Na' Abram annao ma nok nafani' na' Lot na'ko makenat
14
Tabu nane, kesel haa' nabuan. Sin es eun le': Amrafel, kesel pah Sinear; Ariok, kesel pah Elasar; Kedarlaomer, kesel pah Elam; ma Tideal, kesel pah Goyim. 2 Tabu nane msa', kesel niim antein nabuan. Sin es eun le': Bera, kesel pah Sodom; Birsa, kesel pah Gomora; Sinap, kesel pah Adema; Semeber, kesel pah Seboim; ma Bela, kesel pah Soar. Nalalit kesel haa' eun nane anmakenan nok kesel niim' eun nane. 3 Kesel niim eun nane nabuan nok sin solauls eun anbin nonof amnela' 'naek Sidim, (le' tabu ii sin nteek ate nak, Tasi 'Maten).4 Makenat nane, na'uub on na'ko lasi le' ii: nahunu te, kesel Kedarlaomer naplenat kesel niim eun nane, toon bo'es am nua'. Mes toon bo'es am tenu ntaam ate, sin nmulai nlaban kesel Kedarlaomer.
5 Tabu toon bo'es am haa' ntaam ate, kesel Kedarlaomer nok kesel teun, neman nok sin solauls enu. Nalalit sin anmakenan ma niis pah-pah bian sin, es eun le': atoni Refaimas et pah Asterot-Karnaim, atoni Susimas et pah Ham, atoni Emimas et pah Sawe-Kirjataim, 6 ma atoni Horis le' et a'tubu Seir antian bael sona' El Paran in ninen. 7 Nalalit sin nfainkotin neun En Mispat (le' tabu ii, in kanan Kades). Nalalit sin ankuaas naan atoni Amalekas sin pah, ma ankuaas naan atoni Amoris le' natuan anbin pah Haseson-Tamar.
8-9 Nalalit kesel niim eun nane an'atol sin solauls eun anbin nonof amnela' Sidim. On nane te sin nmakenan nlaban kesel haa' eun nane. 10 Anbi mnela' nane, anmu'i boni' ter amfaun. Tabu makenat nane, kesel Sodom ma kesel Gomora nok sin solauls eun, anfeen am naen kukun. Bian anmoufu ntaman neun boin ter eun nane. Ma bian naen kukun neun a'tubu sin. 11 On nane te kesel haa' eun le' nisan anbin makenat nane, nasiik naan ma neik ale' blua' ma mnahat na'ko Sodom ma Gomora. Nalalit sin nfain kotin.
12 Tabu nane, na' Abram in anah na' Lot natua et Sodom. On nane te kesel haa' eun nane anheek neik na' Lot sin, ma nasiik neik sin iblua' eun ok-oke.
13 Mes anmui' tuaf es ansefi' yon. On nane te in naen an'etun na' Abram, atoni Ibranis. Tabu nane, anmui' atoin Amoris es, kanan na' Mamre. Na' Abram natua npaumaak na' Mamre in hau 'naek enu. Na Mamre in aon-bian sin, es eun le' na' Eskol ma na' Aner. Sin nua sin, na' Abram in soob lekon. 14 Tabu na' Abram ansium hanaf nak atoin eun anheek neik in oilf ee aanh ate, in nabuaba' in atoin ameupt eun le' anmakeen nahinen. Sin aal sin natun tenu mbo'es am faun (318). Nalalit sin nliu' natuin kesel haa' eun nane antian kuan Dan, le' na'loo et kaliin a'lii.
15 Anbi nane na' Abram anbait in ameupt eun nane anlalin pukan-pukan. Tabu fai te, sin ntaam ma ntaisiub atoin eun nane, mes bian naen kukun. Nalalit na' Abram nok inin, nliu' sin antian kuan Hoba, et koot Damsik in kaliin a'lii. 16 Nalalit na' Abram napein nafani' na' Lot, in ameupt eun, ma in iblua' eun oke', ma nafetin tuaf bian amsa'.
Na' Melkisedek na'euk na' Abram. In le' nane, kesel ma a'naak palsait neu Uisneno
17 Tabu na' Abram anfain neem na'ko makenat le' in niis naan kesel haa' eun nane te, kesel Sodom neem ansenu nbi nonof amnela' Sawe (le' atoin eun biasa anteek ate nak, Mnela' Kesel). 18 Tabu nane, na' Melkisedek kesel koot Salem,a ma in a'naak palsait amsa' neu Uisneno le' Anesit Afinit. In neem neik utunu' ma tua miin-kase neu na' Abram. 19-20 Nalalit in nfee tetus neu na' Abram ma nak, “Maut he Uisneno le' A'laat Le'uf nane, le' anmoe' neno tnanan ma pah-pinan nane, anfee tetus-athoes neu ko. Pules ma liatas neu Uisneno, le' anfee ko lasi mnisat na'ko ho musu sin!”
Nalalit na' Abram anfeen kesel Melkisedek baits es na'ko bait bo' na'ko ale' saa'-saa' le' in nasiik nafani' sin.
21 Nalalit kesel Sodom anbaiseun na' Abram. In na'uab ma nak, “Ama' Abram. Blua' eun le' ho musiik meik sin mu'ko au musun nane, maut he ho mpaal sin. Mes au 'toit ufani' ahaa, au too nuu.”
22 Mes na' Abram nataah ma nak, “Au 'suup 'eik Uisneno Anesit Afinit, le' anmoe neno tnanan ma pah-pinan In kanan 23 ma 'ak, au of ka 'ait fa blua' saa'-saa' es u'ko ho blua eun nane. Maski abas tuka' mese' amsa', au of ka 'ait fa, pah. Nok lanan nane, neno wes ate, ho ka mubei' fa he mu'uab am mak, ‘Au es umu'ib na' Abram.’ 24 Au ka 'loim fa saa'-saa'. Ala blua' mee ya le' au ameupt eun anpake nlail sin ite, ho kais mutenab amtein sin nai'. Ma maut he au soob teun eun ii, na' Aner, na' Eskol, ma na' Mamre, nait neik sin paa' eun, pah.”