3 On nane te na' Abram anli'tuu ma na'luli tal antia nain. Nalalit Uisneno nakua' a'an anfini ma nak, 4-5 “Au 'moe lais manba'an 'ok ko, on ii: ho of amfain aam uuf meu uuf amfaun. Es nane te, ho kanam nane ka na' Abram fa yen (le' in otan nak ‘amaf le' mateka’), mes na' Abraham (le' in otan nak ‘aam uuf neu uuf amfaun’). 6 Au of a'moe ho sufam ma ho kau'm eun amfau-le'uf. Au of uhakeb uuf namfau u'ko sin, ma kesel amfaun of anpoin ma nbolan na'ko sin.

7 Au 'naa' umep-mepan lais manba'an ii 'ok ko ma ho sufam ma ho ka'um sin. Lais manba'an ii nabal-baal, natuin Au le' ii, Uisneno 'eu ko ma 'eu ho sufam ma ho ka'um sin. 8 Au of a'fee pah Kana'an ok-oke 'eu ko ma 'eu ho sufam ma ho ka'um sin. Tabu ii, ho ala mutua mtaah naah. Mes ho sufam ma ho kau'm eun of anpaal pah Kana'an ii, tal antia nabal-baal. Ma Au of a'lail sin Uisneno amsa'. 9-10 Mes ho mok ho sufam ma ho kau'm eun lo he mnaa' mimep-mepan lais manba'an ii. Atoin eun ok-oke lo he na'heil eun. 11-13 Anmulai tabu ii, ale' atoni le' anmoin naan neno faun neki nsae, lo he na'heil eun. Ho mok ho fomili, ho ameupt eun oke', ho aten le' ho msoos maan sin anbin pah bian, hi aal ki lo he mi'heli'. 'Helit nane, anfani 'taka' nak hit nua kit im hit lais manba'an ii, mamalak anbi hi aom enu. 14 Atoni mee ya le' ka na'heli' fa te, ka napein fa paa' ma nama' anbi Au lais manba'an, ma ka maso'ik fa anbi Au too.”

15 Nalalit Uisneno antaul In a'an ma nak, “Anmulai tabu ii, ho kaisa mteek amtein ho fee ye te mak bi Sarai, mes mak bi Sara. 16 Au of a'fee tetus-athoes 'eu eina' Sara' he in nahoni nfee ko li'aan mone yes. Teeb! Eina' Sara of anfani ein uuf neu uuf amfaun. Ma kesel amfaun of anpoin ma mbolan na'ko in sufan.”

17 On nane te na' Abraham anli'tuu ma na'luli tal antia nain. Mes anbi in nekan nanan ate, in anmain. In natenab ma nak, “Atoni mnais ntenas on le' au, toon nautn es, of upein li'ana on mee? Ma eina' Sara le' anmoin toon bo' sio wen, ma namnais niis een amsa', in nabei' nahoin on mee?” 18 On nane te in nbaiseun Uisneno ma nak, “Usi'. Maut he na' Ismael es anpaal au pusaak sin. Ka saa'-saa' fa, ahoit.”

19 Mes Uisneno nataah ma nak, “Kahaf! Ho fee bi Sara of nahoin li'aan mone yes. Ho mukanab, na' Isak. Au lais manba'an nane of natiab on neun, ma neu in sufan ma in ka'un, tal antia nabal-baal. 20 Au 'neen a'lali msa', saa' le' ho mtoti ye meu na' Ismael. Es nane te, Au 'fee ne tetus-athoes amsa' ma Au 'moe' in sufan-kau'n eun namfaun. A'naak uuf bo'es am nua' of anbolan na'kon in sufan ma in ka'un sin. Ma in sufan ma in ka'un of anlalin pah a'naek es. 21 Maski on nane msa' Au lais manba'an ii, nmafuut nok ahaa ho anah na' Isak. Toon amnemat on le' ii te, bi Sara of nahoins ee.” 22 Nakua' a'an anlail on nane te, Uisneno naneku Won na'ko na' Abraham.

23-27 Neno nane amsa', na' Abraham anmoe natuin Uisneno In iplenat. On nane te in na'heli'. Nalalit in na'heli' na' Ismael, ma atoin eun abiit eun in ume nanan. In na'heli' aet atoin eun amsa'. Tabu nane na' Abraham anmoin naan toon bo' sio msio' (99), ma na' Ismael toon bo'es am teun (13).