Tuaf teun neman ma na'euk nok na' Abraham
18
Tabu wes, na' Abraham natua npaumaak hau 'naek eun Mamre. UISNENO neem ma nakliil On neun. In nu'un on ii: neno nane, manas mapuutn ee kah, on nane te na' Abraham antook ma napein anin anbi in uim la'at enon. 2 Tabu na' Abraham na'aiti' matan ate, in niit tuaf teun anhaken anbin nane. On nane te in naen anseun sin. In nli'tuu, 3 ma in na'uab neu sin ma nak, “Sin aam eun! Kaul leko te, au u'auba' he tkoen ok teem teu hi ate kau au uim la'at ii. Maski mbukae oe luumn ahaa msa', leko pah. 4 Sin ama' aal ki misnaas akle'o mbi haun sin haofk enu. Maut he au aten sin nekin oe ma nafaun ki. 5 Au 'nao ubalab bukae 'eu ki, maut he hi mipein ha'tanes akle'o, hena' hi mkoen om amfiin. Au 'maliin, he 'tuthae 'aan ki, pah.”Nalalit sin nataah ma nak, “Leko, pah. Hai meis mok nane, pah.”
6 Nalalit na' Abraham naen antaam neu uim la'at nanan, ma an'etun bi Sara ma nak, “Labah! Mait maan uut alekot, a'sau' es. Ammoe' maan kit utunu.”a
7 Nalalit in naen neu in biya nuu, ma npiil naan biya apokat aan' es. In nleun in ameupt es he nlolo ma nahaan in sisin. 8 Nalalit na' Abraham annao nait susu, suus alites, ma siis hana' le' fe' nahaan nalali ye, oka te in neik sin neu amneem feu' eun nane. Tabu sin nbukaen ate, in anhake nbi hau wes uun ma ntuthae sin.
9 On nane te sin nataan ee ma nak, “Abraham! Ho fee bi Sara' et mee?”
Nalalit in nataah ma nak, “Et uim laa't aa nanan, pah.”
10 On nane te tuaf es na'ko sin teun eun nane na'uab ma nak, “Of oin toon amnemat on le' ii te, Au 'fain 'oum. Tabu nane, ho fee bi Sara of nahoni nlail li'aan mone yes.”
Tabu sin na'uab eun on nane te, bi Sara' nneen na'ko eno in kotin. 11 Tabu nane, na' Abraham ma bi Sara' sin namnais niisn een. Bi Sara ka napeni ntein fa funan. 12 Anneen sin uabk eun ate, bi Sara' anmain aal in nekan. In natenab ma nak, “Hmmh! Au umnais 'iis een. Saa' anteni au mone an'ole ma nnools een. Nok lanan mee kah, he hai aom eun anmonin on le' amamonet ma amafeet feu' he mipein anah?”
13 Nalalit UISNENO nataan na' Abraham ma nak, “Nasaa am es bi Sara' anmain? In natenab nak ai' saa' le' Au u'uab ee le' ii, of ka nlail fa, natuin in namnais yen, kah? 14 Au le' ii, UISNENO! Ka tiit tain fa saa' es le' Au ka ube'i 'mo'e fa. Mumnau mulek-leko, oo! Kaul Au 'fain 'oum toon amnemat, bi Sara' of nahoni nlail li'aan mone yes.”
15 Anneen on nane te, bi Sara' namtau'. Nalalit in anpeen ma nak, “Au ka 'main kuuk fa, pah!”
Mes Uisneno nataah ma nak, “Fe' le' ii ho mmani teeb-tebe te.”
Na' Abraham anhanet Uisneno he kais anhukun abiit eun Sodom
16 Nalalit atoin teun eun nane nnaon nfinin neun koot Sodom. Na' Abraham annao nasain sin antian laan atnanan. Antian nane te, sin napeen niit koot Sodom. 17 Nalalit UISNENO natenab ma nak, “Leko nneis, Au 'eut 'eu na' Abraham ma 'ak, Au he uleu' koot Sodom. 18 Natuin na' Abraham in sufan sin of ansaat ok tal namfaun, ma nlalin uuf es, le' ma'tane. In of anfani amneik tetus-athoes amsa' neu ale' kanan uuf anbi pah-pinan ii. 19 Au 'piil ulali ye, he in nanoina' in aanh eun ma tuaf bian antein, he natuin UISNENO In lanan piut, ma anmonin nok neek amneot ma amnonot. Kaul sin nmo'en on le' nane te, Au lais manba'an 'eu sin of natiab on.”
