Uisneno nahakeb nmanba'an nok na' Abram
15
Nalalit UISNENO nakliil On neu na' Abram, ma nakua' a'an ma nak, “Abram! Ho kais mumtau'. Au es a'panat ko u'ko ho musu sin. Ma Au 'fee ko mnisat a'naek.”2-3 Mes na' Abram nak, “Koi, Usi'. Maski Ho mfee kau saa'-saa' nathoe, nok-noki te, luman. Natuin au ka 'mui' fa anah he nlail au sufak. On nane te au 'mui pusaak amfaun he u'saa'? Namuni te, au ate na' Eliaser atoin Damsik nane es anpaal sin.”
4 Mes UISNENO nataah ma nak, “Ka on fa nane! Ho anah kuum of es le' ansium pusaak nane. Ka ho ate nane fa'.”
5 On nane te In neik na' Abram anpoi, nalalit In nak, “Ho mbaiseun miit meu neno tnanan! Amkius miit akfuun eun nane. Ho msoi' maan sin, ii kah? Ho sufam ma ho kau'm eun of amfau-le'uf on le' kfuun eun nane!”
6 Oka te na' Abram antebes UISNENO In a'an nane, nalalit UISNENO nso'i ye ntaam atoin neek amneo', natuin na' Abram anpalsai Ye.
7 Nalalit UISNENO ntalu ntein In uaban nane ma nak, “Au le' ii, Uisneno. Au es le' 'eik ko mpoi mu'ko ho kua-mnasi' Ur et pah atoin Kasdimas sin. Ma Au es le' a'fee bale le' ii, nfani ho auf pusaak.”
8 Mes na' Abram nataan ma nak, “Mes on mee, UISNENO? Nok lanan mee he na' au uhine m'ak bale ii nfani au auf pusaak?”
9 Nalalit In nataah ma nak, “On ii! Oum he hit ttao taan moe't es, he tfuut saa' le' lelon Au u'uab ee. Tabu ii, ho mnao mait mu'it meu Kau: mait biya einf es, 'bib einf es, ma 'bib-kaes keso wes. Sin le' nane lo he toon ten-tenu waah. Nalalit ho mheek maan kool oto 'biu wes, ma kool oot kase es.”
10 Oka te na' Abram annao nheek mui't eun nane oke'. Nalalit in anlool sin, ma nkaa' anbait mui't eun nane. Oka te sin siisk eun, in n'atol sin lanan nua nmakatui eun anbin nain, es ate anbaina' neu in bian. Mes kolon nane in ka nka'an fa sin. 11 Nalalit kool amneuk siis puun eun neman he nloi neik naan sisin le' nane. Mes na' Abram anliu' sin.
12 Tabu manas antees, na' Abram antuup anfiin. In nananai' nak, meis'okan ankuub naan. Ma in namtau nmaet.
13-15 Nalalit Uisneno nakua' a'an neun ma nak,
“Abram! Ho of ammoin tal antia mumnais miis, ma ho of ammate mbi neek mamut, oka te sin of ansuub ko nok lek-leko.
Mes ho sufam ma ho kau'm eun of annaon anlalin atoin amnemat anbi uuf bian sin pah.
Kua-tuaf abiit eun pah nane of na'aet sin, na'peni' ma na'meuk sin, tal antia toon natun haa'.
Mes Au of a'hukun abiit eun pah nane.
Nalalit Au of 'eik upoitan ho sufam ma ho kau'm eun na'kon bale nane, ma sin of nekin blua pusaak amfau-le'uf.
16 Au of a'atol he ho sufam ma ho ka'um batan niim amneemt eun, sin anfain neman neun bale ii ntenin.
Tabu ii, atoin Amoris sin natuan es eun bale ii. Atoin eun ii amoe' amle'u't eun, mes fe' ka mafena' fa.
Neno wes ate, kaul ho sufam ma ho ka'um sin anfain neman ntian bale ii te, Au of a'paek sin he 'hukun uleu' atoin Amoris sin. Natuin tabu nane, sin bulaulk eun kah een.”
17 Anfai on nane te, nok askeken, nai' fatu wes napoitan masu' ma paku 'nopo' es anpiin, sin annaon npiu sisin nane sin atnaank enu. 18 Tabu nane, UISNENO nahakeb lais manba'an nok na' Abram nak, “Au 'ba'an 'ain, Au of a'fee bale ii 'eu ho sufam ma ho kau'm eun, nmulai na'ko noe Masira tal antia noe Efrat, 19 ma atoni Kenis sin pah, atoni Kenas sin pah, atoni Katmons sin pah, 20 atoni Hetes sin pah, atoni Feris sin pah, atoni Refaimas sin pah, 21 atoni Amoris sin pah, atoni Kananas sin pah, atoni Girgasis sin pah, ma atoni Yebus sin pah.”