Abiit eun Sodom sin bulalu
19
Tabu Uisneno fe' na'uab nok na' Abraham, In ameupt eun le' atoin nua eun nane, annaon nfinin neun koot Sodom. Sin antian nane te, manas he nuu ntees een. Tabu nane, na' Lot fe' antoko nbi eno' 'naek he ttaam teu koot nane.a In niit atoin nua eun nane te, in nnao nseun sin. In nli'tuu ma na'luli' anbi sin maatk enu. 2 Nalalit in na'uab ma nak, “Sin ama aal ki! Au u'auba' ki he mkoen om eim fe' meu au ume, pah. Maut he hi mifaun ma mtuup maan fai yes ambi ii. Nneis nuu nmeu te, na' hi mnao mfiin, pah.”Mes sin nataah ma nak, “Makasi, pah. Mes ho kais muhaeb om! Maut he hai mtuup ambi koot ii in imnelan.”
3 Mes na' Lot noik sin piut, tal antia sin nlomin he ntuup antaahn eun anbin in ume. On nane te na' Lot sin ntunun utunu', ma nabaalb eun bukae, ma sin nbukaen nabu'-buan. 4 Tabu sin fe' ka ntupan fa te, atoin Sodom sin, li'ana' ma 'naek neman oke'. Sin anhaken nfuun naan na' Lot in ume. 5 Sin nhuun eun ma nakan na' Lot bute'-bute ma nak, “Hoe, Lot! Atoin nua' eun fe' le' ii, et eun mee? Mupoitan sin neman, he hai mi'teli' sin!”
6 On nane te na' Lot anpoi, oka te an'eek eno'. 7 In na'uab ma nak, “Au aok-bian aal ki! Hi kaisa' mmoe amle'ut on nane meu au tamun ii. 8 Bait hi mneen fe'! Au aan feotn ee, tuaf nua'. Sin muin lek-lekon, ma fe' ao 'temen. Maut he au 'nona' ki sin. Hi he misaa' sin imsa' es le' hi. Mes hi kaisa' mmoe saa'-saa' meu au tamun ii. Tatuin hit halat ate, au lo he 'panat sin.”
9 Mes atoin Sodom sin nkoa' eun ma nak, “Ho kais mok amseol! Ho atoin amnemat. Ho atoni 'teta'. On nane te ho ka mmui' fa hak he m'atol kai. Leko nneis ho mu'loo mu'ko bale ii. Kaul kaah fa te, hai mmoe amle'ut meu ko, anneis na'ko atoin nua' eun nane!” Nalalit sin ntite ma nsapol na' Lot. Ma sin aal sin bu'-bua annaon he ntuut naleu' eno'.
10 Mes taum nua' eun nane, annona' napoitan sin i'niimk eun ma nheel nataam na' Lot neu ume nanan, ma sin n'eek eno'. 11 Nalalit sin nafolob atoin Sodom le' abiit eun eno', etun sin nable'-leon aah he naim eno'. Mes sin ka niit ee fa'.
Uisneno napoitan na' Lot sin na'kon Sodom
12-13 Nalalit taum nua' eun nane, nak na' Lot ma nak, “Lot! UISNENO nahine nlail abiit eun koot ii sin maufinun. On nane te In nleek kai he eim mileu' main koot ii. Es nane te ho mmu'i mtein fomili bian et koot ii, ai' kahaf? Kaul anmui aan mone, aan feto, nane', ai' sekaum-sekau, meik sin ampoi nai' mi'ko koot ii!”
14 Oka te na' Lot annao na'uab nok atoin munif nua le' anmafuut nekan nok in aan feotn ee, ma nak, “Amneen milek-leko'! Tabu ii, maen ampoi labah mi'ko koot ii nai'! Natuin UISNENO he naleu' niis koot ii!” Mes sin nateenb eun nak ai' na' Lot napoib on.
15 Nneis nuu nmeu te, Uisneno In ameupt eun nane, nalelab na' Lot sin he naen anpoin lab-laab nai'. Sin na'uab eun ma nak, “Lot! Amfeen nai'! Meik ho fee, ma ho aan feot nua' eun nane, maen ampoi misaitan koot ii nai'. Kais-kaisa' hi mmaet luum-luumn aah, ma mimleu' mibua' mok koot ii.”
16 Mes na' Lot fe' he na'eo'b on. Te kahaf, amneon ee, UISNENO he nsoi nafetin naan. Etun es taum nua' eun nane ansaok naan na' Lot in i'niman, in fee, ma in aan feot nua' eun nane, he napoitan sin na'kon koot nane. 17 Oka te tuaf es na'ko le' taum nua' eun nane nak, “Maen mimeep, he mmoin! Kais amniik koit! Kais misnaas ambi nonof! Maen amsae meu 'netu' naa he hi mmoin!”
