Na' Abraham napoib kesel Abimelek
20
Nalalit na' Abraham na'oina' na'ko Mamre, nnao neu pah Negep antoom kaliin a'ne'u. In natua nbi kuan Kades ma kuan Sur sin itnaank enu. Mes ka 'loo fa te, in na'oina' antein neu kuan Gerar. 2 Ma in n'etun abiit eun kuan nane ma nak, eina' Sara nane, in fetof. Es nane te, na' Abimelek, kesel Gerar, nleek tuaf ma ntaam antoit bi Sara. Nalalit sin neik ye neu kesel in sonaf.Nalalit UISNENO nasnasab bifee ahonit ma nakiuba' bifee munif, na'ko kesel Abimelek in too nuu, natuin in ansium naan na' Abraham in fee.a
3 Fai yes, Uisneno nakliil On anbi nanait neu kesel nane. In na'uab ma nak, “Ho he mmate een! Natuin ho msium maan atoni in fee!”
4-5 Mes na' Abimelek nataah ma nak, “Usi'! Au ka po'-poe 'iit fa bifee nane. Ma au ka 'saan fa msa'. Na' Abraham neikn on an'eut ma nak, in fetof! Bifee nane anmanauk on le' nane msa'. Es nane te, au 'leun tuaf ma ntaam antoti ye nok neek muti'. On nane te Usi' kais musaan kau, pah!”
6 On nane te Uisneno nataah ma nak, “Namneo. Au uhiin 'ak ho nekam nane knino'. Ma Au es le' a'kaiha' ko he kaisa' mpoe' bifee nane. Nok lanan nane te, ho ka musanab fa meu Kau. 7 Tabu ii, mnona mufani' bifee nane meu in mone. Atoni le' nane, Au mafefa knino'. On nane te amtoti he n'onen henati' ho kaisa' ammaet. Mes kaul ho ka mnona' mufani' fa bifee nane, ho mumnau mulek-leko! Ho mok ho too nuu of ammaet sapeun.”
8 Nokfa te, kesel anboin in ameupt eun oke', ma npiu' in nanait nane. On nane te sin aal sin namtaun. 9 Nalalit kesel anboin na' Abraham, ma nataan ee ma nak, “Au 'mo'e saan ko saa', es ho mmoe' he hai mipeni snama'? Ho kais mupoib om on le' nane. 10 Ho mutenab saa', es ho mmoe' on le' ii?”
11 On nane te na' Abraham nataah ma nak, “Aam usi'! Au 'baiseun. Au utenab 'ak hi al-aal ki ka mihiin fa Uisneno. On nane te hi of mi'maet kau, he maan au fee. 12 Au lo u'uab namneo, 'ak bi Sara nane au feto'. Hai nua kai ama' mese' mes es-es ate ein es. Es na' hai ma'ana' on le' ii. 13 On nane te tabu Uisneno nleek kai he mpoi mi'ko hai kuan, ma mnao mi'loo-loo meu kua-'teta', au 'etun 'ain 'eu au fee ma 'ak, ‘Hit tbi mee-mee yah, kaul atoni natanan anmatoom nok hit nua kit, ma kaul ho mneek kau te, mutaah am mak, hit fetof-naof.”’
14-16 Nalalit kesel Abimelek annona' nafani' bi Sara. On nane te in na'uab nok bi Sara ma nak, “Tabu ii, au 'baen noin muti' fuan niufn es 'eu ho nao', he nfani 'taka' ma nak, au ka 'saan fa saa'-saa' 'eu ko. Maut he too mfaun nahinen on le' nane!”
Nalalit kesel na'uab neu na' Abraham ma nak, “Abraham! Au pah ee manuan neu ko. Ho mloim he mutua mbi mee-mee yah, es le' ho.” Nalalit in nfee ne biya, 'bibi, ma 'bib-kase. In nfee ne ate msa', atoni ma bifee.
17-18 Tabu kesel annona' nafani' bi Sara neu in mone, na' Abraham an'onen he Uisneno nfei bifeen nane sin 'aupk enu. Ma sin nabei' nahoni ntenin.b