20 On nane te UISNENO nakua' a'an neu na' Abraham ma, nak “On ii! Au 'neen a'lail too mfaun eun ansakoin abiit eun koot Sodom ma koot Gomora sin maufiunk enu. Sin bulalut maneun leu'f een. 21 Etun Au 'saun 'oum, he 'iit 'eik Au matak ma uhiin ale' saa'-saa' le' Au 'neen sin nane, teeb-teeb, ai' kahaf. Kaul kaah fa te, Au of uhine msa'.”
22 Tabu UISNENO fe' na'uab nok na' Abraham, atoin nua' eun nane sin annaon nfinin neun koot Sodom. 23 Na' Abraham anfonat anpaumak-maak Uisneno, oka te in nbaisenu ma nhaent Ee ma nak, “Koi, Aam Usi'! On mee? Ho he muleu' atoin leko ma atoin amle'ut hae mese' nani, ya? 24 Kaul anmui' atoin leko tuaf bo' niim (50) anbin koot nane, Ho he muleu' sin oke msa'? Ai' Ho ka muleu' fa koot nane, natuin Ho mneek sin. 25 Aam Usi'! Kais' ammoe' on nane! Kais-kaisa' atoin lekon nane nmaten amsa', tabu Ho muleu' atoin maufinus sin. Aam Usi', Ho es amfain Afeek Lasi et neno tnanan ma pah-pinan. Es nane te, Ho meikn Om muhiin mak le' nane ka namneo fa, ahoit.”
26 UISNENO nataah ma nak, “Kaul Au upein atoin leko tuaf bo' niim anbin koot Sodom, Au ka 'hukun fa koot nane, natuin Au 'neek sin.”
27 Na' Abraham na'uab antein ma nak, “Aam Usi'! Kais muto'an kau, ahoit. Leko te, au he u'uab a'tein. Au le' ii ala mansian amonot. Au ka uhiin fa saa'-saa' ahoit. 28 Ta'leta', kaul atoin leko ka ntia fa tuaf bo' niim, mes ala tuaf bo' haa' mniim aah ate, on mee, ahoit? Kaul ankuuln ahaa tuaf niim ate, on mee? Ho he muleu' koot nane?”
Uisneno nataah ma nak, “Kaul Au upein atoin leko tuaf bo' haa' mniim anbin koot nane, Au ka 'eu he ule'u we fa.”
29 Nalalit na' Abraham anhanet antein ma nak, “Kaul ala atoin leko tuaf bo' haa' yah ate, on mee, Aam Usi'?”
In nataah ma nak, “Kaul Au upein atoin leko tuaf bo' haa', Au ka 'hukun fa sin.
30 Na' Abraham ansanane ntein ma nak, “Aam Usi'! Kais mutoo', ahoit. Mes kaul atoin leko ala tuaf bo' tenu waah ate, on mee, ahoit?”
In nataah ma nak, “Kaul Au upein atoin leko tuaf bo' teun, Au ka 'hukun fa sin.”
31 Nalalit na' Abraham ansanane ntein ma nak, “Aam Usi'! Kais mutoo', ahoit. Au he utaan a'tein a'kle'o. Kaul atoin leko ala tuaf bo' nua yah ate, on mee, ahoit?”
In nataah antein ma nak, “Kaul anmui' atoin leko tuaf bo' nua' Au ka 'eu he 'hukun fa koot nane.”
32 Na' Abraham nasoup in haan totis ma nak, “Aam Usi'! Au 'sanane 'tein haef es, mes kais muto'an kau, ahoit. Kaul ala nmui' yaah atoin leko tuaf bo'es, on mee, ahoit?”
In nataah amsa' ma nak, “Kaul Au upein atoin leko tuaf bo'es anbin nane, Au ka uleu' fa koot nane.”
33 Na'uab nalali te, UISNENO nnao nfiin. On nane te na' Abraham anfain-koit.