18 Mes na' Lot nataah ma nak, “Koi, aam! Kais on nane, pah! 19 Ho mtulun kai he hai mmoin. Mes a'tubu naa, na'loo! Kais-kaisa' hai fe' ka mtia maan fa naa te, amleu't ee napein kai nbi laan atnanan, pah. 20 Amkius miit. Anmui' naan kuan aan' es ka na'loo fa na'ko ii. Kuan le' naa, ka mateka' fa', natuin in aan'-ana'. On nane te kaul ho mlomi te, maut he hai m'ain naa, hena' hai mmoin, pah.”
21 Nalalit in nataah ma nak, “Leko! Amnao nai'! Au of ka uleu' fa kuan le' nane. 22 Tabu ii, hi maen nai' meu kuan nane! Natuin au of ka 'moe' fa saa'-saa' fe', kaul hi fe' ka mtiaf.” Anmulai na'ko tabu nane, atoni nteek kuan nane nak, Soar, le' in otan nak ‘aan'-ana'’.
Koot Sodom ma koot Gomora nputu nmaten
23 Tabu manas ansae te, na' Lot sin antian Soar. 24 Nok askeken, UISNENO n'opan uul-ai ma balila' le' anpiin, ansaun neem na'ko neno tnanan neu koot Sodom ma koot Gomora. 25 UISNENO nout naklati' koot eun nane ok-oke' ma kuan eun le' anbin bale nane, ma ale' kanan amonit, es le' mansian, mu'it, ma hau anbin nane.
26 Tabu na' Lot sin naenan, in fee, anniik koit. Nok askeken ate, in nlail nii masi'.
27 Nok-nok ana te, na' Abraham anfani ntein neu bale le' afi neon aa, in anhake ma anhanet UISNENO. 28 Oka te in napene nsaun neu Sodom ma Gomora ma nonof amnela' 'naek nane oke'. In nkiso te, masu' sin ansaen neun neno tnanan akbua'-akbua' anbi mee-mee. Ma ai pina' nane nout niis ale' saa'-saa'.
29 Tabu Uisneno nout naklati' koot eun nane, In namnau In lais manba'an neu na' Abraham. Etun In ntulun ma napoitan na' Lot na'ko bale le' In nale'u we nane.
Na' Lot ma in aan feton
30 Tabu nane, na' Lot namtau he natua nabalah anbi kuan Soar. Es nane te, in nok in aan feot nua' eun nane, na'oin eun neun a'netu'. Nalalit sin natuan anbin nuat es.
31 Neno wes, in aan feot unu', nak in oilf ee ma nak, “Anbi bale ii, nfuun ma nateef ka tiit-tiit fa atoni he naan kit. Ma ka 'loo fa te, hit ama' namnais kuun een, ma ka nahoni ntein fa yen. 32 On nane te leko nneis, hit tamauf hit ama'. Nalalit hit ttuup tokan. Maut he hit atluut hit ama in sufan ma in ka'un.”
33 Anfai te, sin na'inu' sin amaf neik tua miin-kase, tal anmafu nmaet. Nalalit feto 'nae nnao ma ntuup nok in amaf. Mes a'naef ee nmafu nmaet, on nane te in ka nahiin fa neu in anmoe' saa' nok in aan feto.
34 Anmeu nfiin ite, feto 'nae nane, an'eut neu in oilf ee ma nak, “Fiin fai ii, au 'tuup a'lail 'ok hit ama'. Mabe' ii, ho paa'. Hit tamafu ttein hit ama', oka te ho mtaam amtuup mokan. Nok lanan nane, hit nua kit of tahoni ma ttaul hit ama in sufan.”
35 Mabe nane, sin namafu nteni' 'naef. Nalalit aan feto kliko', nnao ma ntuup nok in amaf. Mes a'naef ee nmafu nmaet, on nane te in ka nahiin fa neu in anmoe' saa' nok in aan feto.
36 Nok lanan nane, sin nua sin na'apun na'kon sin aam honi. 37 Nalalit na' Lot in aan feto 'nae nahoin li'aan mone yes. Feto 'nae nane nakanab in anah nane, na' Moap (le' he nuu paap mese' on le' uab tuuk' es antein, in otan nak, ‘neem na'ko ama'’). In es le' anlail aam uuf neu atoin Moapas tabu ii. 38 Nalalit aan feto kliko' nahoin li'aan mone yes. In nakanab na' Ben Ami (in otan nak, ‘li'ana' na'ko au ini’). In es anfani aam uuf neu atoin Amonas sin tabu ii.b