Na' Noh ma na' Yafet sin sufa' ma sin ka'uf sin
10
Oe snama' nane anmeit nalail on nane te, na' Noh in aanh eun anmulai nahonin. In napein sufaf na'ko na' Sem, na' Yafet, ma na' Ham.2-5 Na' Yafet in sufan sin es eun le': na' Gomer, na' Magok, na' Madai, na' Jawan, na' Tubal, na' Mesek, ma na' Tiras. Es-es ate nok in uab, in uuf, ma in pah.
Na' Gomer in sufan sin es eun le': na' Askenas, na' Rifat, ma na' Togarma.
Na' Yawan in sufan sin es eun le': na' Elisa, na' Tarsis, abiit eun Kitim, ma abiit eun Dodanim le' natuan et tasi ninen.a
Na' Ham in sufan ma in ka'un
6 Na' Ham in sufan sin, es eun le': na' Kus, na' Misraim, na' Put, ma na' Kana'an.b
7 Na' Kus in sufan sin es eun le': na' Seba, na' Hawila, na' Sapta, na' Raema, ma na' Sapteka.
Na' Raema in sufan sin es eun le': na' Seba ma na' Dedan.
8 Na' Kus in aan mone, es le' na' Nimrot. Atoni le' ii, meo pa'e ahun-hunut le' ma'taen le'uf. 9 In ma'tanen nane amneman na'ko UISNENO, tal antia in nlail aklaot leko wes. Etun sin nteek ate, nak, “Maut he ho mfain aklaot leko wes on le' na' Nimrot, le' napein in ma'tanen na'ko UISNENO.” 10 Nahunut in pah anmulai na'ko Babel, Erek Akat, ma Kalne. Balen le' ii sin et eun pah a'naek Sinear.c 11 Na'ko nane in nheinua ntein in kuan ma in i'plenat antia Asur. Nalalit in nafena' koot Niniwe, koot Rehobot-Ir, koot Kala, 12 ma koot Resen, le' et Niniwe ma Kala sin atnaank enu. Balen nane, pah a'naek.
13 Na' Misraim in sufan sin, es eun le': abiit eun Ludim, abiit eun Ananim, abiit eun Lehabim, abiit eun Naftuhim, 14 abiit eun Patrusim, abiit eun Kasluhim, ma abiit eun Kaftorim. Abiit eun Kasruhim nane, es eun le' atoin Filistinas sin beif ma sin na'if sin.
15 Na' Kana'an in aan moen unu es le' na' Sidon. Na' Kana'an anfain aam uuf neu atoin Hetes, 16 atoin Yebusis, atoin Amoris, atoin Girgasis, 17 atoin Hiwisas, atoin Arkis, atoin Sinis, 18 atoin Arwadis, atoin Semaris, ma atoin Hamatis.
Na' Kana'an in sufan sin nasaan ok antian bale 'loo-loo, 19 tal antia sin naakt eun anmulai na'kon koot Sidon nfinin kuan Gerar antian pah Gasa. Na'ko nane, nfinin neun koot Sodom, koot Gomora, koot Atma, ma koot Seboim, tal antian koot Lasa.
20 Sin aal sin le' nane, na' Ham in sufan ma in ka'un. Es-es ate nok in uab, in uuf, ma in pah.
Na' Sem in sufan ma in ka'un
21 Na' Yafet in tataf na' Sem anlail abiit eun Eber sin aam uuf.d
22 Na' Sem in sufan sin, es eun le': na' Elam, na' Asur, na' Arpaksat, na' Lut ma na' Aram.
23 Na' Aram in sufan sin, es eun le': abiit eun Us, abiit eun Hul, abiit eun Geter, ma abiit eun Mas.e
24 Na' Arpaksat in aanh ee, es le' na' Sela. Na' Sela in aanh ee, na' Eber.
25 Na' Eber napein li'aan mone nua'. Le' a'nae, kanan na' Pelek (le' in otan ‘anbaits ok’), natuin tabu nane, mansian eun anbaits ok neu bale-bale anbin pah-pinan. In olif, kanan na' Yoktan.
26 Na' Yoktan in sufan sin, es eun le': na' Almodat, na' Selef, na' Hasar-Mawet, na' Yera, 27 na' Hadoram, na' Usal, na' Dikla, 28 na' Obal, na' Abimael, na' Seba, 29 na' Ofir, na' Hawila, ma na' Yobap. Sin aal sin le' ii, na' Yoktan in sufan.
30 Bale-bale le' sin natua nane, anmulai na'kon Mesa anfini ntian Sefar, es eun le' bale 'netu sin antoom neon-saet.
31 Sin aal sin na' Sem in sufan. Es-es ate nok in uab, in uuf, ma in pah.
32 Sin aal sin ok-oke', na' Noh in sufan ma in ka'un, es-es ate nok in uuf aa kuun. Tabu oe snama' nane nmeit, sin le' ii es le' nasaan ok ma nbaits ok ma naheun pah-pinan.