Uisneno anboin na' Abram
12
Tabu nane, UISNENO nakua' a'an neu na' Abram ma nak, “Abram! Ho mnao musaitan ho fomili, ho ama' in ume, ma ho kuan. Ho mnao meu bale yes, le' Au of utoon 'eu ko.2 Au of a'fee tetus-athoes 'eu ko.
Ma ho sufam ma ho ka'um of amfau-le'uf,
ma of anlalin uuf ma'tane' ma manenu' tal ho kanam nane of mateka'.
Nalalit ho mfain atoni amneik tetus meu atoni teta'.
3 Au of a'fee tetus 'eu tuaf-tuaf le' anfee tetus neu ko.
Mes Au of a'fee kasat 'eu tuaf-tuaf le' ankaas ko.
Amneen mulek-leko'!
Ale' uuf-uuf anbi pah-pinan ii of napenin tetus, natuin ho.”
4-5 Tabu nane, na' Abram anmoin naan toon bo' hitu mniim (75). In neik in fee bi Sarai, ma in olif na' Haran in anah na' Lot, ma in iblua pusaak eun ok-oke' ma ale' ameupt eun le' in napein sin anbin koot Haran. Oka te na' Abram annao nasaitan koot Haran, neu bale le' UISNENO nba'an nalali ye he natoon ee neun. Sin nnaon nfinin antian pah es, in kanan pah Kana'an.
6 Antian bale nane te, na' Abram sin annono nfuun ma nateef, tal sin anpaumakan ntian kuan Sikem. Nalalit sin natuan ntaahn eun anpaumaak hau 'naek es et More. Tabu nane, abiit eun Kana'an fe' natuan anbin nane. 7 Anbi bale nane, UISNENO natoon On neu na' Abram. In na'uab ma nak, “Au of a'fee bale ii 'eu ho sufam ma ho ka'um sin.” Nalalit na' Abram anbaik mei fatu he nfani mei 'tulu' neu UISNENO le' natoon On anbi nane.
8 Nalalit na' Abram sin nanain eun bale. Sin nnaon neun a'tubu antoom kaliin a'ne'u. Nalalit sin natua ntaahn eun anbin kuan Betel ma kuan Ai sin itnanak. Anbi bale nane, in anbaik mei 'tulu', ma na'bees neu UISNENO. 9 Nalalit sin na'oin eun bale, na'ko bale yes neu bale yes, antian pah Negep et Kana'an antoom kaliin a'ne'u.
Na' Abram annao neu pah Masir
10 Tabu wes, amnahas ma'tane antaman pah Kana'an. Es nane te, na' Abram sin annaon na'loo ntein neu kaliin a'ne'u, antian pah Masir. Sin natuan ntaahn eun anbin nane. 11 Tabu sin he ntaman neun pah Masir, in na'uab neu in fee bi Sarai ma nak, “Sarai, ho maas le'uf ko! 12 On nane te, kaul abiit eun pah Masir niit ho masam te, sin of na'maet kau, natuin au le' ii ho mone. Oka te sin of naan ko. 13 On nane te leko nneis, ho m'etun sin im mak, au le' ii, ho nao'. Nok lanan nane, sin ka neu he nlool kau fa' mes sin of leko nok kau, natuin sin anloim ko.”
14 On nane te, tabu na' Abram sin antian pah Masir, abiit eun nane niit eina' Sarai in masan alekot nane. 15 Tabu kesel pah Masir in abha'et sin niit ate, sin anpules ahaa bifee nane nbi kesel in matan. Oka te sin neik bifee nane neu kesel in sonaf. 16 Kesel nane nok na' Abram anmonin leko, natuin bi Sarai. Nalalit kesel anfeen na' Abram biya, bikaes keledai, bikaes unta, 'bibi, ma 'bib-kase. Kesel anfeen sin luum-luumn aah. In anfee ate neu na' Abram amsa', bifee ma atoni.
17 Mes natuin kesel nataam atoni in fee nbi in sonaf, es nane te, UISNENO anhuukn ee huma'-huma' nok in ume nanan sin amsa'. 18 Nalalit kesel anboin na' Abram ma nataan ee ma nak, “Abram! Ho mmoe' kau on mee? Nasaa' am es ho ka m'eut fa mmak bifee ii, ho fee? 19 Mes ho mak in le' ii, ho feto'! Aal akle'o te, au he 'aan ee nlail au fee! Amsimo mfani' ho fee. Tabu ii, meki ma mpoi maen mimneuk nai'! Au ka 'iit a'tein ki fa mbi bale ii!” 20 Nalalit kesel naplenat in ameupt eun he nliu' napoitan na' Abram ma in fee, ma sin iblua' eun ok-oke. Sin lo he nasaitan bale nane.