Na' Abram ma na' Lot anbaits ok
13
Nalalit na' Abram nasaitan pah Masir, he nfainkotin neun pah Negep. In neik in fee, ma in iblua pusaak eun oke'. In oilf ee anah na' Lot nok amsa'. 2 Na Abram nane, atoin amu'it. In mui't eun amfau-le'uf. Noni mnatu' amsa', amfaun.3 Na'ko Negep in na'oina he nfain on kuan Betel ma kuan Ai sin itnaank enu. Nahunut, in natua nbi nane. 4 Ma in anbaik mei 'tulu' amsa'. Nalalit in na'luli' ma na'bees neu UISNENO nbi bale nane.
5 Na' Lot, le' nok na' Abram nane, anmui' mu'it amsa'. In mui't eun amfaun. Ma in anmui' ameput namfau msa'. 6-7 Mes bale nane ka manuan fa leko neu na' Abram ma na' Lot sin. Natuin sin i'mui'k eun namfaun, etun sin ka nabei' fa he nmoin nabuan. On nane te na' Abram ma na' Lot sin atuuks eun anmatoen, natuin huun le' anbi bale nane ka nanookb on fa neu sin mui't enu. (Tabu nane, atoin Kananas ma atoin Feris fe' natuan anbin nane amsa'.)
8 On nane te na' Abram nak neu in anah na' Lot ma, nak “Lot! Hit nua kit ume nanan. Nati' hit nua kit kaisa' tmakatenab, ma hit atuuks eun amsa' kais' anmatoen piut. 9 Leko nneis hit nua kit atbaits ok. Bale ii, fe' manuan. On nane te kaul ho mpiil bale aom-bian a'lii, te au 'ait aom-bian a'ne'u. Mes kaul ho mpiil bale aom-bian a'ne'u, te au 'ait aom-bian a'lii.”
10 Nalalit na' Lot ankiso nfuun am nateef. Ma in niit 'nonof amnela' 'naek noe Yarden le' oe nho-hoe, antia kuan Soar. Bale nane in amlian on le' UISNENO in etu, ma on le' pah Masir. (Tabu nane, UISNENO fe' ka naleu' fa koot Sodom ma koot Gomora. Etun bale nane fe' leko.) 11 On nane te na' Lot anpiil naan bale nbi 'nonof amnela' 'naek noe Yarden nane. Ma nua sin anbaits ok. Nalalit na' Lot annao n'ain neon-saet. 12 Mes na' Abram natua nabalah anbi pah Kana'an. Na' Lot annao natua nbi kuan-kuan le' anhaumaak koot Sodom et nonof amnela' 'naek noe Yarden. 13 Mes abiit eun koot Sodom nane, atoin abulault enu. Ma sin ka nfiloil fa UISNENO amsa'.
14 Tabu na' Lot ma na' Abram anbaits ok, UISNENO nak na' Abram ma nak, “Abram! Ho mkius mutef-tefan miit bale-bale mu'ko bale le' ho mhaek nane. Amkius mulek-leko a'lii ma 'ne'u, koti ma maat. 15 Au of a'fee afu bale-bale le' ho mkius sin nane, 'eu ko, mok ho sufam ma ho kau'm eun, he nfani sin auf pusaak tal antia nabal-baal. 16 Au of a'moe' ho sufam ma ho kau'm eun he nlail too mfaun on le' snaen anbi tasi in ninen. Tal atoni ka nsoi' nabei' fa' sin amsa'. 17 Tabu ii, ho mnao mnoon bale-bale le' ho miit mulail sin nane, natuin Au he 'fee sin 'eu ko!”
18 Nalalit na' Abram sin na'oina, ma nfanin ma natua ntenin anbin hau 'naek eun Mamre, anpaumaak kuan Hebron. Nalalit in anbaik mei 'tulu', oka te na'luli ma na'besan neun UISNENO anbin nane.