Eina' Hagar ma in anah na' Ismael
16
1-3 Tabu nane, na' Abram anfain neem een na'ko pah Masir, ma natua naan toon bo'es een anbi pah Kana'an. In fee bi Sarai, fe' ka nahoin fa. Bi Sarai anmui' aet bifee yes, na'ko pah Masir, in kanan bi Hagar.Neno wes, bi Sarai nak in mone ma nak, “Aam! UISNENO n'eek au apuk. Leko nneis, ho mtuup mok au ate bi Hagar, maut he au 'mui anah.”
On nane te na' Abram natuin in fee ye uaban. Nalalit bi Sarai anfee bi Hagar he na' Abram anpanu' sin. 4 Nalalit na' Abram antuup nok bi Hagar. Ma bi Hagar na'aup. Mes tabu bi Hagar nahiin neu in na'apu te, in na'mook on. In ka na'baun on fa neu eina' Sarai.
5 On nane te eina' Sarai na'uab nok in mone ma nak, “Au es a'fee ko ate nane he nfani ho fee. Mes tabu in na'apu te, in ka nkiso nbani' kau fa. Ii ho laism aa! Paliis he UISNENO es nafeek hit lasi. Maut hena' ho muhiin!”
6 Nalalit na' Abram nataah ma nak, “On ii! Au 'aan ko nahuun. In namuin. On nane te ho es le' he mupleent ee. Es nane te, ho he mmoe saa'-saa' meun ate, es le' ho!” Nalalit eina' Sarai nmulai nha'mui' bi Hagar, tal antia bi Hagar naen nasaitan.
7 In naen antia bael luman es. On nane te UISNENO In ameput neno tunan es neem na'eku anbi bale le' anpaumaak oe mata' anbi lanan he nnao neu Sur. 8 Nalalit in nak, “Hoe! Hagar, eina' Sarai in ate! Nasaa' am es ho es ko ii? Ho mu'ko mee, ma he mnao meu mee?”
On nane te bi Hagar nataah ma nak, “Au 'aen usaitan au ein usi'.
9 Nalalit UISNENO In ameput nane na'uab nokan lek-leko ma nak, “On ii! Leko nneis ho mfain meu ho ein usi'. In anmoe' ko on mee msa', amsimo. 10 Kais mumtau. Au of a'moe' ho sufam ma ho kau'm eun amfau-le'uf, tal antia ka maso'ik fa. 11 Tabu ii, ho mu'aup. Ka 'loo fa te, ho of muhoin li'aan mone yes. Ho lo mees he mukanab, na' Ismael (le' he nuu namnees nok uab tuuk es, le' in otan nak ‘Uisneno nneen’), natuin UISNENO nahine nlail ho suset ma neek as'unu'. 12 Mes tabu li'ana nane na'nae, in of anmoin na'loo na'ko in olif ma in tataf sin. Natuin in on le' bikaes fui, le' ka nloim fa he natuin aplenat. Sekaum-sekaum amsa', in nlaban sin. Ma ale' atoni sin of anlaban nafani'.”
13 Anneen anlail on nane te, bi Hagar natenab anbi in nekan, nak, “Au 'iit a'lail UISNENO, le' In niit ma npanat kau.” Nalalit in nmulai nteek Uisneno npaek kanaf, “Usi le' anfiloil kau.” 14 Etun atoni nakanab oe mata nane, Beer Lahai Roi, (le' in otan “Oe mata' na'ko Usi Amonit, le' anfiloil kau.”) In baeln aa et kuan Kades ma kuan Beret sin itnaank enu. Tabu ii, oe mata' nane fe' etan.