Kaul kaah fa te, am'eut kau muti' amsa'. Maut he au uhiin 'ak, au he 'moe' on mee.”
Bi Ripka in fomili sin ansium oko'
50 Ate nane na'uab nalali te, na' Laban ma na' Betuel nataan ma nak, “Kaul UISNENO es an'atol on nane te, hai he mak saa' antein. 51 Bi Ripka es ii. Mokan he mnao nai'. Maut he in nlail na' Abraham in nanef, tatuin saa' le' UISNENO n'atol nani.”
52 Anneen on nane te, na' Abraham in ate nane, na'bees antia nain, ma ntoit makasi neu UISNENO. 53 Oka te in nait napoitan noni mnatu' ma noin muti', ma blua-paken amasat, nalalit anfee sin neu bi Ripka. In anfee neu bi Ripka in naof ma einaf amsa' halia le' ma'upa. 54 Nalalit na' Abraham in ate nane, ma in aon-bian sin, anbukaen nabuan. Oka te sin ntupan anbin nane. Nokfa' te, sin nfenan. Nalalit ate nane an'eut neu uim tuaf eun ma nak, “Au 'toit sona' he mufetin kau, kaul leko te, hai mfain nai' tabu ii meu au aam usi'.”
55 Mes bi Ripka in naof ma in einaf nak, “Hi mmanaap miis he misaa'? Maut he bi Ripka namaika' naan nok kai neno bo'es aah. Nalalit na' hi mkoen om mokan.”
56 Mes ate nane nataah ma nak, “Koi, ein! Kais mutau mtein kau! UISNENO ntulun nalail kau, tal antia au u'euk ulail 'ok na' Isak in fee. On nane te ein, hi mifetin kai he hai mfain ma meik lasi ii meu hai aam usi'.”
57 On nane te sin nataah ate nane ma nak, “On ii! Hit tboin bi Ripka he tataan. In i'loimn ee, on mee?”
58 Oka te sin nboin bi Ripka ma nataan ma nak, “Ripka! Tabu ii, es le' ho. Ho mloim he mok main atoni ii, ai' on mee?”
Nalalit bi Ripka nataah ma nak, “Au 'loim he 'ok, pah.”
Na' Isak ma bi Ripka nmaka'an eun
59-60 Nalalit sin nafetin bi Ripka, ma in ate le' an'uuls ee na'ko in aan'-ana', he nnaon nabuan nok na' Abraham in aten nane. On nane te sin nasain bi Ripka nekin tetus-athoes ma nak, “Ripka! Maut he leko te, Uisneno nfee ko anah amfa-faun, he ho sufam ma ho kau'm eun ansaat ok nifun-nifun. Ma hai mifneek henati ho sufam ma kau'm eun niis sin musun sin imsa'!”
61 Nalalit bi Ripka nok in ate nane nabuab sin iblua' eun, ma ansaen bikaes unta, ma nnao nanin, natuin na' Abraham in ate sin.
62 Na' Isak natua et pah Negep. Tabu nane, in fe' anfain neem na'ko oe hani' Beer Lahai Roi. 63 Neno nmaeb es ate, in npoi na'ko in uim la'at he na'oin-'oin kuun. In na'aiti in matan, ma napeen-pene te, in niit bikaes unta puukn es annao neman.
64 Tabu bi Ripka nkius niit na' Isak ate, in nsaun lab-laab na'ko in bikaes unta. 65 On nane te in nataan na' Abraham in ate nane ma nak, “Aam, atoni le' annao neem le' naa, sekau?”
Ate nane nataah ma nak, “Na' Isak es le' naa.” On nane te bi Ripka nait in mau' ana' ma nsakteun he nsakluub naan in human.