3-4 Sin aal sin anma'akool eun ma nak, “Hoe! Au aok-bian aal ki! Eim he hit tafena' kuuk koot a'naek es. On nane te hit tmoe' faut mee', nalalit hit tout sin tal namepan. Hit taktuta' fatun nane ma tlaem sin teik ter. Nalalit hit tahakeb koot uim fatu mnanu es anbi koot a'naek nane in nanan. Koot ma'uim fatu nane, in i'pupun ansutai neno, henati' hit mateka' kit. Ma maut he hit tlail uuf a'naek es, ma kais atbaits ok.”

5 On nane te UISNENO nsaun neem ma nnoon koot nok uim faut maktuta mnanu a'latan le' mansian eun nane nafeen ee. 6 Nalalit In nakua' a'an ma nak, “Sin le' ii, uuf mese' ma uab mese'. Saa' le' sin anmo'e tabu ii, fe' na'uub on. Mes ka loo fa te, kaul sin aal sin nmafutun anlalin mese' on le' tabu ii, sin of nabe'in he nmo'en saa'-saa' aah. 7 Leko nneis Hit tsaun he tpoetelo' sin uab, he nlail uab huma'-huma'. Maut henati' es-es ate ka nahiin fa es in uaban.”

8 Nalalit Uisneno nsanu ma npoetelo' sin uab. Nok lanan nane, In nmoe' mansian eun ansiksan ok neun ale' bale nbin pah-pinan. On nane te sin ka nafena' nasoop fa koot nane. 9 Natuin UISNENO npoetelo' sin uab, ma nsiksana sin neun ale' bale nbin pah-pinan, etun sin nakanab koot nane Babel (le' he nuu paap mese' on le' uab es, le' in otan, nak, ‘takmana’).

10 Na' Sem in sufan sin es eun le' ii: tabu oe snama' nane anmeit toon nua', na' Sem anmoin naan toon nautn es (100), in nahoin li'aan mone yes, ma nakanab na' Arpaksat. 11 Nalalit te in fe' anmoni ntein toon natun niim (500), ma in nahoni ntein li'aan mone ma li'aan feto.

12 Tabu na' Arpaksat anmoin naan toon bo' tenu mniim (35), in nahoin li'aan mone yes, ma nakanab, na' Sela. 13 Nalalit na' Arpaksat fe' anmoni ntein toon natun haa' mteun (403), ma in nahoni ntein li'aan mone ma li'aan feto.

14 Tabu na' Sela anmoin naan toon bo' teun (30), in nahoin li'aan mone yes, es le' na' Eber. 15 Nalalit na' Sela fe' anmoni ntein toon natun haa' mteun (403), ma in nahoni ntein li'aan mone ma li'aan feto.

16 Tabu na' Eber anmoin naan toon bo' tenu mhaa (34), in nahoin li'aan mone yes, es le' na' Pelek. 17 Nalalit na' Eber fe' anmoni ntein toon natun haa' mbo' teun (430), ma in nahoni ntein li'aan mone ma li'aan feto.

18 Tabu na' Pelek anmoin naan toon bo' teun (30), in nahoin li'aan mone yes, es le' na' Rehu. 19 Nalalit na' Pelek fe' anmoni ntein toon natun nua msio' (209), ma in nahoni ntein li'aan mone ma li'aan feto.

20 Tabu na' Rehu anmoin naan toon bo' tenu mnua' (32), in nahoin li'aan mone yes, es le' na' Seruk. 21 Nalalit na' Rehu fe' anmoni ntein toon natun nua mhiut (207), ma in nahoni ntein li'aan mone ma li'aan feto.

22 Tabu na' Seruk anmoin naan toon bo' teun (30), in nahoin li'aan mone yes, es le' na' Nahor. 23 Nalalit na' Seruk fe' anmoni ntein toon natun nua (200), ma in nahoni ntein li'aan mone ma li'aan feto.

24 Tabu na' Nahor anmoin naan toon bo' nua msio' (29), in nahoin li'aan mone yes, es le' na' Tera. 25 Nalalit na' Nahor fe' anmoni ntein toon nautn es am bo'es am sio' (119), ma in nahoni ntein li'aan mone ma li'aan feto.

26 Tabu na' Tera anmoin naan toon bo' hitu ma nneis, in nahoin li'aan mone teun, es eun le': na' Abram, na' Nahor, ma na' Haran.

27 Na' Tera in sufan ma in ka'un sin, es eun le' ii: na' Tera in aanh eun, na' Abram, na' Nahor, ma na' Haran. Na' Haran nahoin li'aan mone yes, es le' na' Lot. 28 Na' Haran anmaet anbi in kua mnasi' Ur, et pah atoni Kasdimas. Tabu in anmaet, in amaf na' Tera fe' anmoin. 29 Na' Abram anmafee nok bi Sarai. Na' Nahor anmafee nok na' Haran in aan feto, bi Milka. Na' Haran nahoin li'aan mone yes amsa', es le' na' Yiska. 30 Mes bi Sarai nkiu'.

31 Neno wes, na' Tera neik in anah na' Abram, in nanef bi Sarai, ma in upuf na' Lot. Sin anpoin ma nnaon nasaitan sin kua mnasi' Ur. Tabu nane, sin he nnao neu pah Kana'an. Mes antian pah Haran, sin natuan anbin nane.

32 Anbin nane te, na' Tera anmaet, tabu in anmoin naan toon natun nua mniim (205).